Республикалық газеттердің үздік бестігіне «Егемен Қазақстан», «Жас Алаш», «Ана Тілі», «Казахстанская правда» және «Ұйғыр авази» басылымдары кірді. Аймақтық көшбасшылар арасында – «Жетісу», «Ақтөбе», «Огни Алатау», «Аq Jol», «Южный Казахстан» газеттері бар.
Ел бойынша барлығы 204 республикалық және 521 аймақтық газет жазылым бойынша таратылады. Жазылудың жалпы көлеміндегі республикалық басылымдардың үлесі 45%-ды, өңірлік басылымдардың үлесі 54%-ды құрады. Тираждың 1%-ы халықаралық мерзімді басылымдарға тиесілі. Қазақстандықтар Қазақстан, Ресей, Беларусь және Украинаның 3 мыңнан астам газет-журналдарына Қазпошта арқылы жазылу мүмкіндігіне ие.
Газет-журналға жазылу ауылдарда көп тіркелген. Ауыл тұрғындары облыстық, қалалық және аудандық басылымдарға жазылғанды (жалпы тираждың 58%-ы) жөн көреді. Жазылу бойынша Қазақстанның өңірлері арасында Алматы, Қызылорда, Қарағанды және Жамбыл облыстары көш бастап тұр.
«Статистика жазылу тиражының төмендегенін көрсетті. Өткен жыл қорытындысы бойынша жазылудың жалпы көлемі 127,8 млн. дананы құрады. Биыл қараша мен желтоқсан айларына жазылу әлі жалғасуда және жыл соңында көрсеткіштер шамалы өседі. Бірақ тұтастай алғанда өткен жылдың көрсеткішінен аспайды. Біз электронды басылымдарға көшудің қазақстандық статистиканы растайтын жалпы әлемдік тренд екенін түсінеміз», деді Қазпоштаның «Пошталық сервис» филиалының директоры Нұржан Жабаев.
Қазірдің өзінде 2020 жылға жазылу басталып кетті. Баспасөзге жазылуды кез келген Қазпошта бөлімшесінде ресімдеуге болады.
