Жаны қазақ Виктория

Эстафетаға қатысушылардың арасынан Тараз қаласының тұрғыны Виктория Вячеславовна Трегубова Абай Құнанбаевтың «Өлең – сөздің патшасы» өлеңін оқып, көпшілік көзайымына айналды. Әлеуметтік желіде жоғары танымалдыққа ие болып, ҚХА баспасөз қызметі таратқан бейнежазбаға 1500-ге жуық репост жасалып, көрушілер саны 65 мыңнан асты.

Белгілі ақын, Мемлекеттік сыйлықтың иегері Тыныш­тықбек Әбдікәкімұлы, ақын «Платиналы тарлан» сыйлы­ғының иегері Исраил Сапарбай, көрнекті күйші, Қазақстанның еңбек сіңірген қайраткері Жан­ғали Жүзбаев, кинорежиссер, Қазақстанның еңбек сі­ңірген қайраткері Сатыбалды Нарымбетов, дүлділ әнші,  Қазақ­станның еңбек сіңірген қайраткері Ерлан Рысқали және басқа ақын-жазушылар мен БАҚ өкілдері, сондай-ақ әлеуметтік желі қолданушылары Викторияға қазақ тіліне деген құрметі үшін ерекше алғыс айтып, зор ризашылығын білдірді.

Осы орайда жақынырақ таныстыра кетсек, Виктория Вячеславовна Трегубова  – 1998 жылы 1 маусымда Ресей Федерациясы Ульяновск облысында дүниеге келген. 2000 жылы Жамбыл облысы Мойын­құм ауданы Ұланбел ауылына қоныс аударған. М.Әуезов атындағы орта мектепті бітірген. 2015-2019 жылы М.Х.Дулати атындағы Тараз мемлекеттік университетінің журналистика факультетін бітірген.

Қазіргі кезде Тараз қала­сында тұрады, қаңтар айынан бастап Жамбыл облыстық телеарнасының «Tuski time» бағдарламасының тәлімгер-жүргізушісі. Жамбыл облыстық Қазақстан халқы Ассамблеясы «Раданеж» орыстар қоғамы бірлестігінің мүшесі және ҚХА Жаңғыру жолы жастар қозға­лысының белсендісі.

– Отбасында екі ағайын­дымыз. Өзімнен үш жас үлкен ағам Владислав та қазақ мек­тебін бітірген, қазақ тілінде еркін сөйлейді. Анам Светлана Сте­пановна – метеоролог, әкем Вячеслав Александрович Жам­был облыстық обаға қарсы күрес стансасының қызметкері. Нағашы жұртым – Жамбыл об­лысынан, анам Ұланбел ауы­лында туып-өскен. Ресейге қы­дырып барып, әкеммен танысып, екеуі шаңырақ кө­терген. Арада 6-7 жыл өткен­де анам әкеме туып-өскен же­рін көрсетпекші болып, екі баласымен төркініне қыдырып келеді. Әкеме Қазақстанның ұнағаны соншалық, біз Ресейге қайта оралмадық.

Ауылда бір ғана қазақ мек­тебі болғандықтан, үйдегілер бізді амалы жоқтығынан сол білім ошағының партасына отырғызған болар. Бірақ біз қазір мемлекеттік тілді жоға­ры деңгейде білетініміз үшін мақ­танамыз. Қазақы ортада тәрбиеленуіме мүмкіндік жасаған әке-шешеме мың алғыс айтамын. Өзімді көпшілікке орыстың қазақ қызымын деп таныстырамын, – дейді Виктория Трегубова.