Осы орайда үш ауысымды мектептерді жою мәселесі бүгінде Ақтөбе облысында өткір күйінде тұрғанын атап өту керек. Таяуда бұл мәселе облыстық мәслихаттың әлеуметтік-мәдени даму жөніндегі тұрақты комиссиясының кеңейтілген мәжілісінде талқыланды. Осы отырыста Облыстық білім басқармасы басшысының міндетін атқарушы Гүлназ Сүлейменова облыста үш ауысымда оқытатын 13 мектеп бар екенін мәлімдеді. Бір өңір үшін мұны аз деуге болмайды.
Сала жетекшісінің айтуынша, биыл үш ауысыммен жұмыс істейтін жеті мектептің мәселесі өз шешімін таппақ. Яғни, алға қойылған жұмыс жоспары бойынша аталған мектептердегі оқу үдерісі екі ауысымға көшірілмек. Қалған алтауына келсек, тұрақты комиссияның отырысында бұл сауалдардың жауабы айтылмай қалды.
Ақтөбе табиғи өсім тұрғысынан, сондай-ақ сыртқы және ішкі көші-қон есебінен жыл сайын тұрғындар саны өсіп келе жатқан өңір. Соның ішінде өткен жылдар мен кейінгі кезеңде де облыспен шекаралас қоныстанған Өзбекстанның Қарақалпақстан Республикасынан Ақтөбеге қоныс аударушылар легі үзіліп көрген емес. Мұндай жайт өз кезегінде облыс орталығындағы жалпы білім беретін мектептердің жүктемесін көтеріп, күрделендіріп жіберетіні тәжірибеде жиі байқалып жүр.
Осындай қауіп алдағы оқу жылында да байқалатын сыңайлы. Атап айтқанда, қазіргі кезде Ақтөбе қаласындағы №63, №64 және №68 мектептердің үш ауысымдық режімге көшу тәртібі анық байқалып отыр. Яғни, бүгінгі ықтималдық пен болжам ертеңгі нақты көрініске айналып кетуі әбден мүмкін.
Дегенмен, бір жылға қоян терісі де шыдайды дегендей, бір жылға оқушылар мен мектеп ұжымдары шыдап, төзіп көрер. Осы аралықта жергілікті атқарушы органдар мен Білім және ғылым министрлігі тарапынан қосымша жаңа мектептер құрылыстары шұғыл жобаланғаны жөн деп санаймыз. Тағы бір жол – жүктемесі орташа мектептерге үш ауысымдық мектепте оқитын оқушыларды ауыстыру болмақ. Сондай-ақ аталған санаттағы мектептердің жанынан қосымша құрылыс салуды қолға алу ісі де түйінді тарқатудың бір жолы болмақ.
Бүгінгі таңда облыс аумағында республикалық және жергілікті бюджет есебінен 6470 орынға арналған 21 мектептің құрылысы жүргізілуде. Оның 15-і биылғы жылдың аяғына дейін пайдалануға берілмек. Мұндай жағымды жағдай үш ауысымдағы мектептің азая түсуіне ықпалын тигізері анық. Осы орайда облыста үш ауысымды мектептерге қоса апатты жағдайдағы үш мектеп бар екенін де айта кеткен жөн.
Мұның шешімі қандай болар екен деген мәселеге келсек, аталған үш мектептің біреуін биылғы жылдың соңына дейін жою белгіленген. Қалған екеуі жаңадан тұрғызылатын мектеп ғимараттары және күрделі жөндеу жүргізіліп жатқан мектептер есебінен жойылмақ. Қазіргі кезде облыстағы 33 білім беру нысанына жай және күрделі жөндеулер жүргізіліп жатқанын ескерсек, оның шешімі табылатыны талассыз. Бұл үшін облыс бюджетінен 845 млн теңге бөлінген.
Президенттің Тамыз кеңесінде өкілетті органдарға қойған тапсырмасының бірі – шағын жинақты мектептердің жағдайын жақсарту. Алдағы уақытта бұл істе өз шешімін табуға тиісті мәселелер аз емес. Шағын жинақты мектептер көп жағдайда тұрғындар саны аз шалғай ауылдарда болатыны белгілі әрі басым көпшілігі кезінде қарадүрсін, шаруашылық әдіс бойынша кәдімгі саман кірпіш пен ағаштан тұрғызылғаны ешкімге де құпия емес.
Облыста дәл осындай 45 мектеп бар екен. Әрі оның кейбіреуі әлі күнге дейін пешпен жылытылатын көрінеді. Мұндай жағдайда оны қыс кездерінде көмірмен және қимен қамту қажеттігі туындайды. Оны жеткізу қазіргі күннен бастап ойластырылмаса шағын мектептің шағын бөлмесінде оқушылар қыс кездерінде дірдек қағып отырмасына кім кепіл?! Сонымен бірге көп жағдайда шағын жинақты мектептердің әбден ескіріп, тозығы жетіп тұрғаны да ұдайы назарда болуы тиіс. Өкінішке қарай облыста бұған байланысты мәселе қозғап жүрген ешкімді естімеппіз. Осы орайда Мемлекет басшысының шағын жинақты мектептерге қатысты пайымды пікірі өңірдегі білім беру саласының жетекшілеріне ой салса, қанеки.
АҚТӨБЕ
