Таяуда Индустрия және инфрақұрылымдық даму министрі Роман Скляр мен «Самұрық-Қазына» ҰӘҚ» АҚ Басқарма төрағасы Ахметжан Есімов Алматы облысына жұмыс сапары барысында «Қорғас – Шығыс қақпасы» АЭА-ның нысандарымен және қызметімен танысты. Қорғас көлік-логистикалық хабы нысандарында сонымен қатар Алматы облысының әкімі Амандық Баталов, «Қазақстан темір жолы» ҰКӘ» АҚ Басқарма төрағасы Сауат Мыңбаев және «Қазпошта» АҚ Басқарма төрағасы Сәкен Сәрсенов болды.
Ауданы 3010 шаршы метр болатын «Қазпошта» АҚ-ның бондтық қоймасы Қорғастағы көлік-логистикалық хабының аумағында орналасқан. Ол авиажеткізілім мерзімін 2-3 күнге дейін, ал автокөлікпен жеткізуді 7-12 күнге дейін қысқартуға, сонымен қатар пошта операторына әріптестер санын кеңейтуге мүмкіндік береді. Ішінара «Қазпошта» инфрақұрылымын пайдалану туралы Clevy, «OBORCloud Network Technology Co., Ltd» және басқа да бірқатар қытайлық логистикалық компаниялармен уағдаластықтарға қол жеткізілді.
Бүгінгі таңда қытайлық әріптестер Қазақстан арқылы транзитпен осы жылдың соңына дейін 400 тоннадан астам тауар жіберуге дайын. Ерекше атап өтілгені, қойма Қытайдан Еуропалық одақ және Орталық Азия елдеріне бағытталған транзиттік жүктерді өңдеуге арналған. Оның өндірістік қуаты орташа есеппен күніне 15-20 тоннаны құрайды, сыйымдылығы шамамен 58 тонна.
Қазіргі таңда трансқұрлықтық контейнерлік жүк ағыны үшін жаңа тартылыс орталығына «Khorgos GateWay» құрлық порты айналып отыр. Өңделетін контейнерлер көлемі жыл сайын артуда. 2018 жылы 134 мыңнан астам ЖФЭ (жиырма футтық эквивалент) қайта тиелген, бұл – 2017 жылға қарағанда 39% көп.
– Алғашқы жартыжылдықта біз 66,5 мың ЖФЭ өңдедік. Жалпы алғанда, бір жылда контейнерлер тиеуді 21%-дан асыру жоспарлануда, – деді «KTZE-Khorgos GateWay» ЖШС бас директоры Ибрагим Манабаев.
Ахметжан Есімов елде контейнерлік тасымал 47% -ға артқанын жеткізді. Бұл ретте ол «KTZ Express» АҚ Басқарма төрағасы Дмитрий Абдуллаевқа қарата, биыл қанша жүк тиелу жоспарда тұрғанын сұрап, қызығушылық танытты және бұл көрсеткішті 1 миллионға дейін жеткізу расында мүмкін бе деп сұрады.
«KTZ Express» басшысы компания жоспары бойынша биылғы меже 824 мың контейнер ЖФЭ екенін жеткізді. Бірақ осы көрсеткішті арттыру жұмыстары үздіксіз жалғасуда. Таяуда Д.Абдуллаев Қытайға барып, сондағы әріптестермен 20-ға жуық кездесу және Чунсин, Чунду, Сиань провинцияларында келіссөздер өткізеді.
– Коммерциялық жұмыстар ұдайы жүргізілуде. Теңіз бағдарлары бойынша да, Трансібір аумағы арқылы да жүк ағынын тартудамыз, – деді ол.
Делегация барған кезде құрлық портында екінші контейнерлік құрамды қайта тиеу жұмыстары жүріп жатты. Біріншісі бұл жерден бірнеше сағат бұрын Еуропа бағытында жөнелтілген. Ал екіншісінің бағыты – Ақтау порты, оның құрамында Иранға кететін 40 контейнер болды. Бұл ретте аталған пойыздың «Самұрық-Қазына» қорының қолдауымен биыл сәуірде Бакуге бағытталған қазақстандық «Түркістан» кемесін пайдалана отырып, іске қосылған фидерлік желіге тікелей қатысы бар.
– Ақтау теңіз портындағы бұл желі тұрақты кестемен жұмыс істеуде. Бүгінгі пойыз сейсенбі күні Ақтауда болады, сәрсенбіде оны Каспий арқылы жеткізу орнына жөнелтеді. Сонымен бірге Қорғасқа жақындаған кезекті пойыз Қытай аумағы арқылы жүреді, – деді Д.Абдуллаев.
Ақтау, Баку (Алят) порттары арасындағы фидерлік қатынас күн сайын айналымға шығып, сұранысы жоғарылауда. Екі ай ішінде фидерлік класты кемелермен 700-ден астам контейнер тасымалданған. Тек сәуір айының өзінде олардың саны 200 болды, ал маусымда Ақтау порты 500-ден астамын жөнелтті. Мұндағы аталған логистикалық сервистің әлеуеті жылына 300 мыңнан астам контейнерді құрайды.
«Қорғас – Шығыс қақпасы» АЭА құрлық порты, Ақтау теңіз порты және Алтынкөл шекаралық стансасының логистикалық инфрақұрылымын пайдалану аталған бағдар мен өңірдің дамуында ең жоғары мультипликативтік тиімділікке ие болады. Ал «Қорғас – Шығыс қақпасы» АЭА логистикалық аймағында жақын күндері жалпы ауданы 25 мың шаршы метр «KIF Warehouses» ЖШС жаңа қойма кешені іске қосылады.
– 2025 жылға дейін жалпы сомасы 421 млрд теңгенің 10 инвестициялық жобасы жүзеге асырылмақ, – деді «Қорғас – Шығыс қақпасы» АЭА АҚ Бас директоры Мұрат Баймұханбетов. – «Нұрлы жол» қосынын қарау кезінде «Қорғас – Шығыс қақпасы» АЭА аумағында автокөліктердің кедергісіз қолжетімділігін қамтамасыз етуге көңіл бөлінді.
«Қорғас» ХШЫО» АҚ президенті Қаһарман Джазин «Қорғас» ХШЫО» АЭА басқару компаниясы мәртебесін алысымен Халықаралық орталықтың қазақстандық аумағында жұмыс істейтін компанияларды тіркеу басталатынын айтты. Олардың бәрі көрсетілген жеңілдіктер пакетін алады – ҚҚС, КТС-тен және жер мен мүлікке салықтардан толықтай босатылады.
