«Астана» Еуропа лигасының соңғы төрт ойынынан бері әр матчта ірі есеппен жеңіске жетіп келеді. Бұл жолы да БАТЭ қақпасына жауапсыз үш гол соқты. Роман Григорчук пен оның командасы ақырындап өз ойынын тауып, тұрақтылыққа үйреніп келе жатқан сияқты. Неге десеңіз, бас бапкер аталған төрт ойында да бір құрамды ойнатып жүр және 4-5 футболшы әр ойында тұрақты гол соғуда.
Матчқа дейін бірқатар футбол маманы болжағандай кездесу тең дәрежеде басталды. Дегенмен алғашқы қауіпті шабуылды БАТЭ футболшылары жасағанын айта кетейік. Кездесудің 20-минутына дейін командалар алма-кезек шабуылдап, қақпа алдында бірнеше қарбалас сәт ұйымдастырғанымен, гол соға алмады. 23-минутта оң қапталдан Рунар Сигурьонссоннан пас алған Томасов қарсыластың үш бірдей қорғаушысын алдап өтіп, айып алаңына кірмей шірене тепкен добы қақпаның «тоғыздығына» топ ете түсті. Мұндай соққыны тек БАТЭ-нің ғана емес, әлемнің ең үздік деген қақпашылары да қайтара алмас еді. Хорватиялық футболшының бұл голына футбол мамандары таңданысын білдіріп, шетелдік басылымдар жарыса жазып жатыр.
«Астана» есепте алға шыққан соң басымдықты үдете түсіп, екінші голдың арасын суытпайтын шығар деген ойда болғанбыз. Алайда БАТЭ ойыншылары қарымта шабуылға иек артып, сәт сайын Эричті мазалаумен болды. Дей тұрғанымен қорғаушыларымыз да дер кезінде орындарынан табылып, қауіптің бетін қайтарып отырды. Кездесудің бірінші таймы аяқталар тұста Юрий Логвиненко әдеттегідей баспен керемет ойнап, командасының екінші голын соқты. Нәтижелі пастың авторы – Марин Томасов екенін айта кеткен жөн. Осылайша, ойынның алғашқы таймы «Астананың» басымдығымен аяқталды.
Матчың екінші таймында Роман Григорчук шабуылшы Фирмин Мубеленің орынына Роман Мұртазаевты алаңға шығарып, тактикаға аздаған өзгеріс енгізді. Кезекті бір шабуыл сәтінде қарсылас команданың қорғаушысы өз айып алаңында Сигурьонссонды шалып құлатып, төреші 11 метрлік айып добын белгіледі. Исландиядан келген футболшы пенальтиден мүлт кетпей, таблодағы көрсеткішті еселей түсті. Есепте үш голмен алға шыққан «Астана» ойыншылары ақырындап қорғанысқа көңіл бөліп, өз қақпасына гол өткізіп алмаудың қамын ойлады. БАТЭ ойыншылары есепті қысқартуға бар күшін салғанымен, осы ойында «Астана» қақпасына гол соғу олардың маңдайына жазылмаған екен. Осылайша екі команданың плей-офф кезеңіндегі алғашқы ойыны жерлестеріміздің ірі жеңісімен аяқталды.
«Астананың» бұл жеңісі туралы бірнеше шетелдік басылым да жазуда. Мысалы Боснияның Klix.ba сайтының тілшісі Омар Типура «Астананы» Чемпиондар лигасының деңгейіндегі команда деп атады. «Бұл керемет нәтиже. Шыны керек, мен «Астананың» қарсыластан басым болатынын білдім, бірақ мұндай деңгейде деп ойлаған жоқпын. Беларусь командасы қарымта ойында камбэк туралы ойламай-ақ қойса да болады. Меніңше «Астана» топтық кезеңге шығып тұр. Жалпы қазір қазақстандық команда БАТЭ, «Лудогорец», «Сараево» және тағы басқа клубтарынан бір бас жоғары. Бұл команданы Чемпиондар лигасының деңгейінде деп есептеймін. «Астана» Еуропа лигасының топтық кезеңінен сәтті өтіп, 1/16 финалға шығатынына сенім білдіремін», дейді босниялық журналист.
Сондай-ақ Беларусьтің by.tribuna.com басылымы «БАТЭ бірнеше жылдан бері Еурокубокта соншалықты үмітсіз көрінбеген еді. Енді бір ғажайып орын алмаса, «Астанадан» басым түсу өте қиын» деген тақырыпта көлемді материал жариялаған. Мақаланың соңы былай аяқталады: «Үш жыл бұрын БАТЭ Қазақстанда «Астанадан» 0:2 есебімен жеңілген еді. Ал қарымта ойынның алғашқы таймында Ермаковичтің (сол кездегі БАТЭ-нің бас бапкері – ред) шәкірттері қалай ойнағаны естеріңізде ме? Гордейчуктің голы баршаға үміт сыйлағанымен, ғажайып оқиға болмаған еді. Бір аптадан кейін сол ғажайыптың биыл қайталанатынына сенесіз бе? Мүмкін Алексей Баганың бапкерлер құрамы жаңа тактикалық жүйе ойлап табар немесе БАТЭ-нің бейнеоператоры киінетін бөлмеде мотивациялық бейне көрсетер? Сонда ғана... Сонымен бір ғажайыптың боларына сенеміз бе?».
Расымен, футбол болжап болмайтын ойын. Қарымта матчта БАТЭ ойыншылары топтық кезеңге өту үшін барын салары анық. «Астана» ойыншылары жеңістің әсерінен тез шығып, қарымта матчта барынша сауатты ойнау керек. Әйтпесе, by.tribuna.com басылымы жазғандай Беларусь командасы бір ғажайыптың арқасында «Астананы» қапы қалдыруы әбден мүмкін.
Қос команда арасындағы жауап кездесуі 29 тамыз күні Беларусьтің Борисов қаласындағы «Борисов-Аренада» өтеді. Сондай-ақ осы жолдардың авторы да аталған стадионнан ақпарат таратып, «Астананың» топтық кезеңге өткені туралы сүйінші сұрамақ ниетте.
