Ауыл шаруашылығындағы зиянкестермен күрес мәселесі бойынша тиісті министрліктің Мемлекеттік инспекция комитеті аумақтық инспекция басшысы Еркебұлан Бекжанов өңірде ерекше қауіпті шегіртке зиянкестеріне қарсы 121 471 гектар жерге химиялық өңдеу жұмыстарын жүргізу жоспарланғанын айтады. Бүгінде қажетті химикаттар аудандарға толықтай жеткізіліп берілген екен. Техникалар да дайын. Облыс аумағында қолайлы фитосанитариялық ахуалды қамтамасыз ету мақсатында арнайы жұмыс тобы құрылған.
– Зиянкестерге қарсы химиялық өңдеу жұмыстары 7 маусымда басталды. Жаңақорған, Қармақшы аудандарында химиялық өңдеу жұмыстары толығымен аяқталды. Қалған аудандар бойынша 77 128 гектар жерге химиялық өңдеу жүргізілді. Аталған жұмыстар шілде айында аяқталады, – деді ол.
Осы мәселе бойынша облыстық ауыл шаруашылығы басқармасының басшысы Бахыт Жаханов биыл барлығы 74 184 гектар жерге химиялық өңдеу жұмыстарын жүргізу жоспарланып, жергілікті бюджеттен 91 млн теңге қаржы қаралғанын айтты. Ауылшаруашылық дақылдарын күтіп-баптау және арамшөптерге қарсы өңдеу жұмыстарын жүргізу үшін 52,9 мың литр гербицид сатып алынған.
Ал ветеринария саласында атқарылып жатқан жұмыстар туралы облыстық ветеринария басқармасының басшысы Ерсұлтан Әпетовтің айтуынша, бүгінде облысқа эпизоотиялық ахуал тұрақтылығын сақтау мақсатында аса қауіпті 14 түрлі жұқпалы ауруларға қарсы бөлінген ветеринариялық препараттардың 99,9 пайызы жеткізілген екен. Облыстық бюджеттен бөлінген 205,4 млн теңге қаржыға жануарлардың 6 түрлі эзоотиялық ауруларына қарсы ветеринариялық препараттар сатып алынған. Қазір алдын ала егу жоспары толығымен орындалған.
Басқарма басшысы ауыл әкімдері, аудандық тиісті сала басшыларының мал санағын жүйелі жүргізбей отырғанын айтты. Конго-Қырым геморрагиялық безгегінің алдын алу жұмыстары бойынша атқарылған шараларды пысықтаған оның айтуынша, биыл эпидемиологиялық маусымда аталған ауру 123 елдімекенде таралуы мүмкін екені анықталған.
– Басқарма осындай елді мекендерде мал қоралардың механикалық тазалануына зерттеу жұмыстарын жүргізіп, біраз кемшіліктерді анықтады, – дейді басқарма басшысы. Сол себепті кеңейтілген семинар кеңес ұйымдастырылғанын, сондай-ақ елді мекендерде тұрмысы төмен отбасылардың мал қораларын механикалық тазалау жұмыстарына көмек көрсетілгенін айтты. Облыста құжатсыз мал тасымалдау дерегі де анықталған. Осыған орай, облыс әкімі құзырлы орындармен бірлесіп, аналық малды сыртқа шығаруға шектеу қоюды тапсырды.
Бүгінгі пайдасын ойлап, аналық малдың бәрін сыртқа өткізген кәсіпкер ертең қалай тіршілік етеді? Малдың саны қалай көбейеді? Ертеңін ойламаған кәсіпкерлерге түсіндіру жұмысын жүргізу керек.
Қазақ сақарасы малға бай дегенімізбен әп-сәтте босап қалуы да оңай. Биыл Өзбекстан мен Иранға мал сатып, қалтасына сытырлаған пішен ақша біткен делдалдар жыл ортасында Қазақстанның түкпір түкпірлерін аралап кеткен-ді. Олар малдылардың отар-отар қой, табын-табын сиыр, үйір-үйір жылқысынан бөлек, ауылдағы ағайынның ілдалдалап асырап отырған бірер баспағын да сатып алып, көрші мемлекеттерге сатып жіберді. Кеденшілерден білгеніміз, Өзбекстан жаққа күн сайын мыңдаған мал тиеген жүк машиналары өткен. Мемлекет мал алуға жеңіл несие бөлгендіктен, ала топылы ағайындар аз ғана уақытта қораларын төрт түлікке толтырып алды. Қозыға дейін әкетті. Соның салдарынан солтүстік облыстардың базарында ұсақ мал басы азайды. Абырой болғанда, көрші мемлекетте несиелендіру тоқтап, даламыз босап қалмады. Бұл ретте кешігіп болса да Ауыл шаруашылығы министрлігі малды сыртқа сатуға уақытша тыйым салды.
Төрт түліктен пайда көру керек. Бірақ жаппай сатылымнан емес. Мемлекеттік бағдарламалар арқылы сырттан асыл тұқымды мал әкеліп, мыңғыртып көбейткеннен кейін ретімен саудаға шығаруға болады. Қайда пұлдаймын дейтін емес, күншығыс елінің бір қаласымен-ақ алыс-беріс жасаса да ешқашан ұтылмайды.
Қызылорда облысы
