Ерекше серпін
Бейсенбі, 30 мамыр 2013 2:11
«ҚазАгро» АҚ 1 млрд. АҚШ долларына еурооблигация шығарылымын орналастырды
2013 жылдың 17 мамырында «ҚазАгро» ұлттық басқарушы холдингі» АҚ 10 жылдық мерзімге жылдық 4,625 пайыздық мөлшерлемемен 1 млрд. АҚШ долларына еурооблигация шығарылымын алғаш рет орналастырды. Транзакцияның бірлескен букраннерлері – HSBC, JP Morgan, ал бағалы қағаздарды ішкі нарыққа ұсыну «АТФ-Қаржының» көмегімен іске асырылды. Ағымдағы жылғы мамыр айының ортасында «ҚазАгро» АҚ өкілдері АҚШ,
Бейсенбі, 30 мамыр 2013 2:11
«ҚазАгро» АҚ 1 млрд. АҚШ долларына еурооблигация шығарылымын орналастырды
2013 жылдың 17 мамырында «ҚазАгро» ұлттық басқарушы холдингі» АҚ 10 жылдық мерзімге жылдық 4,625 пайыздық мөлшерлемемен 1 млрд. АҚШ долларына еурооблигация шығарылымын алғаш рет орналастырды. Транзакцияның бірлескен букраннерлері – HSBC, JP Morgan, ал бағалы қағаздарды ішкі нарыққа ұсыну «АТФ-Қаржының» көмегімен іске асырылды. Ағымдағы жылғы мамыр айының ортасында «ҚазАгро» АҚ өкілдері АҚШ, Ұлыбритания және Алматыдағы негізгі әлемдік институттық инвесторлармен бірқатар кездесулер өткізген болатын. Солардың нәтижесінде ҚазАгроның несиелік сапасы жөнінде жағымды ой-пікірлер қалыптасты. Ал, қалыптасқан қолайлы нарықтық ахуал мен дүниежүзілік сарапшы-мамандардың жағымды пікірі бағалы қағаздарды орналастыру мерзімін тездетуге мүмкіндік туғызды.
Айта кетелік, 17 мамырда жарияланған шығарылымның бағалық параметрлері институттық инвесторлардың арасында айтарлықтай қызығушылық туғызды. Оған қоса, 200-ден астам инвестордан түскен тапсырыстардың ақтық кітабының көлемі 3,3 млрд. АҚШ долларын құрады. Бұл көрсеткіш ҚазАгро ұлттық басқарушы холдингі» АҚ-тың соңғы айлардағы табысты құжаттамалық және маркетингтік дайындық жұмыстарының тікелей нәтижесі деуге болады. Транзакция сол күні 4,625 пайыз баға диапазонында жабылды.
Аталған келісім бағалы қағаз айналымының осындай ұзақ мерзімге қазақстандық эмитенттің құны жағынан рекордтық төмен қарыздық шығарылымын айқындап берді. Сонымен қатар, ҚазАгроның бұл бағалы қағаздары елімізде тұңғыш рет қаржылық, мұнай-газ, энергетикалық және металлургиялық емес секторлардан шығарылып отыр, сондай-ақ, ол экономикамыздың ауыл шаруашылығы және азық-түлік салаларының басқа да әлеуетті эмитенттерінің болашағына айтарлықтай жағымды әсер етері сөзсіз. Қуатты компанияның бағалы қағаздар шығарудағы қомақты табысы Қазақстанның басқа да квазимемлекеттік эмитенттерінің қатарында холдингтің алдыңғы қатарлы қарыз алушы ретіндегі мәртебесін айқындап берді. Сондай-ақ, бұл ҚазАгроның жаһандық капиталдар нарығындағы беделі мен мәртебесін нығайта түсері даусыз.
«Біз холдингтің еурооблигацияларын алғаш рет сәтті орналастырғанымызға қанағаттанамыз, деп мәлімдеді бағалы қағаздарды орналастыруға қатысты түсінік берген «ҚазАгро» ұлттық басқарушы холдингі» АҚ басқарма төрағасы Дулат Айтжанов. Біздің қызметіміздің ерекшелігіне және мемлекеттік маңыздылығына қарай, осы жобамен жүргізілген дайындық жұмыстарының басынан бастап-ақ ҚазАгроның міндеті ұзақ мерзімге және ең төменгі мөлшерлеме бойынша қомақты қаржы тарту болатын. Ал, бағалы қағаздарды орналастырудан түскен қаражат «2020 жылға дейінгі агроөнеркәсіптік даму бағдарламасы» аясындағы басымдық берілген ұзақ мерзімді жобаларды жүзеге асыруға жұмсалады».
Аймақтар бойынша инвесторлар базасы былайша бөлінеді: Ұлыбритания – 35%, АҚШ – 33%, Қазақстан – 13%, құрлықтық Еуропа – 15% және басқалары – 4%. Мәміленің негізгі талаптары мыналар: Эмитент: «ҚазАгро» ұлттық басқарушы холдингі» АҚ, шығарылым рейтингтері: ВВВ+ (тұрақты болжам), ВВВ (тұрақты болжам), берешек түрі: қамтамасыз етілмеген, шығарылымның форматы: Reg S/144A, қарызды қайтару мерзімі: 24 мамыр, 2023 ж (Т+5), шығарылым көлемі: 1,000 млн. АҚШ доллары, купон: 4,625 пайыз, орналастыру бағасы: 100,00 пайыз, листинг: Ирландия және Қазақстан қор биржалары.
«BСC Invest» АҚ-тың басқарма төрағасының орынбасары, Листингтік компанияның төрағасы, Қазақстан қор биржасы Биржалық кеңесінің мүшесі Виктор Кышпанаковтың пікірінше, ҚазАгро сияқты эмитенттің мұндай бағалы қағаздарды шығарып, қор нарығына орналастыруы айрықша әрі маңызды оқиға болып табылады. «Қазіргідей нарықта қаржы құралдарына қатты тапшылық қалыптасқан жағдайда, мұндай бірінші сатыдағы эмитенттердің нарыққа көптеп шығарылуы жалпы еліміздің қор нарығының дамуына жағымды жағынан әсер ететіні сөзсіз, дейді Виктор Алексеевич. Ал, «BBC Invest» компаниясы ҚазАгро сияқты сенімді компанияға брокерлік және іскерлік қызмет көрсететінін мақтан тұтады және алдағы уақытта осы бағытта ынтымақтастық қарым-қатынасымызды жалғастыруға әзірміз. Атап айтарлығы, бағалы қағаздарды қор нарығына шығару аграрлық салада тұңғыш рет жүзеге асырылуда». Беделді сарапшының айтуынша, Қазақстанның аграрлық компаниясының еурооблигацияларды қор нарығына табысты шығаруының өзі «ҚазАгро» арқылы еліміздің аграрлық секторына деген шетелдік нивесторлардың зор сенім білдіргенін көрсетеді. – Бұған дейін бізде ірі шығарылымдар болды, дейді Виктор Кышпанаков. – Алайда, ішкі нарықта мұндай бағалы қағаздарды шығару және қор нарығына орналастыру – ерекше бір серпін болып саналады. Ал, еурооблигацияларды сыртқы нарыққа шығару және орналастыру басқа эмитенттерге игі үлгі болары анық.
Әмірлан ӘЛІМЖАН.
