Кешікпей жеткен жедел топ мәйіттің ұзақ уақыт жатып қалғанын көреді. Тез жасалған сот-медициналық сараптама мәйіттің кісі қолынан қаза тапқан адамдікі екенін және оны бөлшектеген қылмыскердің ісі екенін де анықтаған. Алайда оның ізіне түсетін ешқандай айғақ жоқ, оның үстіне бірнеше тәуліктен бері жауған жаңбыр барлық ізді шайып кеткен. Мәйіттің кімдікі екені де белгісіз. Қылмыстық оқиғаны көрдім деген куәгер де табылмады. Бұл үйдің өзі көптен бері бос тұрған, иесіз болатын.
Алайда кәсіби шеберлік өзінің жетістігін көрсетті. Полиция департаменті жедел-криминалистикалық басқармасының аға криминалисі, полиция майоры Жақсылық Уәлиев алақанның бір бөлігінен «Папилон» автоматтандырылған дактилоскопиялық ақпараттық жүйесінің деректер базасы арқылы мәйіттің кімдікі екенін анықтады. Ол 1983 жылы туған, соңғы кездері ішкілікке салынып кеткен қала тұрғыны болып шықты.
Жедел топ оның бұрын кімдермен жүргенін, кімдермен қосылып арақ ішкенін анықтай келе ақыры күдік бір адамға түседі. Соңына қуғын түскенін сезген анау бөтелкелесін өлтіргенде өзімен бірге болған куәгердің де көзін жойып, көршілес облысқа кетіп, ізін жасырмақ болған. Жедел іздестіру шараларының нәтижесінде екі бірдей адамның өмірін қиған күдікті ұсталып, қазір қамақта отыр. Оны ұстауда жедел уәкілдер, учаскелік инспекторлар нәтижелі жұмыс істеді. Барлық заттық айғақтар мен қолының таңбасы күдіктінің қылмыс жасағанын бұлтпартпай дәлелдеді. Қазір іс Қылмыстық Кодекстің «Адам өлтіру» бабы бойынша рәсімделіп, сотқа жіберілуге дайындалып жатыр.
Жедел-криминалистикалық басқарманың бастығы, полиция полковнигі Игорь Семёновтың айтуына қарағанда, жыл басынан бері криминалистер 10 мыңнан астам жедел-іздестіру шаралары мен тергеу әрекеттеріне қатысып, 4500 криминалистикалық зерттеу жүргізген. Соның ішінде 350-і қылмыскердің жеке тұлғасын анықтауға және қылмыстарды ашуға септігін тигізген. Айта кететін болсақ, 2018 жылдың қорытындысы бойынша бұлар ІІМ криминалистикалық бөліністері арасында «үздік» деген атақты иеленіпті.
Солтүстік Қазақстан облысы
