Экономика саласында шағын және орта бизнесті қолдау жүйесін «қайта жүктеу» мәселелеріне айрықша назар аударылды. Басымдық жаңа жұмыс орындарын құруы тиіс, қосымша салық түсімдерін ұлғайтатын жаңа жобаларға берілуі қажет. Сонымен қатар отбасылық шағын және микробизнестер құруды ынталандыруға, көп балалы аналарға үйде отырып жұмыс істеу мүмкіндігін беруге күш салынуы тиіс.
ШОБ-ты, әсіресе өнімділігі жоғары, экспортқа бағдарланған отандық өндірушілерді қаржылық, салықтық және әкімшілік ынталандыру шараларын жүзеге асыру қарастырылған. АӨК секторында суармалы алқаптарды ұлғайту, ауыл шаруашылығы шикізаттарын өңдеу үлесін арттыру, сондай-ақ экономикалық айналымға тарту үшін пайдаланылмай жатқан жерлерді алып қою жөніндегі жұмыстарды белсендіруге тапсырма берілді.
Президент квазимемлекеттік сектордың тиімділігін арттыру, мемлекеттік кәсіпорындар санын қысқарту, мемлекеттік сатып алу үдерістерін одан әрі жетілдіру, баға қалыптастыру, әсіресе табиғи монополиялардың қызметін және әлеуметтік маңызы бар тауарлар нарығын тәртіпке келтіру мәселелеріне айрықша тоқталды.
Азаматтар мен бизнестің рейдерлік әрекеттерден, жекелеген шенеуніктердің бейбастақтығы мен әрекетсіздігінен қорғалуын күшейтуге бағытталған заңнамалық нормалардың енгізілетінін атап өткен жөн. Нақтылық пен біркелкілік болмаған сәттердің бәрі азаматтар мен кәсіпкерлердің пайдасына шешілуі тиіс.
Әлеуметтік қамтамасыз ету саласында мүгедектерді қолдауды, балалар құқығын қорғауды күшейту, бұқаралық спортты дамыту, халықтың аз қамтылған топтары үшін баспана қолжетімділігін арттыру, әрбір елді мекендегі ең өзекті инфрақұрылымдық мәселелерді шешу маңызды бастамалар қатарында. 2020 жылы педагогтардың еңбекақысы 25 пайызға өседі, Үкімет мәдениет қызметкерлерінің еңбекақы көлемін арттыру өлшемдерін анықтайды. Үкімет пен Ұлттық банктің алдына банктердің экономиканы несиелеу деңгейін ұлғайту, тұтыну несиесі нарығында қателіктерге жол бермеу, зейнетақы активтерін басқару тиімділігін арттыру міндеттері қойылды. Мемлекет басшысы атаулы әлеуметтік көмектің әділ әрі ынталандыру жүйесін құру қажеттігіне жеке тоқталды. Бұл көмек оған шынымен мұқтаждарға ғана берілуі тиіс.
Жалпы, Президент қойған барлық міндетті табысты жүзеге асыру үшін шешім қабылдау үдерісінің мөлдірлігін арттыруға, шешімдерді қабылдау барысына халықты тарту ісіне негізгі екпін берілуі қажет. Бір мезгілде мемлекеттік қызметшілердің қойылған міндеттерге жетудегі, әсіресе инвестиция тарту, еңбек өнімділігін арттыру, шикізаттық емес экспортты ұлғайту, жаңа жұмыс орындарын ашу мәселелеріндегі жеке жауапкершілігі күшейтіледі.
Тимур Сүлейменов,
Президент Әкімшілігі басшысының орынбасары
