Жансүгіров кентінде ресми басталған салтанатты шарада ақынның мәрмәрдан қашалған ескерткіші ашылды.
Бүгін туған жерінің төрінен ақынға арналып еңселі ескерткіш орнатылып отыр. Бұл – елінің тарлан талантқа деген құрметі, ерен ерге деген тағзымы деп білеміз. Заңғар жазушы Мұхтар Әуезов: «Қазақтың Абайдан кейінгі заманындағы аса дарынды ақыны Ілияс Жансүгіров. Ілияс поэзиясы – ойға қанат, сезімге нәр беретін, ешқашан ескірмейтін мәңгі жас поэзия», – деп баға берген еді. Жетісу топырағында туған қайраткер-тұлға қазақ әдебиетінің барлық жанрына елеулі еңбек сіңірді, – деді жиында сөз алған Алматы облысының әкімі Амандық Баталов.
Орталық алаңға қойылған Ілияс Жансүгіров ескерткішінің авторы мүсінші, Қазақстан Суретшілер Одағының мүшесі, Мәдениет саласының үздігі Қазбек Дулатов.
Ілияс Жансүгіровтың туғанына 125 жыл толуына ұйымдастырылған шаралар легі бүгін облыс орталығында жалғасады.
Қалмаханбет МҰҚАМЕТҚАЛИ,
«Egemen Qazaqstan»
Алматы облысы
