Елорда командасы Еурокубок ойындарында жетінші жыл қатарынан ойнап жатса да, биыл бірінші рет сербиялық командамен кездескелі тұр. «Партизан» клубының тарихы терең болғанымен, атақ жағынан Еуропаның ортанқол командасы саналады. 1945 жылы құрылған команда қазіргі уақытта УЕФА клубтар рейтингінде 71-орында тұр. Ал 10 жылдық тарихы бар «Астана» ТОП-50 клубтың қатарында екені баршаға белгілі.
«Партизан» командасы Нұр-Сұлтанға сейсенбінің кешінде келді. Бас бапкер Саво Милошевичтің айтуынша, құрамада жарақат алған футболшы жоқ. Шәкірттері бүгінгі ойынға сақадай-сай. Сондай-ақ команданың қорғаушысы Боян Остоич Қазақстан астанасына кем дегенде бір ұпай алуға келгендігін айтады. «Қазақстан чемпионына қарсы ойын – біз үшін кезекті бір емтихан. Өйткені осы ойын арқылы біз өз деңгейімізді анықтап аламыз. Біздің басты мақсатымыз – жеңілмеу және ұпай олжалау болып тұр. Сонымен қатар қақпамызға гол өткізбеуге тырысамыз. Қалғанын алаң шешеді. Қазір командадағы жігіттердің көңіл күйі өте жақсы», дейді ол.
Рас, «Партизан» футболшылары елордаға өте көтеріңкі көңіл күйде келді. Өйткені Сербия біріншілігіндегі 9-тур ойынында сырт алаңда «Раднички Ниш» клубын 4:1 есебімен тас-талқанын шығарды. Бұдан бөлек Белград командасы 15 тамыздан бері жеңілістің не екенін білмей келеді. Соңғы рет тамыздың ортасында Еуропа лигасының іріктеу кезеңінде Түркияның «Йени Малатьяспор» командасына сырт алаңда 1:0 есебімен есе жіберген. Содан бері 9 ойын өткізіп, алтауында жеңіске жетсе, үш ойынында тең түскен. Тіпті ішкі біріншіліктегі негізгі қарсыластары «Црвена Звезда» командасынан да басым түскен. Ал Еуропа лигасының топтық кезеңіндегі бірінші тур ойынында Нидерландының «АЗ Алкмар» командасымен тең түсті. «Партизан» клубының қазіргі жағдайы осындай.
«Астана» командасы да бүгінгі ойында жеңіске жетуге тас-түйін дайын. «Манчестер Юнайтедпен» өткен матчтан кейін ішкі біріншілікте «Жетісу» командасынан жеңіліп қалғаны болмаса, кейінгі екі ойында қарсыластарынан басым түсті. Тіпті елорда командасы қосалқы құрам футболшыларымен ойнаса да қарсылас команданың қақпасына жеті гол соқты. Бір өкініштісі, «Партизанға» қарсы өтетін ойында жарақатына байланысты Юрий Логвиненко командаға көмектесе алмайды. Бұл туралы бас бапкер Роман Гринорчук «Қайсарға» қарсы өткен матчтан кейінгі баспасөз мәслихатында айтты. Ал қалған жігіттер ойынға толық дайын дейді.
Жоғарыда атап өткеніміздей, бүгінгі ойында жеңіс «Партизанға» қарағанда «Астанаға» ауадай қажет. Себебі дәл осы матч «Астананың» плей-офф кезеңіне шығу-шықпауын анықтап береді. Ал «Партизанға» тең ойын да жеткілікті. Олар өткен турда «АЗ Алкмармен» тең ойнап, бір ұпай олжалаған. Жерлестеріміз алғашқы турда МЮ-ден жеңіліп, көш соңында қалып қойды. Сондықтан бүгінгі ойында «Астана» қалайда жеңіске жетіп, үш ұпай олжалауды көздейді. Сондай-ақ топтағы екінші ойында «АЗ Алкмар» өз алаңында «Манчестер Юнайтедті» қабылдайды. Бұл ойында бізге ағылшын командасының жеңіске жеткені тиімді. Өйткені бүгін «Астана» жеңіске жетіп жатса, үш ұпаймен екінші орынға көтеріледі. Ал жерлестеріміз үшінші турда Нидерландыға қонаққа барады. «Алкмарға» қарсы ойында да ұпай алатын болсақ, екінші орынмен плей-офф кезеңіне жолдама алуға толық мүмкіндік бар.
Сонымен қос команда арасындағы кездесу бүгін «Астана Арена» стадионында өтеді. Матч Нұр-Сұлтан уақыты бойынша 20:50-де басталады.
