«Ахаңның туған күні осылай жыл сайын өткізіліп, аталып отырса құба-құп. Облыстық кітапхананың бастамасын дәстүрге айналдырса деп ойлаймын. Мен Ахмет туған топырақтан, жерден, сол рудан болғандықтан, осындай ұлы адамның өмірін зерттеуге қатысып келемін. Оның ұрпақтарының, ауылдың ақсақалдарының көзін көрдік, солардан естігенімнің өзі Ахаңның өмірбаян тарихына қосылған үлес болды деп білемін. Ал оны зерттеген ғалымдар жеткілікті.Алайда Ахаңның зерттелмеген тұсы, еңбектері әлі де бар, оларды жеткіншектер әлі зерттей жатар» деді Ибрагим ағай.
Мұнан кейін ақын Нағашыбай Мұқатов Ахаңа арнаған өлеңін оқып берді. Философия ғылымдарының кандидаты, өлкетанушы Қалқаман Жақып университетке Ахмет Байтұрсынов есімінің қалай берілгендігі туралы тарихи мәліметті жастардың есіне салды. Студент жастар кешті әнмен және Ахмет Байтұрсынов өлеңдерін мәнерлеп оқумен көркемдей түсті. І.Омаров атындағы облыстық қазақ драма театрының актері Қабдылмажит Иманов Ахаң кейпінде келіп, «Міржақып» спектаклінен Ахметтің монологын айтып берді.
Кітапхана ұжымы ұлт ұстазына арналған кешті енді жыл сайын Ахаңның туған күнінде осы ескерткіш алдында өткізетіндіктерін айтты.
Қостанай
