Еліміз үздік халықаралық тәжірибені ескере отырып, медициналық сақтандырудың аралас моделін таңдады. Оның ерекшелігі – әлеуметтік аз қамтылған топтарды мемлекет өз қамқорлығына алып, олар үшін жарна төлейді.
Жаңа жылдан бастап азаматтарға екі медициналық көмек пакеті ұсынылады. Тегін медициналық көмектің кепілдік берілген көлемінің жаңа үлгісі, яғни шұғыл және кезек күттірметін жағдайларда әрбір адамға көмек көрсетіледі. Екіншісі – міндетті әлеуметтік медициналық сақтандыру пакеті. Бұл сақтандырылған әрбір адамның өмір сапасын жақсартатын медициналық көмек.
Президент маңызды құжатта: «Үкімет әлеуметтік медициналық сақтандыру жүйесінің беделіне тағы да нұқсан келтірмеу үшін оны жүзеге асыру мәселесіне зор жауапкершілікпен қарауы қажет. Біздің қателесуге құқымыз жоқ», деп атап көрсетті. Қазір Атырау облысында жеке адамдар, ұжымдар, ірі кәсіпорындар жаңа жүйеге қызығушылық танытып, белсенділіктерін көрсетуде. 2017 жылдың 1 шілдесінен 2019 жылдың 31 шілдесіне дейінгі аралықта облыс бойынша жалпы сомасы 12 млрд 508 млн теңге жарна жиналды. Оның 96,4%-ы жұмыс берушілердің аударымдары болса, қалғаны жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі.
МӘМС – халық мүддесін әлеуметтік тұрғыда қорғайтын мемлекеттік жүйе. Болашақ ұрпақ денсаулығының іргетасы.
Байтолла ҒАЗИЗОВ,
«Әлеуметтік медициналық сақтандыру қоры» КЕАҚ Атырау облысы бойынша филиалының директоры
