Nur Otan қабылдауына еліміздің түрлі өңірлерінің тұрғындары электрмен, сумен жабдықтаумен қамтамасыз етуге, инфрақұрылымды дамытуға қатысты проблемаларымен және басқа да мәселелермен жүгінді. Күмісжан Мифтахова Ақмола облысы Целиноград ауданы Талапкер кентінің 14 мыңнан астам тұрғынының атынан аталған елді мекенді электрмен қамтамасыз ету мәселесін көтерді – кентте небәрі 10 трансформатор қосалқы стансасы жұмыс істейді, соның салдарынан энергиямен қамтамасыз етуде проблемалар туындап отыр.
А.Мамин Энергетика министрлігіне және Ақмола облысының әкімдігіне қысқа уақыт ішінде үздіксіз электрмен қамтамасыз етумен АТЭК балансына барлық электрмен қамту нысандарын беру мәселесін пысықтауды, сондай-ақ тарифтегі айырмашылықтарды азайтуды қарастыруды тапсырды.
Алматы облысы Қарасай ауданының тұрғыны Базаркелді Анисов қабылдауға «Ақсеңгір – Шамалған» темір жол өтпесінде көпір салу туралы өтінішімен жүгінді.
«Көпір мен жаяу жүргіншілер өткелі салынып, 2020 жылдың соңына дейін пайдалануға беріледі», деді А.Мамин.
Премьер-Министр Индустрия және инфрақұрылымдық даму министрлігіне және Ақмола облысының әкімдігіне нақты тапсырмалар берді. Сонымен қатар жергілікті билік орындарына тұрғындар мен автокөлік құралдарының темір жолды күнделікті әрі қауіпсіз кесіп өтуіне байланысты ағымдағы мәселелерді шешу тапсырылды.
Алматы облысы Еңбекшіқазақ ауданының 330 тұрғынының атынан партия қабылдауына аудандағы 11 кентті орталықтандырылған сумен қамту проблемасын шешу өтінішімен Асыл Байтулақов жүгінді.
Үкімет басшысы қазіргі уақытта құны 4,5 млрд теңге болатын топтық су тартқыштарын салу жобасы әзірлен-
генін айтты, бұл келесі жылдың соңына дейін туындап отырған ауданды сумен қамтамасыз ету мәселесін шешуге мүмкіндік береді.
Атырау қаласынан келген кәсіпкер Өтеміс Жұмағалиев «Атырау – Нұр-Сұлтан» бағыты бойынша әуе билеттерінің құнын төмендету туралы мәселені көтерді.
А.Мамин Тұңғыш Президент – Елбасы Н.Назарбаевтың тапсырмасын орындау аясында әуе билеттерінің құнын төмендету және бәсекелестікті күшейту мақсатында «FlyArystan» әуе компаниясы құрылғанын айтты, ол 2020 жылдың мамыр айынан бастап Атырауға әуе рейстерін орындауды бастайды. Бұл ретте әуе билеттері оларды алдын ала сатып алған жағдайда ең төменгі тариф бойынша сатылатын болады (5-10 мың теңге). Сонымен қатар көлік қатынасын жақсарту үшін «Атырау – Ақтөбе» және «Атырау – Астрахань» автожолдары қайта жөнделеді.
Nur Otan партиясының қоғамдық қабылдауына Шымкент қаласының 195-орамының (Бадам) 3400 тұрғынының атынан мектеп мұғалімі Гүлназ Әбдірова жүгінді. Оның айтуынша, ауданда электр беруде үнемі іркілістер бар.
Премьер-Министр Шымкент қаласында 195-орамының 828 үйін электрмен жабдықтау үшін 244 млн теңге бөлінгенін айтты. Жұмыстарды осы жылдың желтоқсан айында аяқтау көзделген. Су құбырын және газ желілерін салу келесі жылға жоспарланған.
Қаралған әрбір жүгіну бойынша Үкімет басшысы әкімдіктердің, сондай-ақ министрліктер мен ведомстволардың басшылығына нақты тапсырмалар беріп, азаматтарды көтерілген мәселелердің шешімі жеке бақылауына алынатынына сендірді.
Алдағы уақытта азаматтардың өтінімдеріне шұғыл әрекет ету мақсатында Премьер-Министр Үкімет мүшелеріне Nur Otan партиясының қоғамдық қабылдауларында халықпен жүйелі түрде кездесулер өткізуді тапсырды.
