Үлгілі шаңырақтың шаттығын еселеп, мерейін өсірген байқауға биыл 3 мыңнан аса отбасы өтініш білдірген. Шымкент шаһарын қосқанда 17 өңірден қара үзіп келген жеңімпаздар елордадағы «Қазақстан» орталық концерт залында өткен салтанатты марапаттау рәсіміне қатысты. Мерекелік жиынның шымылдығын ашқан Премьер-Министрдің орынбасары Бердібек Сапарбаев Президент Қасым-Жомарт Тоқаевтың құттықтау хатын оқып берді. «Халқымыздың ұлттық және отбасылық дәстүрлерге беріктігі қоғамдағы рухани құндылықтардың сақталуына ықпал етеді. Бұл мемлекеттік іс-шара – Қазақстанның әлеуметтік саясатының маңызды бөлігі. Елімізде жыл сайын халықтың өмір сүру жағдайын, тұрмыс сапасын жақсартуға бағытталған маңызды шешімдер қабылдануда. Елбасы бастамасымен мерекелер күнтізбесіне Отбасы күні мейрамы енгізілді. Ырыс-берекесі мен ынтымағы жарасқан мәуелі әулеттерді насихаттайтын «Мерейлі отбасы» ұлттық байқауын өткізу дәстүрге айналды. Бұл шаралар сан ғасырлар бойы қалыптасқан ұлттық әдет-ғұрыптардың, салт-дәстүрлердің жаңғыруына, отбасы институтының нығаюына, ұрпақ тәрбиесіне жаңаша мән беріп, өнегелі әулеттердің өрісін нығайтуға ықпал етеді. Дәстүрлі ұлттық конкурстың қатысушылары отансүйгіштік, еңбекқорлық, мейірімділік сияқты үлгі тұтарлық өмірлік ұстанымдарды жан-жақты меңгергенін көрсетті. Бұл конкурсқа қатысушылардың барлығын жеңімпаздар деп айтуға болады. Өйткені осы конкурсқа қатысқан әрбір отбасы мерейлі», делінген Мемлекет басшысының құттықтауында.
Байқауда Нұр-Сұлтан қаласынан белгілі айтыскер ақын Серікзат Дүйсенғазының, Алматы қаласынан кәсіпкер Әбдіқалықовтардың, ал Шымкент шаһарынан көп балалы Серманизовтардың отбасы топ жарды. Ұстаздық ұлы жолды атадан балаға 215 жылдан бері жалғап келген Ақмола облысындағы Әубәкіровтер шаңырағы, білім беру және медиация саласына үлес қосып, 9 жыл ішінде ажыраспақ болған мыңнан астам отбасын сақтап қалған Ақтөбе облысындағы Әбілдаевтар отбасы және Алматы облысындағы кәсіпкер Ақбасовтар отбасы жеңімпаз атанды. Жеңімпаздардың қатарында 12 баласын түгел кәсіпке баулыған шығысқазақстандық Черкашиндер отбасы, спорт саласында еңбек етіп, 26 жылда 6 әлем чемпионы, 20 Азия чемпионы мен 100-ге жуық Қазақстан чемпионын тәрбиелеген Жамбыл облысындағы Жансақаловтар отбасы, батысқазақстандық педагог Қарсақовтар отбасы бар. Сондай-ақ 500 жыл бойы металлург мамандығын атадан балаға жалғап келе жатқан Қарағанды облысындағы Салкауовтар отбасы, Қостанай облысынан Бублик әулеті, Қызылорда облысынан механизатор Қиянбековтер отбасы, Маңғыстау облысындағы мал шаруашылығын кәсіп еткен Нұрсебеповтер шаңырағы, Павлодар облысындағы көмір өнеркәсібі саласында ұзақ жыл тер төккен Төлеубаевтар отбасы, Солтүстік Қазақстан облысынан Ауғанстан соғысының ардагері Ушаковтар отбасы және Түркістан облысынан Еркебаевтар отбасы марапатталды. Оларға Премьер-Министрдің орынбасары Бердібек Сапарбаев пен Президент жанындағы Әйелдер істері және отбасылық-демографиялық саясат жөніндегі ұлттық комиссияның төрайымы Гүлшара Әбдіқалықова дипломдар және тұрмыстық техника сатып алуға сертификаттар табыс етті.
Биыл Атырау облысындағы ауыл мектебінде ұстаздық ететін Тілекқабыловтар «Мерейлі отбасы» ұлттық байқауының лауреаты атанды. Әулеттің тірегі болған еңбек ардагері, ағарту ісінің үздігі, Индер ауданының құрметті азаматы Төлеш Тілекқабылұлы өмірден озған. 82 жастағы әулеттің әжесі Аймекен Қабдешқызы «Алтын алқа», «Еңбек ері» медальдарының иегері. Қазір ол 8 баладан 28 немере, 16 шөбере сүйіп отыр. Немерелерінің бесеуі мектепті «Алтын белгімен» аяқтаса, үш немересі «Қызыл диплом» иегері атанған. Абылай Төлеш атты немересі панкратионнан әлем чемпионы, жауынгерлік самбодан әлем кубогінің екі дүркін күміс жүлдегері. Жеңімпаз отбасына отандық «СарыарқаАвтоПром» ЖШС шығарған шағын автобустың кілті табысталды. Марапаттау рәсімі танымал эстрада әртістерінің мерекелік концертімен аяқталды.
