Алматы қаласын дамытуға бағытталған кеңесте талқыланған негізгі мәселелер қатарында қолжетімді тұрғын үй және әлеуметтік нысандар санын көбейту, жұртшылықты тұрақты жұмыспен қамту, көлік және жол инфрақұрылымын жетілдіру, кәсіпкерлікті дамыту мен туристік саланың әлеуетін арттыру сынды маңызды тақырыптар сараланды. Үкімет басшысы қала мен облыстағы халық саны өсуінің жоғары қарқынына байланысты дамудың өзекті түйткілдерін шешіп, сол арқылы өңірдің инвестициялық тартымдылығын арттыру қажет екенін айрықша атап өтті. Ол бірлескен жобаларды іске асыру және алға жылжыту үшін Алматы мен Алматы облысының жобалық офисін құруды тапсырды.
Тұңғыш Президент – Елбасы Нұрсұлтан Назарбаев тәуелсіздіктің алтын бесігіне баланатын Алматы қаласының дамуына үлкен көңіл бөліп отырғанын, Мемлекет басшысы Қасым-Жомарт Тоқаев қала инфрақұрылымының сапасын жақсарту, қоғамдық қауіпсіздікті нығайту, көлік жүйесін, медицина мен білім беруді дамыту жөнінде нақты тапсырмалар бергенін тілге тиек еткен Үкімет басшысы, мемлекеттік органдарға Алматының ел экономикасындағы маңыздылығын атап өтіп, миллиондарды тоғыстырған мегаполистің дамуын ұдайы бақылауда ұстайтынын жеткізді. Басқосу барысында Алматы қаласының әкімі Бақытжан Сағынтаев қаланы дамыту жобалары туралы баяндады.
Премьер-Министр Алматы қаласының шеткері аудандары мен Алматы облысының іргелес аумағын дамыту күн тәртібінде тұрған маңызды мәселе екенін баса айтты. Бұл тұрғыда атқарылып жатқан ауқымды жұмыстың барлығы ел игілігі мен тұрғындардың жайлы өмірі үшін жасалған мемлекет қолдауы екенін ескерген жөн. Еске салсақ, 2019 жылы Тұңғыш Президент – Елбасы Н.Ә.Назарбаевтың тапсырмасымен ірі қалалардың шеткері аймақтарының мәселелерін шешуге жыл сайын 30 млрд теңге, оның ішінде Алматы қаласының шеткері аймақтарына 10 млрд теңге бөлінген болатын.
«Агломерация тұрғындарының тұрмыс сапасын жақсарту жөніндегі шараларды жүзеге асыру қала мен облыстың 730 мыңнан астам тұрғынын тиісті инфрақұрылыммен қамтамасыз етуге мүмкіндік береді», деді А.Мамин.
Премьер-Министр кеңес қорытындысы бойынша Қаржы және Ұлттық экономика министрліктеріне мүдделі мемлекеттік органдармен, Алматы және Алматы облысының әкімдіктерімен бірлесіп, қала маңындағы аудандарды, іргелес аумақтарды дамыту бойынша іс-шараларды уақтылы жүзеге асырудың қажетті шараларын қабылдап, қаржыландыру мәселелерін пысықтауды тапсырды.
Ел Үкіметінің басшысы «Урбанистика орталығы» мен №405 авиа жөндеу зауытында болып, Алматы қаласы құрылысының жаңа жобасымен, қаланың құрылыс индустриясын дамыту жоспарларымен танысты, сондай-ақ Құрылысшылар күніне арналған салтанатты жиынға қатысты.
Сондай-ақ Алматы қаласына жұмыс сапары барысында Премьер-Министр әйгілі Алма-Арасан бөктеріндегі Аюсай шатқалын тазартуға арналған экологиялық сенбілікке қатысып, табиғат тазалығы мен экологияға енжар қарай алмайтын ел тұрғындарына жақсы үлгі көрсетті. Қала жұртшылығын жұдырықтай жұмылдырған шараға мыңға тарта адам атсалысты. Еліміздің әр аймағында жаппай қолдау тауып жатқан «Бірге – таза Қазақстан!» экологиялық жобасы Үкімет басшысының тікелей бастамасымен жүзеге асқан болатын.
АЛМАТЫ
