Руханияттың тойын лайықты өткіземіз
– Әбіш Кекілбайұлының тойы – елдің, руханияттың тойы. Сондықтан осы деңгейге лайықты етіп өткізу – басты мақсатымыз және міндетіміз. Қазіргі таңда атаулы күнге аз-ақ уақыт қалды, сол себептен дайындық жұмыстарын пысықтап, өз мәресіне жеткізе тиянақтаудамыз. Заңғар жазушы Ә.Кекілбайұлын халықаралық деңгейде танытып, дәріптеу мақсатындағы шараға жазушымен әріптес болған әдебиет және өнер қайраткерлері, шығармаларын бірнеше тілге аударған аудармашылар, сондай-ақ Еуропа, Жапония, Түркия мемлекеті мен көршілес Ресей елінен ғалым, зерттеушілер шақырылады. Шараға еліміздің Мәдениет министрлігі қолдау көрсетуде, дейді Маңғыстау облыстық мәдениет басқармасы басшысы П.Сармурзина. Шара барысында Ақтау қаласында Әбішке арналған мәдени орталық кешенінің алдында орналасатын ескерткіштің және облыстық өлкетану музейінің ашылу салтанаты өтіп, түрлі спорттық ойындар, қазақша күрестен республикалық турнир өткізіледі. Сондай-ақ республикалық Ардагерлер кеңесінің көшпелі отырысы өтіп, бірінші халықаралық «Әбіш әлемі» театр фестивалі басталады. Бұл фестиваль өзінің репертуарымен, яғни қойылымдардың ерекшелігімен тәнті ететін болады. Маңғыстау облысы әкімінің тапсырмасымен «Әбіш оқуларының» жеңімпаздарына, филология және журналистика саласында жақсы нәтиже көрсетіп жүрген студенттерге Әбіш Кекілбайұлы атындағы шәкіртақы тағайындалмақ.
Халықаралық конгресс – мазмұнды ойлар мінбері
– Ә.Кекілбайұлының 80 жылдығына арналған әдебиет және өнер қайраткерлерінің халықаралық конгресін өткізу Маңғыстау өңіріндегі іргелі оқу орны Ш.Есенов атындағы Каспий мемлекеттік технологиялар және инжиниринг университетіне жүктелді. Бұл біз үшін үлкен қуаныш, зор абырой. Ұлы жазушы біздің университет үшін, біздің студенттеріміз үшін қашанда асқақ. Университетте ашылған «Әбіш Кекілбайұлы атындағы оқу кабинеті» жазушының әдеби мұрасын оқып-үйрену мен зерттеп-зерделеуге арналған оқу орталығы болып табылады. «Қазақ филологиясы» кафедрасының профессор-оқытушылары қаламгер мұрасын зерделеп, монографиялар мен оқу құралдарын жариялауда. Білім алушылардың күшімен жазушының әдеби мұрасын зерттеуге арналған магистрлік диссертациялар мен диплом жұмыстары орындалуда. Оқу-жұмыс жоспары бойынша «Қазақ тілі мен әдебиеті» бакалавриат мамандықтарына «Әбіштану» курсы оқытылып келеді, жыл сайын дәстүрлі түрде «Әбіш оқулары» өткізіліп тұрады.
Ә.Кекілбайұлы шығармашылығының әлемдік көркем кеңістіктегі орны мен оның адамзаттың рухани дамуына өзіндік ықпалын қазіргі ғылыми парадигмада зерделеу мақсатындағы конференция әлемдік әдеби кеңістіктегі Ә.Кекілбайұлы феномені, Ә.Кекілбайұлы шығармаларындағы тілдік таным, тәуелсіздік контексіндегі Ә.Кекілбайұлының саяси-әлеуметтік қызметі және Ә.Кекілбайұлы және қазақ тарихының мәселелері, сондай-ақ Ә.Кекілбайұлы танымындағы Адам және Жаратылыс концепциясы бағыттары бойынша өтеді. Әдебиет және өнер қайраткерлерінің халықаралық конгресі жазушы өмірін терең танып, шығармаларына деген таным көкжиегін кеңейтетін шара болады деп күтеміз. Шарада еліміздің белгілі ғалымдары мен әдебиетшілері «Ә.Кекілбайұлы және қазіргі қазақ әдебиеті», «Әбіш Кекілбайұлының тұлға ретінде қазақ руханиятындағы орны», «Ә.Кекілбайұлы шығармаларының тарихи астары» сынды өзекті тақырыптарда баяндама жасап, оқырмандардың, әсіресе жастардың Әбішті тани түсуіне зор мағлұмат беретін болады, дейді Ш.Есенов атындағы КМТжИУ ректоры Б.Ахметов.
