Жақында ғана «Егеменде» жарияланған «Қолдан жасалған билет тапшылығы» атты мақалада жолаушылар пойыздарына билет алудың қиындығы жан-жақты жазылып, бұл мәселеге Мемлекет басшысы Қасым-Жомарт Тоқаев назар аударып, мақаланы туиттердегі парақшасында бөлісе отырып, Үкіметке билет сату жүйесіндегі қолдан жасалған тапшылықты жою жөнінде тапсырма берген болатын.
Міне, Индустрия және инфрақұрылымдық даму министрлігінің бұл қадамы Президент тапсырмасын орындау бастамаларының бірі болса керек.
«Қазіргі уақытта билеттерді заңсыз қайта сату «Әкімшілік құқық бұзушылық туралы» кодекстің 449-бабындағы «Қоғамдық орындарда тиісу» бойынша ғана әкімшілік жауапкершілікті көздейді. Басқа жауапкершілік әзірше жоқ», делінген ресми хабарламада. Бұл бапта «Қоғамдық орындарда заттарды өзгеше тәсілмен сатып алу, сату, айырбастау немесе иемдену мақсатында кәсіпкерлік субъектісі болып табылмайтын адам жасаған, сондай-ақ бал ашу, қайыршылық, сексуалдық сипатта қызметтер көрсету не өзге де қызметтер көрсетуді күштеп таңу мақсатында тиісу, яғни мазалап өтініш білдіру – жеке тұлғаларға ескерту жасауға не бес айлық есептік көрсеткіш мөлшерінде айыппұл салуға әкеп соғады» делініп, әрекет бір жылдың ішінде қайталанған жағдайдың өзінде он айлық есептік көрсеткіш мөлшерінде айыппұл салуға не бес тәулікке дейінгі мерзімге әкімшілік қамаққа алу жазасымен ғана шектеледі.
Министрліктің хабарламасында қазақстандық тасымалдаушыларға тұрақты негізде жолаушылар вагондары паркін жаңарту үшін жағдай жасалып жатқаны айтылған.
Ресми мәлімдеме: «Бұдан басқа тасымалдаушылар жыл сайын жазғы кезеңде негізгі бағыттар бойынша қосымша пойыздар санын қосады. Сонымен қатар жолаушылар ағымының ұлғаюына байланысты негізгі бағыттар бойынша билеттердің жасанды тапшылығы байқалады, бұл ретте оларды сату бойынша заңсыз делдалдар жандана түседі. Билеттердің заңсыз сатылуына тосқауыл қою үшін осы жылдың наурыз айында ИИДМ, Сыбайлас жемқорлыққа қарсы іс-қимыл агенттігі және «Қазақстан темір жолы» Ұлттық компаниясы» АҚ арасында теміржол тасымалдауы саласында тұрмыстық сыбайлас жемқорлық мәселелерін болдырмау көзделген жол картасына қол қойылды. Осы құжатқа сәйкес «ҚТЖ» ҰК» АҚ билеттерді сату және жолаушыларды пойызға отырғызу кезінде заңсыз іс-қимылдар жасауды бақылау және шектеу әдістерін қарастыра отырып, билет сататын «Mobius» жүйесін жетілдіру қажет деп тапты. Алайда билеттерді заңсыз сату фактілері жалғасуда» деп толықтырыла түскен.
Сонымен бірге 28 шілде күні ИИДМ Көлік комитеті қоғамдық ұйымдармен және құқық қорғау органдарымен бірлесіп өткізген рейдтер кезінде Шымкент, Алматы, Нұр-Сұлтан, Атырау және Тараз қалаларының вокзалдарында билеттерді жоғары бағамен ұсынатын, сондай-ақ қажетті пойызға билетсіз-ақ отырғызуға уәде берген делдалдар болғаны туралы деректер анықталған. Осыған байланысты 6 адам ӘҚБтК-нің 449-бабы негізінде «Қоғамдық орындарда тиісу» бойынша әкімшілік жауапкершілікке тартылған.
Анықталған фактілер бойынша министрлік «ҚТЖ» ҰК» АҚ «Жолаушылар тасымалы» АҚ мен Магистралдық желі дирекциясының лауазымды тұлғаларына қатысты шаралар қабылдау қажеттігін, сондай-ақ билеттерді заңсыз сатуға қатысқан жеке билет кассаларымен шартты бұзу қажеттігін атап өтті.
