Маңғыстау облысында «Қарапайым заттар экономикасы» бағдарламасын дамыту аясында 40-тан астам жоба ұсынылды.
Өңірлік коммуникациялар қызметі алаңында өткен брифингте Маңғыстау облысының индустриялық-инновациялық даму басқармасының бөлім басшысы А.Бегиеваның айтуынша, бағдарлама аясында Үкімет өңдеу өнеркәсібі және агроөнеркәсіп кешені саласындағы басым жобаларды 2018-2020 жылдар аралығында қолдау бағытында 600 млрд теңге қарастырған болса, соның ішінде өңдеу өнеркәсібін дамытуға 400 млрд теңге бөлінген. Бұл несиелеу бағдарламасына негізінен жеңіл өнеркәсіп, жиһаз өнеркәсібі, тамақ және қайта өңдеу өнеркәсібі, сондай-ақ құрылыс материалдарын өндіру, туризм, білім саласы, көлік және логистика саласындағы қызмет түрлерін қамтитын жобалармен барлық бизнес субъектілері қатыса алады. Жоба аталған салаларды дамыту мәселесіне қатысты, соның ішінде жүйелік деңгейдегі, орталық және жергілікті деңгейдегі бірқатар іс-шараларды қамтитын 9 тараудан тұрады. Қазіргі таңда Маңғыстау облысында «Қарапайым заттар экономикасын» дамыту жөніндегі Үкімет тапсырмасына сәйкес аймақ басшылығы мен «Атамекен» өңірлік кәсіпкерлер палатасы негізінде құрылған жобалық кеңседе тиісті іс-шаралар жоспары жасақталып, жұмыс жүргізілуде.
– Бүгінгі таңда екінші деңгейдегі банктермен жалпы сомасы 3,0 млрд теңгеге 9 жоба, оның ішінде 2,46 млрд теңге болатын 7 жобаны «Даму» қоры мақұлдап отыр және жалпы сомасы 2,20 млрд теңгені құрайтын 5 жобаны субсидиялау туралы келісімге қол қойылған. Және 20 млн теңге сомасында несие бойынша 1 жоба, 10 млн теңге немесе несиенің 50%-ына кепілдеме алған. Соның ішінде, өңірдегі өңдеу өнеркәсібіндегі азотты минералды тыңайтқыштар өндіретін ірі кәсіпорын «ҚазАзот» АҚ-ында осы бағдарлама аясында несие алуға қолдау тапқан.
Ал «Қарапайым заттар экономикасының» басқа жобалардың артықшылығына тоқталсақ, біріншіден, кәсіпкер қандай сомада несие алам десе де шектеу жоқ. Екіншіден, несиенің 50 пайызын «Даму» кәсіпкерлікті қолдау қоры субсидиялап, 5 млрд теңгеге дейін несиеге кепіл бола алады. Аталған салаларда бизнестерін бастауға ниетті азаматтар толық ақпаратты «Атамекен» кәсіпкерлер палатасынан, «Даму» кәсіпкерлікті қолдау қорынан және екінші деңгейлі банктерден ала алады, – дейді «Даму» кәсіпкерлікті қолдау қорының Маңғыстау облыстық филиалы директоры Г. Қалымбетова.
Жобаның алғашқы қанатқақты нәтижесі ретінде Ақтауда кәсіби спортшыларды дайындайтын спорт-сауықтыру кешені ашылмақ. Кәсіпкердің құны 100 млн теңге тұратын ұсынысын «Forte Bank» мақұлдап, кешен 2020 жылдың мамыр айында ашылады деп жоспарлануда. Спорт кешені ашылған соң кәсіби спортшылар үшін ірі спорттық сайыстарға, олимпиадаларға дайындалу үшін алысқа сапар шекпей, өз елімізде дайындалу қолжетімді болмақ.
