Аймақтар • 31 Қазан, 2019

Атыраудың ауасы тазарады

183 реткөрсетілді

Онсыз да экологиялық ахуалы оңып тұрмаған Атырауда тағы бір проблема бар. Кәріз суы «Сасықсай» булану алаңына жеткенше тазартудың толық сатысынан өтпейді. Облыс орталығының санитарлық-эпиде­миологиялық жағдайына кері әсерін тигізетін бұл мәселені академик, эколог Мұфтах Диаров баспасөз бетінде жиі көтеріп жүр.

Ғалым: «Сасықсай» о баста 24 мың текше метр сұйық жинауға арналған еді, қазір кәсіпорындардан тәулігіне 60 мың текше метр сарқынды құйылады. Улы заттардың қорымына айналған полигон аумағы 8 есе ұлғайды», дейді.

Атауының өзі көп нәрседен хабар беретін бұл булану алаңының жабылатыны туралы облыс әкімі Нұрлан Ноғаев халыққа есеп беру жиынында айтқан еді. Қаланың сол жақ жағалауында салынып жатқан кәріз тазарту жүйесі құрылысының аяқталуын атырау­лықтар асыға күтіп жүр. 2017 жылы басталған кешен қазір аяқталып келеді. Алдағы жылы іске қосылуға тиіс.

Кешен құрамындағы негізгі кәріз айдау стансасын, тазаланбаған ағынды сулардың қондырғысын, биологиялық көлдер мен булану алаңдарының құрылысын тексерген облыс әкімі Нұрлан Ноғаев бұл жобаның өңірдің экологиялық қауіпсіздігінде маңызы зор екенін атап өтті. Жаңа кешеннің ерек­шелігі – ағынды суды тазартады, ал таза су көздері жер қабаттары мен жерасты сула­рының ластануына жол бермейді. Тазарған суды шаруашылық мақсатқа қайтадан пайдалануға да болады. Облыстық құрылыс басқармасының басшысы Мәлік Амановтың сөзіне сүйенсек, жаңа нысанның қуатын тәулігіне 100 мың текше метрге дейін жет­кізу жоспарланған.

Облыстық Экология департаментінің бас­шысы Абай Сафиннің айтуынша, 2021 жыл­дан бастап «Сасықсайға» лас су ағызу тоқ­татылып, аумағы қалпына келтіріледі. Бу­­ландыру алаңын рекультивациялау жұмы­сының басым бөлігін «Атырау мұнай өңдеу зауыты» жүзеге асырады. Жаңа кешен облыс орталығының сол жақ бөлігінің кәріз суын тазартады. Болашақта оң жағалаудан да осындай кешен бой көтереді, қазір осы мақсатта жобалау жұмыстары жүріп жатыр. «Бұл қоршаған ортаны қорғауға, ауа таза­лығын сақтауға оң ықпал етеді», дейді өңірдің бас экологы. 1978 жылы салынып, содан бері бірде бір рет күрделі жөндеу жүргізілмей, әбден тозығы жетіп тұрған «Сасықсайдың» дәурені осымен аяқталады.

Жыл басынан бері қала аумағында орна­ласқан НКОК компаниясының стансаларынан және Атырау мұнай өңдеу зауытының са­нитарлық-қорғаныс аумағынан ауаны лас­тауға қатысты 514 дерек тіркелген. «Әсі­ресе «Сасықсайдың» жанындағы «Вест ойл» стан­­­сасында атмосфералық ауаның өте көп лас­танғаны анықталды. Сараптама жұмыс­­тарының нәтижесінде ластану көзі кәріз сулары құйылатын булану алаңы екені анық­талды», дейді Абай Сафин.

«Қазгидрометтің» мониторингтік бақы­лауы нәтижесінде жасалған ауасы ең лас қалалар тізімін биылғы бірінші жарты­жылдықта Ақтөбе бастап, Қарағанды, Нұр-Сұлтан қалаларынан кейін Атырау жалғас­тырған. Мұнайлы аймақта бірінші санаттағы қауіпті кәсіпорындар саны 147-ге жетті. Бұл қоршаған ортаны қорғау шараларын әлі де жетілдіре түсу керектігін көрсетеді. Ал келер жылдан бастап іске қосылатын жаңа кәріз суын тазарту жүйесі Атыраудың лас ауасын тазартады деген үміт бар.

 

АТЫРАУ

 

Соңғы жаңалықтар

Жүз жыл

100 • Кеше

Тапа тал түстегі қарақшылық

Аймақтар • 20 Қараша, 2019

Ұқсас жаңалықтар