Мұнай-газ саласы – ұлттық экономиканың негізгі қозғаушы күші. Бұл бағытта атқарылған шаруа аз емес. Сарапшылар Қазақстанды Еуразия кеңістігіндегі газ тасымалының хабы деп бекер бағаламаса керек. Мәселен, соңғы бес жыл ішінде еліміздің 3 млн-нан астам тұрғыны көгілдір отынға қосылды. Жаңа магистралды газ құбырлары салынып, шикізат экспортынан мемлекет бюджетіне миллиардтаған қаржы түсіп жатыр дейді компания өкілдері. Аға буынмен иық тіресіп, тұрғындарды көгілдір отынмен қамтуда жастар да жемісті еңбек етіп келеді. Қазіргі таңда «ҚазТрансГаз» компаниялар тобындағы жас қызметкерлердің үлесі – 30%.
«Интергаз Орталық Азия» компаниясының бас директоры Валентин Хван бұл саланы табанды мінезге ие, еңбексүйгіш және кәсібіне адал жандар ғана таңдайтынын айтып, жастар аға буынның табысты жолын еселейтініне сенім білдірді.
– Баршаға мәлім, биылғы жыл Жастар жылы деп жарияланды. Бүгінде жас мамандар – газ саласындағы еңбек ресурсының ажырамас маңызды бөлігі. Осыны ескеріп, жас кадрларды қолдау бойынша барлық жағдайды қарастырып келеміз. Бұған осы жастар слеті дәлел. Аталған басқосу мазмұнды пікірлер, қызықты кездесулер және перспективалық идеяларды дамытуға қатысты бастамалармен есте қалады деген сенімдемін. Қолға алынған шарамыз Қазақстандағы мұнай-газ саласы мамандарының кәсіби мерекесі мен отандық мұнай өндірісінің 120 жылдығы аясында өтіп жатыр. Барлық әріптесімді шын жүректен құттықтаймын. Мұнай-газ саласының ардагерлеріне бас иіп, құрмет білдіремін. Слет қатысушыларына жұмыстары табысты болсын деп тілеймін! Игі дәстүрді жалғастырып, озық тәжірибені және бүгінгі энергияны болашақ үшін тиімді пайдаланасыздар деген үмітім басым, – деді В.Хван.
200-ге жуық жас маманның басы қосылған құрылтайда мұнай-газ саласының кәнігі шеберлері, сондай-ақ компанияның топ-менеджерлері кәсіби біліктіліктерімен бөлісіп, еңбек өнімділігін арттырудың ұтымды жолдарын көрсетті.
Әлімжан Балмұханов осы салаға 25 жасында келіпті. Жас маман табандылығы мен алғырлығы арқасында аз уақытта қатардағы қызметкерден басшылық лауазымына дейін көтерілді. Қазір ол акционерлік қоғамның Оралдағы желілік-өндірістік бөлімшесінің басшысы. Десек те оны қызметтік мансаптан бұрын бұдан да биік мұрат жетелеген. Батыс Қазақстанның тумасы күллі елімізді орталықтандырылған газға қосып, халық көгілдір отыннан таршылық көрмесе екен дейді.
– Басшылық тарапынан жастарға кәсіби тұрғыда өсу үшін жан-жақты жағдай қарастырылған. Өзім жетекшілік ететін Оралдағы желілік-өндірістік бөлімшесінде 214 қызметкер болса, соның 30%-ы жастар. Тәжірибе алмасу мақсатында шетелдік компаниялармен де әріптестік байланыс жолға қойылған. Олардың қатарында ресейлік және қытайлық мұнай-газ ұйымдары бар. «ҚазТрансГаз» компаниялар тобындағы 3 мыңнан аса жас қызметкердің атынан және жеке өз атымнан жастарға қолдау көрсетіп, қызметте өсіп-өнуге мүмкіндік берген басшыларымызға алғыс айтамыз, – деді Ә.Балмұханов
Форумның бағдарламасына сәйкес панельдік отырыстар, шеберлік сағаттары, интерактивті ойындар, сол секілді тимбилдинг ұйымдастырылды. Әсіресе шеберлік сағаты қатысушылардың көңілінен шыққаны байқалды. Себебі осы жиынға орай әйгілі бизнес-жаттықтырушы, адами ресурсты тиімді дамытудың маманы Андрей Левченко арнайы шақырылды. Танымал ментор human resources бағытындағы өзекті мәселелерді қаузап, қызметте ілгерілеудің оңтайлы жолдарын ұсынды.
Ал «Галстуксыз көшбасшы» панельдік сессиясында жас мамандар жетекші менеджерлермен емін-еркін пікір алмасуға мүмкіндік алды. Бұдан бөлек «Инновациялар мен стартаптар» сессиясы шеңберінде қатысушылар озық үлгідегі 9 авторлық жобаны ұсынды. Олардың үздіктерін арнайы комиссия анықтайды. Жеңімпаздардың жұмысы «ҚазТрансГаз» компаниясының Ғылыми-техникалық кеңесіне ұсынылып, өндіріске енгізіледі деп жоспарлануда.
