«Ашық есік» күнінде өзекті мәселелер айтылды

Сенбі, 4 мамыр 2013 1:59

«Қазагрофинанс» ак­цио­нерлік қоғамы орталық ап­па­ратының мамандары ауыл шаруашылығы тауарларын өн­дірушілер үшін «ашық есік күнін» өткізді. Еліміздің ірі астықты және мал, құс шаруа­шылықтарын дамытуда да мүмкіндігі жоғары өңір бол­ған­дықтан «Қазагрофинанс» акцио­нерлік қоғамы «ашық есік күнін» өткізуге Ақмола мен Солтүстік Қазақстан облыстарынан кейін үшінші болып Қостанай облысына атбасын бұрды.

Сенбі, 4 мамыр 2013 1:59

«Қазагрофинанс» ак­цио­нерлік қоғамы орталық ап­па­ратының мамандары ауыл шаруашылығы тауарларын өн­дірушілер үшін «ашық есік күнін» өткізді. Еліміздің ірі астықты және мал, құс шаруа­шылықтарын дамытуда да мүмкіндігі жоғары өңір бол­ған­дықтан «Қазагрофинанс» акцио­нерлік қоғамы «ашық есік күнін» өткізуге Ақмола мен Солтүстік Қазақстан облыстарынан кейін үшінші болып Қостанай облысына атбасын бұрды. Оған қар­жы алып, үлкен жобаларды жүзеге асырып жатқан немесе «Қазагрофинанс» арқылы техника паркін жаңартқандар жиналды. Көптеген мәселелер осында талқыланды. Бүгінде ауыл шаруа­шылығы тауарларын өнді­ру­шілер несиені 6 пайыз ғана үстемемен беретін осы қаржы институтының тиімділігін сезініп отыр. Қазір ауыл шаруашылығы саласын серпінді дамыту техникасыз, асыл тұқымды мал­сыз және озық технологиясыз мүмкін емес. Оларға қаржы арқылы ғана қол жеткізе алатыны тағы белгілі. Республика Үкіметі бекіткен он төрт бағытта жұмыс істейтін «Қазагрофинанс» іске кіріскелі Қос­танай облысында да 8,1 миллиард тең­ге­ге қаржыландырылған ірі инно­­ва­циялық-инвестициялық жо­ба­лар жүзеге асып келеді. Мы­салы, сатылап жүзеге асқан «Сад­чиков», «Сарыағаш» тауарлы сүт фермаларын, құс фабрикаларын, тағы басқа шаруашылықтарды тізуге болады. Елімізде «Қаз­аг­рофинанс» қаржысымен шетелден әкелінген асыл тұқымды ірі қараның қомақты үлесі Қостанай облысына тиесілі. Ол барлық көлемнің 25 пайызын­а ие, яғни 4018 бас ірі қара әкелінген. Шетелге астық пен ет, құс етін экспорттау мәселесін де осындай шаруашылықтар шешеді. Қар­жыландырудың басты мақсаты да осы. «Қазагрофинанс» ак­цио­нерлік қоғамы орталық ап­па­ратының басшылары мен жетекші мамандарының диқандар мен малшыларға, яғни өздерінің клиент­­теріне жақын келіп, оларды сұхбатқа тартуының себебі бар. Міне, солтүстік астықты ау­дандарда көктемгі дала жұ­мыстары басталады. Сапалы астық өсіру үшін озық технология керектігі айтуды қажет етпейтін аксиомаға айналған. Озық технология – озық техниканы қажет етеді. Ертеңгі жай­қалған егін, алтын астық бүгін­гі жер өңдеуден басталады. «Қазагрофинансқа» жыл басынан бері облыстан барлығы 1,5 миллиард теңгені құрайтын 157 өтініш түсуі осының айғағы десек болады. Дегенмен, қаржы алатындарды ойлантатын мәселелер де жоқ емес. Сондықтан, «ашық есікте» қаржыгер мамандар ауыл шаруашылығы тауарларын өндірушілердің – клиенттерінің пікірін, ұсыныстарын тыңдады, олармен ашық сұхбат болды. «Қазагрофинанс» қызметін пайдаланушылар тарапынан, ең алдымен, несие алу үшін ұсынатын құжаттар тізімінің көптігі жө­нін­дегі пікірлер жиі айтылды. Лизингтік негізде алынған ауыл шаруашылығы техникаларына оны жеткізуші компаниялар тарапынан кепілдік қызмет көрсетудің жоқтығы шаруалар үшін жыл өткен сайын өткірленіп бара жатқан мәселе. Шетелден алып кел­ген техникалардың қосалқы бөл­шектерін табу да оңай емес әрі қымбат, сынса оны жөндеп, іске қосу тіпті қиын. Ал науқандық жұмыс кезінде әр сағат қымбат.

