Осындай ізгілікті істің бір парасы Ақмола облысының Қорғалжын ауданында өтті. Еліміз бойынша биыл Тұңғыш Президент Қоры оқушыларға мектепке қажетті 500 сөмке әзірлеп, таратты. Әрине, олардың бір бөлігі осы айтулы шара ұйымдастырылған қорғалжындық оқушыларға тиді.
Биылғы сыйлықтың жылдағыдан бір ерекшелігі – сөмке іші балалардың спорттық киімімен толықтырылған. Оған қоса, сөмкелер жарық шағылыстыратын элементтермен жабдықталған екен. Бұл ерекшелік баланың жолдан өтердегі қауіпсіздігіне аса қажет дүние. Сондай-ақ әр сөмкеге төтенше жағдай кезінде қажет қауіпсіздік жадынамасы, қалта шамы, дабыл құралы (ысқырық) салынған.
Осы шаруаның басы-қасында жүрген Қазақстанның Тұңғыш Президенті – Елбасы Қорының аға үйлестірушісі Гүлнара Ершіманова аз қамтамасыз етілген және көп балалы отбасылардан шыққан оқушыларды барынша қамту дәстүрге айналғанын жеткізді.
– Қазақстанның Тұңғыш Президенті – Елбасы Қоры соңғы 10 жыл ішінде «Мектепке жол» акциясы аясында еліміздің барлық аймақтарынан 9 мың балаға мектеп сөмкелері мен кеңсе тауарлары түрінде материалдық көмек көрсетті. Мектеп сөмкелері тек қалалар ғана емес, сонымен қатар еліміздің осы аймақтарының шалғайдағы ауылдарына да жеткізілді, – деді Г.Ершіманова.
Биыл «Мектепке жол» кең ауқымды акциясы Ақмола облысы Қорғалжын ауылында ұйымдастырылған «Ұлы дала мәдениетіндегі құстардың символикасы» атты республикалық шығармашылық фестивалі барысында ұйымдастырылды. Фестивальге Ресей Федерациясы және Қырғыз Республикасының өкілдерін қосқанда 150 бала қатысты.
Жоба – Елбасы Қорының Үкіметтік емес ұйымдарға арналған жыл сайынғы Әлеуметтік идеялар және жобалар іс-шарасының 2018 жылғы жеңімпазы. Фестиваль балалардың дүниетанымын, жастардың гуманистік тәрбиесін қалыптастыруға, ұлттық мәдениетті насихаттауға, патриоттық сезімді қалыптастыруға, балалар мен жастардың шығармашылық, интеллектуалдық, рухани, физикалық дамуына ықпал етуге бағытталған.
Қазіргі әлемдегі бұл фактор ғылым мен гуманитарлық ғылымдардың өзара әрекеттесуін арттыру-да өте маңызды.
– Әлеуметтік идеялар жәрмеңкесі басталған кезден 250 әлеуметтік жоба іске асырылды. Фестивальдің бірегейлігі балалардың экологияға назарын аударып, жастардың бойына адамгершілік сезімін сіңіру. Қазіргі заманда бұл ғылыми-жаратылыстану және гуманитарлық білімдердің ынтымақтастығының бірден бір күші, – дейді Қазақстанның Тұңғыш Президенті – Елбасы Қорының аға үйлестірушісі.
Іс-шара барысында қызықты тренингтер, түрлі семинарлар және спорттық турнирлер өтті. Қолөнер дүкенінде шеберлер қолөнер бойынша сабақ өткізді. Аудан стадионында спорттық ойындар өтті.
Сонымен қатар облыс әкімінің кубогы үшін жастар арасында спорттық туризм бойынша турнир ұйымдастырылды. Фестиваль қонақтары жергілікті бағдарлау бойынша жалпы білім алып, жарыстарға да қатысты.
Барлық сайыстардың жеңімпаздарына Алғыс хаттар мен естелік сыйлықтар табыс етілді.
