Мемлекеттік қызмет істері агенттігі төрағасының орынбасары Салауат Мұқсимовтың айтуынша, енді жыл сайын барлық мемлекеттік қызметшілер наркологиялық тексеруден өтуге міндеттеледі. Сондай-ақ мемлекеттік құпияларға қолжетімділігі бар қызметкерлер де осы тексеруден өтеді.
Оның айтуынша, наркоскрининг алдын ала жоспарланбайды және тосын сипатта жүргізіледі.
«Бұл жерде график бекітіліп, алдын ала хабарлау болмайды. Тексеру шешім қабылданғаннан кейін 48 сағат ішінде тосын жүргізіледі», деді Салауат Мұқсимов.
Ол сондай-ақ мемлекеттік қызметші тексеруден бас тарта алмайтынын атап өтті. Оның айтуынша, бас тарту күдіктің негізділігін мойындау ретінде қарастырылып, қызметті жалғастыруға мүмкіндік бермейді.
«Заң алғаш рет есірткі заттарын қолдануды мемлекеттік қызметке кір келтіретін әрекет ретінде қарастырады. Бұл қызметтен босатуға негіз болады», деді агенттік өкілі.
Астанада жалдамалы пәтерлерде есірткі сақтаған күдікті ұсталды
Сонымен қатар, наркоскринингтен өту мемлекеттік қызметшілердің өз қаражаты есебінен жүзеге асады. Дегенмен заңда тексеру күні мен одан кейінгі жарты күнге демалыс беру қарастырылған.
Нұрболат АМАНБЕК