– Әрине, ауыл шаруашылығы тауарларын өндірушілер тарапынан көтеріліп отырған дұрыс мәселе. Бірақ бұл қаржы біздің құзырымызға жатпайды. Сонда да өзіміздің мүм­кіндігімізді пайдаланып, лизингтік компаниялармен осы жөнінде дөңгелек үстелдер өткізіп, біздің клиенттер айтқан мәселелердің нақты тізімін жасап, олардың назарына ұсыну керек. Бұл орайдағы әңгіменің техника жеткізуші қандай ком­па­нияға, қандай техникаға, оның қандай бөлшегіне қатысты екенін нақтылаған дұрыс. Астық өсіретін солтүстік аймақтардағы «Қазагрофинанспен» жұмыс істеп отырған 350 заңды тұлға үшін мұндай істің шешімін табуы үлкен жетістік болады, – деді «Қазагрофинанс» акционерлік қоғамының басқарма директоры Зауреш Шокуманова.

Зауреш Нығметқызы мұн­дай мәселелер алдағы уақыт­та жеткізуші компания­лар­мен келісім-шарт жасамай тұ­рып шешілетіндігінен хабар­дар етті және олардың техни­ка­лар­ға кепілдік қызмет көр­сету мәселесі «Нұр Отан» ха­лық­тық-де­мократиялық партиясы тарапынан да бақыланатын бо­лады. «Ашық есік күні» «Қаз­агрофинанс» жетекшілері мен мамандары және ауыл шаруашылығы тауарларын өндірушілер көктемгі дала жұ­мыс­тарына дайындық, Қос­танай облысындағы ауыл шаруа­шылығы кешенін инвестициялау, несиенің үстеме пайызын азайту, субсидиялау, шетелден техника әкелу мен оған салынатын салық негіздері және асыл тұқымды мал әкелу мен оның ауруларына қатысты жағдайлар туралы мәселелерді ортаға салды. Сондай-ақ, «ашық есік» аясында қаржыгерлер журналистермен баспасөз мәс­лихатын өткізіп, олардың көптеген сауалдарына жауап берді. «Қаз­аг­ро­финанс» акционерлік қоғамының өзге қар­жыландыру институттары­нан айыр­машылығы туралы сауал­ға да жауап алынды. Әри­не, шаруашылықтарға берген қар­жы­ның жылдық үстемесінің төмен­дігі басты артықшылықтың бірі екенінде дау жоқ. Сонымен қа­тар, қаржыландырылған жо­ба­ның аяғынан тік тұрып кетуі­не «Қазагрофинанс» мүд­де­лі бо­лып отырады. Оның ке­ңес­тік, яғни сарапшылық тобы­на облыстық әкімдіктің, «Нұр Отан» партиясының және мәс­ли­­хат­тар өкілдерінің енгізілуі оның экономиканың, сол арқылы мемлекеттің дамуын алдыңғы орынға қоятынын көрсетеді.

Нәзира ЖӘРІМБЕТОВА,

«Егемен Қазақстан».

ҚОСТАНАЙ.