Қазақстан • 08 Қазан, 2019

«Сарыарқа» газ құбыры кешікпей келеді

54 реткөрсетілді

Мемлекет басшысы Қасым-Жомарт Тоқаевтың сай­лауалды бағдарламасында алға қойылған міндеттердің бірі халықты көгілдір отынмен қамту мәселесіне арналған болатын. Президент Жолдауда да еліміздің бас қаласына, солтүстік және орталық өңірлерге газ тарту жұмысына ерекше тоқталған. 

Адамдардың өмір тұрмы­сын жақсартудың және жеңіл­детудің бір жолы – таза ауыз­суға, табиғи газға, көлік ин­ф­ра­құрылымына қолжетім­ділік деңгейін арттыру болып табылады. Өкінішке қарай, Қазақстандағы қазіргі жағ­дай бірдей емес екені мәлім. Осы орайда Президент өзі­нің Жолдауында: «Еліміздің әр аймағының тұрғындары­­ның таза ауыз суға, табиғи газ­ға, көлік инф­ра­­құрылымына қол жет­кізу деңгейі біркелкі емес екені белгілі. Осы тең­сіз­дікті жою үшін жұмысты жандандыру қажет. Елбасы­ның тапсырмасы бойынша «Сарыарқа» газ құбырының магистральды желі­сінің бірін­ші кезектегі құры­лысы аяқ­талып келеді. Келе­­сі жылы Нұр-Сұлтан қала­­сын­да және Қарағанды, содан соң Ақмола мен Солтүс­тік Қазақстан облыстарында тарату желілерін салу жұмыстары басталады. Нәтижесінде 2,7 миллионнан астам адам табиғи газбен қамтамасыз етілетін болады», деген еді.

Үкіметтің есебіне жүгінсек, «Сарыарқа» магистральды көгілдір отын құбырының мың шақырымнан асатын ал­ғаш­қы кезеңі мәреге жетуге жақын қалды. Алғашқы кезең аяқталғаннан кейін Нұр-Сұлтан, Қарағанды, Темір­­тау, Жезқазған, Саран, Шах­тинск қалаларының және осы шаһарларға жақын орна­ла­с­қан, құбыр жолының бойын­да қоныс тепкен елді мекендердің бәрі табиғи газдың қызығын көруге тиіс. Одан әрі «Сарыар­қа» жобасы «Астана – Көкше­тау», «Көкшетау – Петропавл» бағы­тымен жалғасады. Жо­ба­ның жылдық қуаты 2,2 млрд тек­ше метр газ өткізуге  жете­­ді. Ұлан-ғайыр даланы көк­­теп өтетін құбыр жолын салу үшін «АстанаГаз» ҚМГ» ком­паниясы құрылды, бұл ком­панияның акционері «Са­мұрық – Қазына» мен «Бәйтерек» холдингі еке­нін айта кетейік.

Энергетика министрлігі хабар­лағандай, былтыр тамыз айының соңында Эко­номиканы жаңғырту жө­нін­дегі мемлекеттік комис­сия­сының шешімімен алып құрылыс жобасын қаржылан­дыру кес­тесі мен талаптары бекітіл­ді. Соны­мен 80,3 млрд теңге жоға­ры­да айтқан екі акционер компанияға 40,15 млрд тең­геден теңдей бөлініп беріл­ді. Тағы 102 млрд теңгені Қазақ­станның даму банкі мен Еура­зиялық даму банкі, 85 мил­лиард теңгені «БЖЗҚ» АҚ ин­вестициялайтын болып ке­лісілді. Қорыта келген­де алып жобаның жалпы құны 263,3 млрд теңгені құра­ды. Оның бас мердігері – «ҚазСтройСервис» компания­сы. Былтыр қараша айында «АстанаГаз ҚМГ» мен «ҚазСтройСервис» арасында құрылыс туралы келісімшарт жасалды.

Энергетика министрлігінің хабар­лауынша, қазіргі таңда құрылыс жұмыстары қарқын­ды жүріп жатыр.

– 1061,3 шақырымдық құ­быр жолын салуға қажет­ті құ­быр өнімдері түгел жеткі­зіл­ді, оның 1050 шақырымы, яғ­ни 98,9 пайызы жалғанды. Тәу­­лік сайын орта есеппен 5,6 ш­а­қырымдық құбыр дәне­кер­­леніп жатыр, – деп хабарлады ми­нистрліктің баспасөз қызметі.

Автоматтандырылған газ­­­рет­тегіш станса салуға ке­­рек­ті құрылғылардың 80 па­­­йызы тиісті жеріне жет­кі­зі­ліпті. Стансалардағы мон­таж жұ­мыстарының 63 па­йы­зы аяқталған. Құрылыс жұ­мыс­тары бекітілген кес­теге сай жүріп жатыр деуге болады.

– Жалпы алғанда биыл жел­­тоқсан айында бар­лық ны­сан­дар салынып бітеді. Атап айтқанда, магис­тральды газ құбыры, 5 автомат­тан­дырылған газреттегіш стан­са, газ өлшеу және басқару стан­сасы дайын болады. Яғни, құбыр жолы Нұр-Сұлтан қала­сына жоспарланған мерзімде – желтоқсан айында жетеді, – деп хабарлады Энергетика министрлігі.

«Сарыарқа» жобасының халықты көгілдір отынмен қамтып, әлеуметтік ахуалын жақ­сартудан басқа да игі ық­палы мол деуге болады. Елдің бірнеше өңірінде ин­ф­ра­құрылымның дамығаны шағын және орта бизнестің дамуына, сол арқылы эконо­ми­каның көтерілуіне ықпал ететіні анық.

Оған қоса, өмір бақи көмір жағудан көзі ашылмаған өңір­лердің табиғи газға көш­кені ауаға тарайтын зиян­ды қал­­­­дықтарды да азай­тып, эко­­­­логиялық ахуал жақса­ра түспек. Миллион­даған адам қоныс тепкен қала­лар мен өзге де елді ме­кен­дер­де эко­ло­гиялық ахуал­дың түзел­гені халықтың денсау­лығын жақ­сар­туға септесері сөзсіз.

 

Соңғы жаңалықтар

Қызылжарда 75 көше жөнделеді

Аймақтар • Бүгін, 20:30

Қапшағай қаласының әкімі ауысты

Аймақтар • Бүгін, 17:20

Жігіттің жақсысы

Руханият • Бүгін, 16:21

Ұқсас жаңалықтар