Алматы Шерхан Мұртазаны еске алды

Игілікті істің басы-қасында жүрген Алматы қаласы әкім­дігінің қолдауымен Алаш­­тың ар­дақты жазушысын құрметтеу оның Кеңсайдағы қабірінің ба­сына құлпытас қоюдан бас­талды. Осы орайда Шерағаның құлпытасын әзірлеп, жасауға тікелей ат­салысқан, ұйытқы бол­ған Түр­кістан облысы, Түл­кібас ауданының азаматтары екенін  ризашылықпен атап өткеніміз жөн.

Іс-шараға жазушының ұл-қызы, ел жақтағы ағайын-туыс­тары, туған жері Жам­был, Қызыл­ор­да, Түркістан, Алматы об­лыс­­­та­рының делегациялары, Қа­зақстан Жа­зушылар ода­ғы­ның аймақ­тардағы бө­лім­шелерінің бас­шылары  арнайы келіп, тә­уелсіздіктің елең-ала­ңында басын бәй­геге тігіп, хал­қының жанына жалау болған қазақ жур­налистикасының сар­дарын еске алып, арыстандай айбатын, наркескендей намысы мен қайратын танытатын оқиғаларды еске алып, әсерлі естеліктердің тиегін ағыт­ты. Қабір басында Құран ба­ғыштап, рухына тағзым жасады. Қытымырлығын таныта келетін қазан айының сәскеге таяп қалған таңы болса да күн­дегі салқын сызы өз-өзінен се­йіліп, жанға жайлы май тоң­ғысыз күн Шер-ағаң туралы тағылымды естеліктермен тіпті жылына түсті. Фәни мен бақи арасында жақсы аты қалып, екі дүниені ұлы рухымен жалғап жатқан жазушыны елі есіне алып тұрғанда, әуелей ұшқан бір топ ақ кептер тынып тұрған күзгі аспанды ерсілі-қарсылы екі рет кесіп өтті. Аяқ асты пай­­­­да болған ақ кептерлер ар­дақ­тап жатқан Алматысына, ұмы­та алмай жүр­гендердің ұлағат-ұлықтауына алдас­пан жазушының алыстан жол­даған алғысы секілді көрініп, сағыныш толған шерлі көкі­ректер Шер-ағаңның сәлемін үнсіз түсінгендей, көкке көзін қадап тұрды...

Бұдан кейін қазақ көсем­сө­зінің қолбасшысын еске алу М.Төлебаев көшесіндегі, №98 үйдің жанында жалғасты. Мұнда да оқырманның көңіліне қанат бітіріп, жанына рух бе­ретін ға­жайып шығармалар қалдырған суреткерін сағынған қауымның қарасы қалың бол­ды. Қазақ тілінің мұңын мұң­дап, жоғын жоқтаған, шын­дықтың шырақшысындай бол­ған Шер-ағаны мәңгі есте қал­дыру мақсатында бес қабат­ты тас үйдің қабырғасына ме­мориалды тақта орнатылды. Тұрған үйіне ескерткіш тақ­та орнату рәсімінде Алматы қала­сының әкімі Бақытжан Сағын­таевтың тебірене сөйлеген сөзі көпшіліктің бойын шымырлатып жіберді. «Бізде көп дүние қағазға байланысты шешіледі. Қағазға әлденені жазамыз да, сол сияның артындағы аза­мат­­тың кім екенін ұмытып кетеміз. Біз бәрін таразыға салып қоямыз. Өкінішті-ақ. Осыны жасап жүрген өзіміз. Ал Шерағамыздың дүниеден өткеніне жыл толып жатқан кезде, қағазға қарап қаламыз ба? Жоқ, ел  екенімізді, қазақ екенімізді көрсетеміз бе? Осы­лай қағаздың бәрін ысырып тастап шешім қабылдадық. Мұндай шешім бір жылдан кейін емес, бес жылдан кейін емес, марқұм болған күннің ертеңінде қабылдануы керек. Өйткені бұл азамат – елдің азаматы. Тек «елім» деп қана өтті. Сол себепті осындай ізгі шаруаның басы-қасында жүр­геніме қуаныштымын», деді қала әкімі әр адамның көңілін толқытып тұрып. Расында да Бақытжан Әбдірұлы айт­қан­дай, бұл ескерткіш тақта Шер-ағаң­ның өзіне керегі жоқ. Тақта адам­дарға, халыққа керек. Мойнын бұрып қарап, «Шер-ағаң тұрған үй екен ғой» деп сүйікті жазу­шысын тағы бір еске алады. Шығармасы ойға оралады. Үйіне келіп ұл-қы­зына өнегелі сөзін ай­тады. Сондықтан мұндай тақ­тай­шалардың тәрбиелік мәні зор.

Шерхан Мұртазаға арналған шара Қабылдау үйінде берілген жылдық асымен жал­ғасын тапты. Асқа Шерхан Мұртазаның көзін көргендер, бірге қызмет істеген әріптестері, шәкірттері қатысып, естеліктерімен бө­лісті.

АЛМАТЫ