Биылғы бәсекеде бес команда бақ сынады. Құрлықтық хоккей лигасына дайындық іспетті турнирге «Барыс» (Нұр-Сұлтан), «Ак Барс» (Қазан), «Нефтехимик» (Нижнекамск), «Автомобилист» (Екатеринбург) және «Салават Юлаев» (Уфа) клубтары қатысқан болатын. Тамыздың 7-11 тамыз аралығында өткен мұз үстіндегі бәсекенің ашылу салтанатына Қазақстан Президенті Қасым-Жомарт Тоқаев қатысып, «Барыс» және «Ак Барс» клубтары арасындағы ойынды тамашалады. Құрлықтық хоккей лигасының (ҚХЛ) үш дүркін жеңімпазына қарсы өткен ойында жерлестеріміз 6:1 есебімен басым түсті.
Кездесудегі алғашқы шайбаны «Барыс» сапынан 7-минутта Никита Михайлис соқты. Ал 11-минутта «Барыстың» экс-ойыншысы Мэтт Фрэттин таразы басын теңестірді. Бұл Қазан клубының матчта соғылған ең бірінші және ең соңғы шайбасы болды. Ойынның қалған бөлігінде «Барыс» хоккейшілері үстемдік құрды. Бірінші кезеңде Кирилл Панюков пен «Барыс» қатарына биыл қосылған канадалық Адам Хелевка шайба соқса, екінші 20 минутта Дастин Бойд пен Даррен Диц және Батырлан Мұратов мергендігімен көзге түсті. Осылайша «Барыс» алғашқы кездесуде ірі есеппен жеңіске жетті.
Екінші ойынын «Нефтехимик» клубына қарсы өткізіп, камбэк жасады. Кездесудің бірінші кезеңінде 1:3 есебімен жеңіліп жатқан елорда командасы 5:3 есебімен жеңісті қарсыластан жұлып алды. Бас бапкер Андрей Скабелка «Ак Барсты» ірі есеппен жеңген соң, негізгі құрамның ойыншыларына демалыс берген болатын. Сондықтан ойынның басы қонақтардың басымдығымен өтті. 23-секундта Зак Митчелл есепті ашса, артынша Павел Порядин есепті 0:2-ге жеткізді. Дегенмен Никита Михайлис 14-минутта есепті бір шайбаға қысқартты. Екінші кезеңнің 25-минутында Александр Авцин «Нефтехимиктің» үшінші шайбасын соғып кетті. Осыдан кейін «Барыс» ойында өзгеріс жасап, ойын тізгінін өз қолына алды. Ярослав Евдокимов пен Дастин Бойд бір-бірден шайба соғып есепті теңестірсе, үшінші кезеңде Бойд дубль авторы атанды. Кездесудің нүктесін Никита Клещенко қойды.
Үшінші кездесуде «Автомобилист» командасын қабылдап, аса тартысты өткен матчта «Барыс» 3:2 есебімен басым түсті. Бәсеке басталған бетте ойын тізгінін қолына алған алаң иелері бірінші кезеңде қарсылас қақпасын екі мәрте дәл көздеді. Шайба авторлары – Дмитрий Шевченко мен Ииро Пакаринен. Екінші кезеңде Никита Михайлис «Барыстың» үшінші шайбасын соғып, командасының жеңісін нақтылай түсті. Үшінші кезеңде қонақтардың екі шайба салуға шамасы жетті.
Осылайша «Барыс» соңғы ойын-
ның нәтижесіне қарамай-ақ Қазақстан Президентінің кубогын кезекті мәрте жеңіп алды. Өйткені турнир кестесінде «Барыстан» кейінгі орында тұрған екі команда да жерлестерімізден жеңілген. «Барыс» төртінші кездесуде жеңілген күннің өзінде де, жеке кездесу бойынша алда тұр. Осылайша «Барыс» алдын ала жарыс жеңімпазы атанды.
Айта кетейік, 2010 жылдан бері өткізіліп келе жатқан Президент кубогы бәсекесінде Санкт-Петербургтің СКА, Омбының «Авангард», Новокузнецкінің «Металлург», Нижнекамскінің «Нефтехимик» және Хабаровскінің «Амур» клубтары бір реттен жарыс жеңімпазы атанған.