Туған жері текті ұлын ұлықтайды
Бұл жөнінде Өңірлік коммуникациялар қызметі алаңында өткен брифингте Онды ауылының әкімі Б.Балапан мәлімдеген еді.
– Әбіш Кекілбайұлының туған жері Онды ауылында жасалынып жатқан құрылыс жұмыстарына тоқталсам, Онды ауылына кіреберістегі 8 шақырым жолға «МКДСМ» жауапкершілігі шектеулі серіктестігі жөндеу жұмыстарын жүргізіп жатыр. Ә.Кекілбайұлы атындағы орта мектепке «Нұрлы жол» жауапкершілігі шектеулі серіктестігі жөндеу жұмыстарын жүргізуде. Жылу қазандықтары ауыстырылды, автотұрақ орнатылды, тас тақтайша төселіп, жұмыстары аяқталды.
«Ай-Ана» мемориалды кешенін ағымдағы жөндеу және «Құлыншақ» балабақшасының жөндеу жұмыстары аяқталды. Ә.Кекілбайұлы атындағы паркті жөндеу жұмыстары бойынша 500 шаршы метр жерге тас тақтайша төселіп, су құбыры тартылып, қоршауы ауыстырылуда. Орталық паркті суландыру, ағымдағы жөндеу, абаттандыру, парк ішіндегі обелискіні жөндеу жұмыстары жүрді, құбыр тартылып, 500 шаршы метр жерге тас тақтайша төселіп, ағаштары бұтақталып, жаңадан қақпа орнатылды.
Ашық спорт алаңына «Нұрлы жол» жауапкершілігі шектеулі серіктестігі жөндеу жұмыстарын жүргізіп жатыр. «Қызыл там» бұлағы басын абаттандыру жұмыстарына 6,3 млн теңге бөлініп, бұлақтар басы табиғи таспен өріліп, қоршауы салынып, тас төсеу, жарық тарту жұмыстарын жүргізді.
Онды мешіті құрылысы аяқталуға жақын. Ішкі жұмыстары, есік, терезесі салынып, сыртқа тас төсеу, шарбақ қалау жұмыстары жүруде.
Әкімшілік ғимаратын ағымдағы жөндеу жұмыстарын «Ақдәулет» жауапкершілігі шектеулі серіктестігі жасап шықты. Онды ауылына кіреберістегі көше бетіндегі 50 тұрғын үй мен 8 сауда нүктелері иелерімен кездесіп, тұрғын үйлер мен сауда нысандарының сыртын, шарбақтарын әрлеу жұмыстарын жүргізу туралы түсіндірме жұмыстары жүргізілді. Қазіргі кезде 40 тұрғын үй, 6 кәсіпкерлік нысан әрлеу жұмыстарын жүргізді.
Онды мектебіне Әбіш Кекілбайұлының аты берілгелі мектепте Республикалық Әбіш оқулары байқауы екі рет өткізілген. Байқауға 14 облыстан қатысушылар келді. Сондай-ақ заңғар жазушының атындағы мектептің алдына кемеңгер тұлғаның кеуде мүсіні қойылатын болады. Биіктігі 3 метр бюсттің мүсіні тастан қашалып, ал тұғыры граниттен жасалуда, дейді ол.
Ауылдағы жөндеу жүргізіліп, құрылысы салынып жатқан нысандарды республикалық дәрежедегі қонақтардың қатысуымен ашу жоспарланған. Сондай-ақ, ұлттық спорт түрлерінен жарыстар ұйымдастырылып, Әбіш пен Фариза шығармашылығына арналған республикалық деңгейдегі «Сөз бен Саз» бағдарламасы өткізілмек. Маңғыстау ауданының орталығы Шетпе селосында 30-ға жуық үй тігіліп, мерекелік асқа бір мезгілде 2000 адам қатысады деген жоспар бар.
Маңғыстау облысы
