Әйтсе де ұдайы күтім жасалып, суару талаптары дұрыс сақталған жағдайда қатаң табиғи факторларға қарамастан ағаштардың жақсы өсетіні талас туғызбайды. Сондықтан биыл Ақтөбе қаласында жасыл желекті суарудың жаңа әдісін жүзеге асыру қолға алынды. Израиль елінен жеткізілген жаңа технология тал-теректер мен саябақтарды тамшылатып суару әдісіне негізделуімен ерекшеленеді. Бұл істі облыс орталығындағы «КХ Эльмира» кәсіпорны қолға алып отыр.
Жаңа тәсілдің бұған дейін қолданылып келген көлдетіп суару жүйесінен артықшылығы көп. Жоба жетекшілерінің айтуынша, 70 метр тереңдікте орнатылған сорғы автоматты түрде іске қосылып, ағаштың және көгалдағы балауса мен гүлзарлардың уақтылы сумен қамтылуына мүмкіндік береді. Бұл су таситын көліктердің көмегімен суарғаннан гөрі әлдеқайда тиімді тәсіл.
Израильдік әдіске бағытталған технологиялар ағаштардың тамырына күн сайын 100 текше метрден астам су сіңіре алады. Ақтөбе қаласында алдағы уақытта осы тамшылатып суару әдісіне арқа сүйейтін сегіз жобаны іске асыру көзделген. Оның толықтай жүзеге асуы жаңа суару тәсілінің алғашқы нәтижелеріне байланысты болмақ.
Осы ретте Ақтөбе қаласында орын алып жүрген кейбір келеңсіздіктерді айта кетудің де орайы келіп тұрғандай. Мәселен, күз бен көктем айларында өкілетті ұйымдар тарапынан пәленбай мың түп тал-терек егілді деген ақпарат пен рапорттар беріледі. Алайда жас өскіндердің өсуіне тиісті күтім жасалмай, кейін қурап қалады. Мұндай құр дабыра жағдайында Ақтөбеде жасыл желектің жайқалып өсе қоюы екіталай. Ағаштарды еккеннен кейін оны дер кезінде суару мен күтіп-баптау керек. Қала тұрғындарының жаппай тал-терек өсіру мәдениетін бойларына сіңіре алмай жүргені де қынжылтпай қоймайды.
АҚТӨБЕ
