Аталған жоба бойынша еліміздің барлық өңірінен жастар өздері тұратын ауданның немесе ауыл-аймақтың тыныс-тіршілігіне өзгеріс алып келуге тырысқан екен. Қатысушылар көше спортына арналған алаңды жабдықтау, жаңа аялдама тұрғызу, қоқыс тастайтын жәшіктер орнату, ауыл аллеясына жарық тарту сияқты өз ауласына қажетті түрлі урбанистикалық шешімдерді ұсынған. Нәтижесінде 600 жастың 100 жобасына шағын грант берілетін болды. Аталған жобаны ұйымдастыруға Азаматтық бастамаларды қолдау орталығы мен Жастар қызметкерлер қауымдастығы атсалысты.
«Бұл жобада біз екі мақсатты көздейміз. Біріншісі қызметкер жастардың құзыреттілігін арттыру болса, ал екіншісі – жастардың әлеуметтік жобаларына қолдау көрсету. Шілде айында 600 жасты іріктеп алдық. Олар 5-6 кішігірім топтармен өз жобаларын дайындады. Біз жастардың азаматтық ұстанымын дамытып, өздері тұрып жатқан жергілікті мекендердегі әлеуметтік, экологиялық мәселелерді байқап, шешімдерін ұсынғанын көздедік. Осылайша топтар өңірлердегі тәлімгерлерімен бірге өздерін қоршаған ортаға қандай да бір өзгеріс алып келуге тырысты», деді Жастар қызметкерлер қауымдастығының өкілі Айдар Хамит.
Жалпы, жоба екі бағытта жүзеге асырылды. Ұйымдастырушылар ең үздік әлеуметтік бастамаларды іріктеп қана қоймай, барлық өңірден қатысушыларға өз бастамаларын дайындауға көмектесіп, бағыт-бағдар берген тәлімгерлерді де даярлаған. Нәтижесінде барлығы 68 жастар ісі жөніндегі қызметкерлер таңдалып, арнайы оқытудан өтті. Тәлімгерлердің бірі Ақтөбе облыстық Жастар ресурстық орталығының басшысы Гүлнәр Кабиеваның айтуынша, қатысушыларды ауыл жастары мен жұмыссыздар қатарынан таңдауға тырысқан. «Республика бойынша тәлімгерлерге іріктеу болды. Жастармен тікелей жұмыс істегендіктен қызығушылық танытып, өтінім бердім. Оқу үш түрлі кезеңде жүзеге асты. Ақтөбе облысы бойынша таңдалған 5 тәлімгердің бірі болдым. Біздің өңірде іріктеуден өткен 72 жас қатысушы бар, олардан 14 топ құрадық. Менің жетекшілігімде болған үш топ дайындаған жобалар грант иеленді», деді Г. Кабиева.
Ақтөбе облысы Әйтеке би ауданының Қарақұдық ауылының қатысушылары футбол алаңын салуды ұсынған. Тәлімгердің айтуынша, олар жергілікті әкімшілікпен байланысып, аумағы мен жер телімі бойынша келісіп қойған, енді тек грантты күтіп отыр. Қатысушылар осылайша ауыл балаларының бос уақытын пайдалы өткізуі мен спортпен шұғылдану мәселесін шешуді көздейді. Ырғыз ауданынан қатысып жатқан өзге екі топ жеңіп алған қаражатын Ұ.Құлымбетов атындағы саябақты жөндеуге жұмсамақ. Бір топ саябақтың ішіндегі тозған орындықтарды ретке келтіріп, қоқыс жәшіктерін орнатуды және саябақты абаттандыруды қолға алғысы келеді. Ал екіншісі саябақ жанынан дене шынықтыруға, жаттығуға арналған спорт алаңын жасақтауды қолға алып отыр. Осылайша жастар аудан тұрғындарына жаңа демалыс орнын сыйламақ. «Жыл соңында өтетін фестивальде 100 жобаның ішінен үздік атанғандарының авторлары марапатталады. Ал біз тәлімгер ретінде жобамыз үздіктер қатарына іліксе қуанар едік. Сондай-ақ жоба әрі қарай жалғасын тапса жастар мен өңірлер үшін пайдалы болмақ. Келесі Волонтерлер жылында да өнімді жобаларды жүзеге асырамыз деп сенеміз», деді Ақтөбе облыстық Жастар ресурстық орталығының басшысы Г.Кабиева.
