Кәсіпорын ашқың келе ме? Кел де, іске кірісе бер!
Сенбі, 26 қаңтар 2013 7:17
Бір кездері Шымкент қаласының даңқын шартарапқа танытып, атағын дүркіреткен «Шина» зауытының кейінгі жылдары жұмысы тоқтап, күннен-күнге тоналып, көз алдымызда жоқ болып бара жатқаны көптің көңіліне кірбің түсіріп жүргені рас еді. Бірнеше мыңдаған жанды жұмыспен қамтып, мұржасы бұрқырап, қазаны қыз-қыз қайнап жататын зауыттың мұндай мүшкіл халге түсуі қалталы азаматтарды да қатты ойландырса керек. Сөйтіп, осыдан екі жыл бұрын зауыт аумағынан «Ордабасы» индустриялық аймағы ашылған болатын.
Сенбі, 26 қаңтар 2013 7:17
Бір кездері Шымкент қаласының даңқын шартарапқа танытып, атағын дүркіреткен «Шина» зауытының кейінгі жылдары жұмысы тоқтап, күннен-күнге тоналып, көз алдымызда жоқ болып бара жатқаны көптің көңіліне кірбің түсіріп жүргені рас еді. Бірнеше мыңдаған жанды жұмыспен қамтып, мұржасы бұрқырап, қазаны қыз-қыз қайнап жататын зауыттың мұндай мүшкіл халге түсуі қалталы азаматтарды да қатты ойландырса керек. Сөйтіп, осыдан екі жыл бұрын зауыт аумағынан «Ордабасы» индустриялық аймағы ашылған болатын.
Бүгінде бұл аумақта 30-ға жуық кәсіпорын орналасып, бірнеше жылдан бері қаңырап бос жатқан ғимараттар кәдеге жарауда. 1250-ге жуық адам осы кәсіпорындардан несібесін тауып, тұрақты жұмыспен қамтылды. Болашақта бес мыңға дейін адамды тұрақты жұмыспен қамтуға мүмкіндік бар. Аймақ аумағында 143 гектар жер телімі мен 335 мың шаршы метр өндірістік ғимарат, 33 мың шаршы метр қойма, 5 мың шаршы метр контейнерлік алаң мен 18 мың шаршы метр кеңсе ғимараты бар. Осының барлығы облыс орталығында Елбасы ерекше тапсырған кәсіпкерліктің қарыштап қанат жаюына мол септігін тигізбек. Бұл Шымкент қаласындағы салық түсімін арттырып, бюджеттің бүйірін томпайта түсері даусыз. Ал бюджет қаржысы көбейсе халықтың көкейін мазалаған көптеген мәселелер оңынан шешілетіні түсінікті.
Бұл аймақта кәсібін дөңгелеткісі келген кәсіпкерлер үшін жаңадан инфрақұрылым, өндірістік, кеңсе ғимараттарын, қойма, темір жол тұйығы секілді аса қажет нысандарды салудың қажеті жоқ. Олар дайын. Тек кәсіпорынға қажетті құрал-жабдықтарды орнатса болғаны. Кәсіпорын ашқың келеді ме, идея бар ма, пайдалан да, кедергісіз іске кірісе бер.
Тағы бір айта кетерлігі, мұнда коммуналдық қызметтердің барлық түрі, мейлі, ол су, газ, жарық болсын, қаладағы тарифтен 30 пайызға төмен екен. Осының арқасында аймаққа жақын аумақта қосымша 37 кәсіпорын іске қосылыпты. Онда да мыңнан астам адам тұрақты жұмыспен қамтылған.
«Индустриялық аймақтың жұмысын жүргізу, жандандыру мақсатында бірнеше шет мемлекеттердің тәжірибесімен танысып қайттым. Соның ішінде Түркияның тәсілі көңіліме қонымды болды. Онда да тура біздікіндей әдісті қолданады. Тек олардағы іске асырылып жатқан мегажобалардың көлемі өте үлкен. Жақын болашақта түркиялық OSTIM корпорациясымен бірлескен жобаны, яғни қазақ-түрік аймақтық өндірістік орталығын құру жоспарда бар. Аталған корпорация Түркиямен қатар Египет, Ирак және Оңтүстік-шығыс Азия, Солтүстік Африка мемлекеттеріндегі индустриялық аймақтарды мейлінше дамытуға қол жеткізген ірі орталық. Анкара қаласының өзіндегі аймақта ғана 5 мыңнан астам кәсіпорын ондаған мың өнім түрлерін шығарып жатыр», дейді «Индустриялық аймақ «Ордабасы» ЖШС-нің директоры Нұрғазы Бұхарбаев.
Бүгінде бұл зауыт аумағынан 30-ға жуық өнім түрі шығарылады. Олардың арасында түрлі құрылыс заттары, су мен көгілдір отынға арналған пластик құбырлар, электр үнемдегіш лампалар, тұрмыстық сабын, жүк және жеңіл автокөліктердің алдыңғы терезелері, пластик терезелер, мотор майы және басқа да өнімдер шығарылуда. Мәселен, алинекс шығаратын «Alina Trade» ЖШС айына 40 вагон өнім шығарып жатыр. Бұдан бөлек 5 гектар жерге жылыжай орналастырылған.
Жалпы алғанда облыс индустрияландыру картасы аясында 2015 жылға дейін 111 жобаны іске асыруды жоспарлап отыр. Өткен жылы 27 жоба іске қосылып, 1820 жұмыс орны ашылды. Ал, жыл соңында тағы 2 жоба іске қосылып, 355 адам жұмыспен қамтылды. Карта аясында іске қосылған кәсіпорындар 14,5 млрд. теңгенің өнімін шығарды. Әрине, «Ордабасы» индустриялық аймағы кешегі «Шина» зауытының кезіндегідей жұмысшысы сапырылысып, іші құж-құж қайнап жатпаса да әйтеуір бір тіршіліктің нышаны бар. Және ол енді-енді шым-шымдап қайнап келе жатқан тіршілік. Ірі кәсіпкерлерге кең жол ашқан бұл аймақтың болашағы әлі алда екені айдан анық.
Оралхан ДӘУІТ,
«Егемен Қазақстан».
ШЫМКЕНТ.
