Аудан орталығынан 16 шақырым жерде орналасқан ауыл округінде емдеу орнының бұрынғы ғимараты тозығы жетіп, ескірген болатын. Облыс әкімдігінің қолдауымен салынған медициналық мекеменің ашылу салтанатына облыс әкімінің орынбасары Жолдымұрат Аманбаев, облыстық қоғамдық денсаулық басқармасының басшысы Мұқан Егізбаев және жергілікті тұрғындар қатысты. Халыққа дәрігерлік көмек көрсетуге арналған жаңа емдеу-профилактикалық мекемесі заманауи медициналық жабдықпен толық қамтылған. Халық саны жеті жарым мыңнан асатын Қызылжар ауылдық округінің жаңа емдеу мекемесінде қырыққа жуық медицина қызметкері жұмыс істейді. Ашылу салтанатына қатысқан ауыл тұрғындары, енді дертіне дауа іздеп алысқа табан тоздырмайтындарын айтып, алғыстарын білдірді.