Ал Жамбыл облысынан келген тәлімгер, Байзақ ауданы Жастар ресурстық орталығының қызметкері Нұржан Есіргенов жобаға тәжірибе жинап, менторлық, тренерлік дағдыларын дамыту үшін қатысуға ниет білдіріпті. «Жамбыл облысынан ұсынылған 8 жобаның 6-ы соңғы кезеңге өтіп грант ұтып алды. Мен осы жеңіске жеткен 6 жобаның барлығының басы-қасында болып, жастарға мүмкіндігінше көмектесуге тырыстым», дейді ол. Жобалардың барлығы Байзақ ауданында қараша айының соңына дейін жүзеге асырылуы тиіс. Аудандағы таулы аймақтардың бірінде тұратын балалар мектепке басқа ауылға автобуспен барады екен, алайда халықаралық маңызды жол бойында және темір жол торабында орналасқан Үшбұлақ ауылында аялдама жоқ. Сол ауылдың балалары оқушылар үшін жаңа аялдама тұрғызып бермек. Тәлімгердің айтуынша, тағы екі жоба басқа ауылдарға тасымалданып оқитын шалғай ауылдардың балаларына арнап мектеп жанынан аялдама салуды көздейді. Жобалар арасында туған ауылын көркейтіп, саябағын ретке келтіретін тағы екі жоба бар екен. Сондай-ақ экологиялық мәселені шешуге бағытталған «Қолшатырға қоқыс сал» жобасы арқылы қатысушылар қоқыс жәшіктерін ерекше қолшатыр пішінде жасап, балаларды жақсы әдетке осылайша қызықтыруға тырысыпты.
Қызылорда облысы Қармақшы ауданы Жастар ресурстық орталығының басшысы Әділ Ыбрахим жобаның ауылдық мекендерді өзгертуге жастарға мүмкіндік беруі қызықтырғанын айтады. Сондай-ақ жоба республикадағы жастар ісі саласында қызмет ететін жастардың біліктігін арттыруды мақсат етуімен ерекше дейді ол. Бұл барлық аймақтағы әріптестердің танысып-білісуіне және өзара тәжірибе алмасуына таптырмас алаңға айналған. Қызылорда облысынан жалпы 7 жоба жеңімпаз атанған. Оның бірі Шиелі ауданында пластик қалдықтарын қайта өңдейтін мекеме салуды көздейді. Тәлімгердің айтуынша, бұл жобадан ұтып алған шағын грант кейбір қатысушылардың үлкен бастамаларына жол ашатын бастапқы инвестиция, жобаны жүзеге асыру барысында қатысушылар өзге қаражат көзін тартуға құқылы. Тағы бір бастамада қатысушылар осы Шиелі ауданында велотұрақ жасауды қолға алмақ көрінеді. Ал Қармақшы ауданы Бірлік ауылының жастары орталықта ескірген спорт алаңын қайта жөндеуге қаражат сұраса, Төменарық ауылының жастары көше спортына арналған алаң соққылары келеді. Жеңіске жеткен келесі бір жоба бойынша Жаңақорған кентінің өзінде орталық алаңда 50 метрлік жарық шамдар орнатылады. Ұйымдастырушылардың айтуынша, грант ұтып алған жобалардың ерекшелігі – бастамаларда жеке бастың мүддесінен қоғамның мүддесі жоғары қойылған. Бұл жобалардың жүзеге асуы жергілікті тұрғындардың игілігі үшін ғана емес, туған жерін жақсартуға титтей де бір өзгеріс алып келгенін сезінетін жастар үшін және осылайша айналаңды өзгерту өз қолыңда екенін түсінетін кейінгі ұрпақ үшін маңызды.
