![Алматыда білім жүйесі қызметкерлерінің форумы өтті](/media/2019/08/19/19-08-19-01.jpg)
«Жаңа оқу жылының алдында өздеріңізбен өзекті мәселелерді талқылайтын білім саласы қызметкерлерінің форумында бас қосып отырмыз. Бүгінгі кездесудің күн тәртібіндегі мәселелер баршамызға білім берудің аса маңызды бағдарлары жөнінде жан-жақты пікір алмасуға, келешекте атқарылар мақсат-міндеттерді белсене саралап, бағамдауға мүмкіндік береді. Мұндай ашық диалог алаңы – қаланың білім беру жүйесін сапалы деңгейге көтерудің, әрі бәсекеге қабілеттілікті қалыптастырудың бірден-бір маңызды шарты. Баршамыз үшін танымы мол тәрбиешінің, үлгі тұтатын ұстаздың орны қашанда бөлек. Елбасымыз Нұрсұлтан Әбішұлы Назарбаев атап өткендей, «Білім жүйесінің жаны да, жүрегі де, тірегі де – ұстаз». Олай болса, Сіздер берген сапалы білім – жарқын болашақтың кепілі. Кез келген адам әкім, министр бола алады, ал, бірақ кез келген адам ұстаз бола алмайды. Адамдықтың қасиетін (мейірбандылық, қайырмыдылық, тәрбие секілді), - даланың қасиетін (дархандылық, кеңпейіліділік), - бабаның қасиетін (отансүйгіштік, өз тамырын, мәдениетін және рухын қастерлеу) шәкірттің жүрегіне дән қылып егетін де ұстаз. Біздің бұрынғы өткен жақсыларымыз: «Өмір теңіз болса, мұғалім оның маржаны», «Дүние дәрия болса, мұғалім оның қармағы», деп атап өтті қала басшысы.
Қоғамның алға дамуы көзі ашық, көкірегі ояу, білімді азаматтардың көптігінде екендігіне тоқталған Бақытжан Сағынтаев «Білімді ұрпақтың көп болуы, мұғалімдердің маңдай тері мен еңбегінде жатыр.Мемлекеттің қарқынды дамуы ұстаздардың білімі мен білігіне тікелей байланысты. Мұғалімнің сапалы білімінің астарында саналы ұрпақ, білікті маман, ұлтжанды азамат, белсенді қоғам, қайырымды халық, берекелі Ел жатыр.
Білімнен бөлек, ақпаратпен алысқан мына қоғамға ұстаздың тәрбиесі ауадай қажет. Өзгенің баласын өз баласындай тәрбиелеп отырған құрметті ұстаздар қауымы Сіздерге Алғыстан басқа айтарымыз жоқ. Алаштың ардақты азаматы Әлихан Бөкейхановтың: «Ұлтқа қызмет білімнен емес, әуелі мінезден», деген мінсіз сөзі бар. Ұрпақтың мінезін қалыптастыруда бізге бүгінде дарынды ұстаздар керек!», - деді әкім.
АЛМАТЫ