Ауылда… құбыр шығарылады
Сәрсенбі, 17 сәуір 2013 2:08
Үржар ауданының әкімі Бауыржан Жанақов шалғайдағы өңірге іссапармен келген біздің бұйымтайымызды білісімен, «Өңірде жаңалық көп» деп алып, Мақаншы ауылында елімізде теңдесі жоқ пластикалық құбырларды шығарып жатқан «Бәтуа» жауапкершілігі шектеулі серіктестігінің 3 миллиард теңге өз қаржыларына пластикалық зауытты іске қосқандарын, ол-ол ма, Сарытерек телімінде 1900 гектарға соя дақылын егіп, оны экспортқа шығара бастағандарын, қонақүй, жатақхана, асхана, екі астық сақтайтын қораны салғандарын, аудан бюджетіне қыруар қаржы құйғандарын, жүздеген адамды жұмысқа қабылдағандарын» ілтипатпен жеткізді.
Сәрсенбі, 17 сәуір 2013 2:08
Үржар ауданының әкімі Бауыржан Жанақов шалғайдағы өңірге іссапармен келген біздің бұйымтайымызды білісімен, «Өңірде жаңалық көп» деп алып, Мақаншы ауылында елімізде теңдесі жоқ пластикалық құбырларды шығарып жатқан «Бәтуа» жауапкершілігі шектеулі серіктестігінің 3 миллиард теңге өз қаржыларына пластикалық зауытты іске қосқандарын, ол-ол ма, Сарытерек телімінде 1900 гектарға соя дақылын егіп, оны экспортқа шығара бастағандарын, қонақүй, жатақхана, асхана, екі астық сақтайтын қораны салғандарын, аудан бюджетіне қыруар қаржы құйғандарын, жүздеген адамды жұмысқа қабылдағандарын» ілтипатпен жеткізді.
«Жақсыны көрмекке» деген, салып ұрып Мақаншыға жеттік. 45 шақырымдық жол тақтайдай тегіс, асфальт төселген, Алматы, Таскескен, Үржар арқылы Қытайдың Үрімшісіне дейін салынып жатқан сапалы жолдың «Алматы – Өскемен» трассасына дейінгі аралықтағы жөндеу жұмыстары басталып кетіпті.
Мақаншы ауылдық округінің әкімі Советхан Қалиев бізді ауылдың шет жағындағы пластикалық зауыттың ауласына алып келді. 630 және одан сәл жіңішкелеу 315 миллиметрлік, ұзындығы 6 метрлік құбырлар тау-тау болып үйіліп жатыр. Бұл құбырлар ауыл шаруашылығы алқаптарын суландыруда таптырмайтынды. Қала үйлеріндегі су, бу құбырларындағы аталмыш пластик бұйымдар темірге қарағанда екі-үш есе төзімді. Пластик құбырлар 50-60 жылға дейін шірімейді, оны алмастыру да онша қиындық туғызбайды.
– Зауыттың ашылғанына бір жыл. Ал «Бәтуа» серіктестігінің құрылғанына үш жыл. Серіктестік басшылары 3 миллиард теңге өз қаржыларын салып, Сарытеректе соя өсіріп жатыр, түрлі ғимараттарды салып, көптеген техника сатып алды. Сояның бір тоннасы 80-100 мың теңге тұрады. 2012 жылы 2400 гектарға соя егіп, гектарынан 20 центнер өнім алдық. Демек, кеткен қаржы еселеніп қайтады деген сөз. Қазір пластик құбырлар зауытында 49 адам жұмыс істесе, ал соя өсірумен жаз кезінде 300-ге тарта адам айналысады, – дейді «Бәтуа» серіктестігінің пластикалық зауыттағы үйлестірушісі Ербосын Қашақов.
Қазір далада 630 мм. 5 мың метр, 315 мм. 3 мың метр құбыр әзір тұр. Құбырларға деген сұраныс үлкен. Бірақ біз соя өсіретін алқапқа құбырларды тартып, тамшылатып суаруды жүзеге асырып жатырмыз. Өзіміздің қажеттілігімізді орындаған соң сатып, пайда табу да ойда бар. Біздің жоба индустрияландыру картасына енгізілген. Үкіметтен 730 миллион теңге алған соң басқа да ірі жобаларды жүзеге асыру ойда бар. Ең бастысы, шалғайдағы Үржар ауданы тұрғындарын жұмыспен қамтамасыз етсек, абырой емес пе, дейді Ербосын Алдасүгірұлы.
Пластикалық зауытта еңбек етіп жатқан Мақаншы ауылының тұрғындары Берік Қалқаров, Нұрдәулет Ордашев,Тұрлан Салиев, тағы басқалар жалақыны уақтылы алып тұратындарын, мамандыққа төселіп алғандарын, алдағы уақытта тағы да жұмыс күшінің қажет болатынын айтады.
Оңдасын ЕЛУБАЙ,
«Егемен Қазақстан».
Шығыс Қазақстан облысы,
Үржар ауданы.
Суретті түсірген автор.
