Спорт • 23 Қыркүйек, 2019

«Олд Траффордта» есе жіберді

135 рет
көрсетілді
4 мин
оқу үшін

Елорданың «Астана» футбол клубы Еуропа лигасының топтық кезеңіндегі алғашқы ойынын атақты «Олд Траффорд» стадионында «Манчестер Юнайтед» командасына қарсы өткізіп, 0:1 есебімен жеңіліп қалды. Алғашқы таймда алаң иелерімен тең дәрежеде ойнаған жерлестеріміз екінші таймда күтпеген жерден гол өткізіп алды.

«Олд Траффордта» есе жіберді

Өткен ойындармен салыс­тырғанда бас бапкер Роман Гри­горчук «Манчестер Юнайтедке» қарсы ойнаған құрамға аздаған өз­геріс енгізгенін байқадық. Бұған дейін қорғаныста ойнап келген Лука Шимуновичті жарты­лай қор­ға­нысқа жіберіп, орнына клуб сапын жуыр­да ғана толықтырған Жарко Тома­шевичті шығарды. Сондай-ақ шабуыл шебінде бірінші минуттан бастап Роман Мұртазаевқа сенім артты. Ал МЮ бас бапкері Оле Гуннар Сульшер «Астанаға» қарсы бірқатар жас ойыншыны тексеріп көрді. Атап айтар болсақ, 21 жастағы қорғаушы Аксель Туазебені, 19 жастағы жартылай қорғаушы Эйнджел Гоместі, 17 жастағы шабуылшы Мэйсон Гринвуд пен 19 жастағы Таит Чонгті бірінші минуттан бастап жасыл алаңға шығарды.

Ойындағы алғашқы қауіпті ша­буылды алаң иелері жасады. Алғашқы бес минутта «Манчестер Юнайтед» футболшылары Эрич қорғаған қақпаны екі рет нысанаға алды. Үшінші минутта Фредтің сол қапталдан шірене тепкен добы қақпа бағанына тиіп, кері қайтты. Ал Маркус Рэшфордтың соққысы қақпадан әлдеқайда қиыс кетіп жатты.

«Астана» футболшылары да қор­ға­нысқа жатып алмай, әлсін-әлсін қар­сы­лас қақпаның маңайында шабуыл ұйым­дастырды. Роман Мұртазаев пен Дорин Ротариу өздеріне берілген мүмкіндікті пай­далана алмады. Осылайша алғашқы тайм 0:0 есебімен аяқталды. Бірінші тайм­ның статистикасы бойынша, МЮ біздің қақ­паға 11 соққы жасаған екен. Ал доп бақы­лау бойынша 72/28, алаң иелерінің пайдасына.

Екінші таймда Роман Григорчук екі бірдей футболшыны алаңға шығарды. Юрий Логвиненко Лука Шимуновичті алмастырса, Роман Мұртазаевтың орнына Рангело Янганы шығарды. Осы өзгерістен кейін бе, әлде бас бапкердің үзілісте берген нұсқауынан кейін бе әйтеуір «Астананың» ойыны біраз жанданды. Жерлестеріміз 70-минутқа дейін шабуыл жасап, «Ман­честер Юнайтед» қорғаушылары мен қақ­пашысын әбден әбігерге салды. Тіпті, Рангело Янга өзіне берілген екі бір­дей мүмкіндікті голға айналдыра алма­ды. «Астананың» шабуылы күшейе баста­ғанын байқаған Сульшер алаңға негізгі құрамның ойыншылары Хуан Мата мен Джесси Лингардты шығарғаннан кейін МЮ-дің ойыны өзгеріп сала берді. 73-минутта «қызыл сойқандардың» 17 жастағы футболшысы Мэйсон Гринвуд гол соғып кетті. «Астана» ойыншылары кездесудің соңына қарай шабуылға шыққанымен гол соғуға уақыт жетпей қалды. Қорытынды есеп – 1:0.

Матчтан кейін «Астана» клубының бас бапкері Роман Григорчук командасы жеңіліп қалса да, шәкірттеріне риза екенін білдірді. «Осындай ойыннан кейін жігіттерге кездесу соңында артық ештеңе айтудың да қажеті жоқ деп есептеймін. «Манчестер» мен біздің ойынның деңгейін бағамдадым десем болады. Қалай дегенде, «Астана» ойыншылары жарады. Олар жақсы ойын көрсетті. Мен олардың алдында басымды иіп, көрсеткен ойынына алғыс айтамын» дейді Григорчук.

Сондай-ақ Оле Гуннар Сульшер матч­та жеңіске жеткеніне қуанышты екенін жасырмады. «Бүгін кездесу өте қиын өтті. Сенімді ойнауға болар еді, бірақ жағдайды өзіміз қиындатып алдық. Егер сенімді ойнағың келсе, алғашқы 20 минутта кездесу тағдырын шешіп, қалған уақытта  ойыннан ләззат алу керек. Дегенмен жеңіске жеткенімізге және қақпамызға гол өткізіп алмағанымызға қуаныштымын», дейді Сульшер.

Біздің топтағы екінші ойында «Партизан» өз алаңында «АЗ Алкмар» командасын қабылдап, 2:2 есебімен тең түсті. Бірінші турдан кейінгі турнир кестесінде «Манчестер Юнайтед» үш ұпаймен топ бастады. «Партизан» мен «АЗ Алкмар» бір ұпаймен екінші және үшінші орынды бөлісіп тұр. Ал «Астана» әзірше төртінші орында. Енді «Астана» топтағы келесі ойынын 3 қазанда «Партизанға» қарсы өткізеді. Бұл кездесу «Астана Арена» стадионында өтеді.