«Блэйз» эстрадалық би студиясының жетекшісі Любовь Корнюхинаның айтуынша, өнер байқауы Ион теңізінің жағалауында орналасқан курорттағы «Alexandreio» концерт залында өтіпті.
Халықаралық-эстрадалық би байқауына Белоруссия, Ресей, Украина, Грузия, Грекия, Литва, Молдова елдерінен кішкентай қатысушылар келген.
Оқушылар сарайының «Блэйз» эстрадалық би студиясының бишілері «Армандар орындалады», «Еркін тыныс», «Дала әуендері», «Кеңістік», «Жаңғыру», «Бір күні» атты әртүрлі тақырыптағы шығармаларды орындады.
Грекияға шақырту алған би студиясының би композициялары ерекше, театрландырылған, ашық, қимыл-қозғалысты сюжеттерімен ерекшеленіпті. Репертуарға сай тігілген би костюмдерінің ұлттық нақыштағы коллекциялары көрермендерді таңғалдырған.
«Блэйздің» «Тип-Топ» атты дайындық тобының кішкентай бишілері Арина Казакова, Саида Маралбаева, Людмила Сологуб, Сабина Сейіткәрімдерге халықаралық қазылар алқасы билерінің әртүрлілігі мен қызықты сюжеттері үшін жоғары баға беріпті.
– Әрине байқауға қатысқан барлық елдердің бишілері кәсіби деңгейлерін көрсетті. Біздің бишілер билеген «Дала сағымдары» атты қазақтың ұлттық билер топтамасы шығыстық өзіндік өрнектерімен таңғалдырды. Біздің бишілер 6 бірінші орын иеленді. Гала-концерт пен марапаттау рәсімі Жерорта теңізі пальмаларымен қоршаған Лутраки курортының орталық алаңында өтті, – дейді Любовь Корнюхина.
Ал бишілеріміздің алыс шетел көрермендерінің ықыласына бөленуіне би үйірмесінің жетекшілері Ирина Руденко, Дина Гимазетдинова, Анжелика Булич, сондай-ақ байқауға қатысушылардың ата-аналары үлес қосыпты.
ПАВЛОДАР
