Ұлықтау рәсімінде Президент: «Тағы бір маңызды, халықты мазалайтын мәселе – жолдардың сапасы. Сол себепті автожолдардың жағдайын жақсарту – біздің негізгі мақсаттарымыздың бірі» деген болатын. Шындығында, елімізде жөндеу немесе жаңадан салу жұмыстары кешеуілдеп жатқан жолдар аз емес. Сондай жолдардың бірі – «Нұр-Сұлтан – Павлодар» бағыты.
Жуырда Павлодар облысына жұмыс сапарымен барған Индустрия және инфрақұрылымдық даму министрі Роман Скляр осы автожолдың Шідерті кентінің маңындағы учаскесіне атбасын тіреген-ді. Жұмыстың жай-күйін көзімен көрген министр мерзімінен тым ұзаққа созылған жол құрылысын 3 ай ішінде бітіріңдер деп шұғыл тапсырма берді.
2014 жылы басталған «Нұр-Сұлтан – Павлодар» жол құрылысы 2017 жылы пайдалануға берілуге тиіс болатын. Министр Р.Склярдың «Нұр-Сұлтан – Павлодар» автобан жобасының уақытында аяқталмай жатқаны үшін халық алдында ұялатынын да жасырмағаны соған байланысты.
– Шетелдік бір мердігер жобаны жол ортада қалдырып кетті немесе жергілікті компаниялар сылбыр жұмыс жасады деп жауапкершіліктен қашуымызға болмас. Тапсырыс беруші министрлік толығымен жауап беруге міндетті, – деді министр.
Ал жол құрылысына жауаптылар маңызды жұмыстың кестеден кешіктірілуіне әуел бастан басты себепкер деп «ДенаРахсазКонстракшн» атты ирандық компанияға кінә артады. Бұл компания Павлодар аумағындағы ұзындығы 115 шақырым болатын үш жол учаскесіне жауапты болған екен. Компания жүктелген міндеттемені орындай алмаған соң, жасалған келісімшарт бұзылып, қайтадан конкурс ұйымдастырылған.
– Былтыр жолдың біраз бөлігі ашылды. Биыл құрылысты аяқтауға 28 млрд теңге бөлінді. Қазір жұмыс кестеге сәйкес жүргізілуде. Жұмыс аз қалды. Қалқаман мен Павлодар арасындағы бірнеше учаскеде құйылған бетондардың сапасы сынға іліккені белгілі. Төсеу технологиясы бұзылғаны үшін мердігер компания жолды өз қаражатына қайта салады, – деді Р.Скляр.
«ҚазАвтожолдың» жергілікті филиал басшылары қыруар қаражатты игермеу жол салушылардың сылбырлығынан, сондай-ақ, қиыршық тас пен битум сияқты материалдың жетіспеуінен де болды деп кінәлайды. Кінәлілер анықтала жатар. Қалай болғанда да, министр мердігерлерден жолды тезірек ашуды талап етіп отыр.
– Жұмыс күнін ұзартыңыздар. Бір учаскеде 54 техника бірлігі жұмыс істейді деп берілген. Алайда, көзбен қарағанда ол техниканың жартысы да көрінбейді. Халыққа 2, 3-ші мердігерлер ауысты, екі рет тендер өткізілді деп түсіндіре алмаймыз. Нақты мерзім белгілейік. Жұмысты 3 айда аяқтауды тапсырамын. Құрылыс кестесін түзетіңіздер. Қосымша мердігер аласыздар ма, қайткенмен де биыл аяқтауымыз қажет, жылдамдатайық, – деді Р.Скляр.
Бұл автожолдың құрылысы 5 жыл бұрын басталғанын айттық. Содан бергі аралықта «ҚазАвтожол» АҚ-ның облыстық филиалының бірнеше басшысы ауысып үлгерді. Арасында істі болғандары да бар. Негізі, осы басшылардан нақты жауапкершілік, халық алдындағы міндет пен парыз, талап пен тәртіп талап етілуі керек еді. Жоба басталғанда «ҚазАвтожол» АҚ жергілікті филиалын ең алдымен Ерсін Сариев басқарды. Алайда, ол жобаны аяқтап үлгермей қызметінен кетті. Одан кейін 2017 жылы Қайрат Кәрібаев басшылыққа тағайындалған-ды. Одан кейін 2018 жылы небәрі 2-3 ай уақыт тізгін Нұралы Тойымбетовке тиді. Қарап отырсақ, автобан құрылысын абыроймен тапсырады деген басшылар бір жылға жетер-жетпес уақытта тапсырылған міндетті орындамай, креслосымен қош айтысып кете барады.
Қазір жергілікті филиалды Ақылбек Қабылдин басқарады. Оған бұл автожолды 2019 жылдың соңына дейін аяқтау міндеті жүктеліп отыр. Кезінде Инвестициялар және даму министрі болған Жеңіс Қасымбек:
– «Нұр-Сұлтан – Павлодар» тасжолында жаңа мердігерлер жұмыс істеп жатыр. Барлық проблема осы учаскелердегі жұмысты аяқтауға қатысты болып отыр. 2018 жылы аталған учаскені аяқтауға соңғы рет қаржы беріледі, яғни 2019 жылдың бюджетінде бұл жобаға ақша қарастырылмаған. Сондықтан нысан 2018 жылы толығымен пайдалануға берілуге тиіс, – дегені есімізде. Алайда мерзім тағы шегерілді. 2018 жылы пайдалануға тапсыру жоспарланған «Нұр-Сұлтан – Павлодар» тасжолының құрылысы мердігерлердің жіберген олқылықтары салдарынан созылып кеткені хабарланды.
«Нұрлы жол» бағдарламасы аясында қолға алынып, құрылысы ұзаққа созылған тағы бір бағыт – «Орталық-Шығыс» автожол дәлізі. Бұл бағыттағы жолдың жалпы ұзындығы – 905 шақырым, оның 420 шақырымы Павлодар облысының аумағы арқылы өтеді. «ҚазАвтожол» АҚ жергілікті филиалының мәліметінше, бұл аумақ 15 учаскеге бөлінген. Қазір 9-бөлікте құрылыс жұмыстары аяқталып, 200 шақырым жол пайдалануға берілген.
Сөз басында айтып кеткеніміздей, автомобиль жолы халықтың тұрмыс сапасына тікелей әсер ететін фактор. «Нұр-Сұлтан – Павлодар» тасжолының ашылуын күткен халық жазда шаңы бұрқырап, ойдым-ойдым болып жататын жолмен жүруден әбден шаршады. Көлік апаттары да көп болады. Жұрт қашан аяқталады деп күтіп отыр.
Павлодар облысы
