Қауіпсіздік және қоғамдық тәртіп сақшыларының қырағылығы мен әбжілдігі арқасында Маңғыстаудан төрт ірі ұйымдасқан топ қылмыскерлері тұзаққа түсті. Құқық қорғау және қауіпсіздік орындарының назарына адам өлтіру мақсатымен ұрлау, атыс қару-жарақтары мен есірткіні сақтау, біреуді бопсалау бойынша күдікке ілінген төрт қылмыстық топ мүшелерінің біреулері облыстың аудандары мен жалдамалы пәтерлерден, енді біреулері жол үстінде қолға түсті. Олардың, яғни ұйымдасқан қылмыстық топ мүшелерінің бірқатар ауыр және аса ауыр қылмыстарды жасауға, оның ішінде адам өлтіруге және ұрлауға, ақша қаражатын бопсалауға қатыстары бар болып шықты. Сондай-ақ құзырлы орындар таратқан ақпаратқа қарағанда, ұйымдасқан қылмыстық топ мүшелері қаруланған, өзара ұйымшыл және дөрекілігімен ерекшеленген. Тұрғындардың өмірі мен денсаулығының қауіпсіздігін қамтамасыз ету мақсатында арнайы операция жүргізуге Ұлттық қауіпсіздік комитетінің және Ішкі істер органдарының арнайы жасақ күштері мен құралдары тартылып, 29 шілде күні таңғы сағат 6 шамасында басталған шара барысында түске дейін 20 адам ұсталды. Жалпы сол кезде қолға түскендерден есірткі мен көптеген қару тәркіленіп, 20-дан астам күдікті тергеу орындарына жеткізілсе, 16 адамға қатысты бұлтартпау шарасы қолданылған.
Аталған оқиғаға орай Қазақстан Республикасы Бас прокуратурасы азаматтарды әлеуметтік желілерде тарауы мүмкін арандатушылыққа ермеуге және үрейленбеуге, сондай-ақ заңсыз әрекеттерге бармауға шақырып, жағдайдың құқық қорғау органдарының толық бақылауында екендігін, сондай-ақ арнайы операцияның қорытындысы жұртшылық назарына жеткізілетіндігін ескертті.
Қылмыс пен қылмыскер қоғамға қауіпті, заң алдында жауапты. Енді қолға түскендерге заң алдында жауап беріп, өз кінәларына сай жазаларын тарту қалды. Бұлар бұған дейін беті ашылмай қалған талай қылмыстар мен суда саны, құмда ізі байқалмай кеткен небір қылмыстардың «төл авторлары» болар, кім білген?!
Гүлайым ШЫНТЕМІРҚЫЗЫ,
«Egemen Qazaqstan»
Маңғыстау облысы
