Елбасы Нұрсұлтан Назарбаев Түркістан облысына жұмыс сапарының екінші күні журналистерге берген сұхбатында осылай деді. Сондай-ақ Елбасы қарқынды жүргізіліп жатқан құрылыс нәтижесінде жаңа жұмыс орындары ашылып жатқанын атап өтті. Әсіресе халқы көп өңір жастарының жұмыспен қамтылуына мүмкіндік жасалуда. «Әлеуметтік нысандар, заманауи әуежай салынады. Су мәселесі, жол бойындағы қаланың инфрақұрылымы толық шешімін табады. Яғни, Қазақстанда тағы бір үлкен қала бой көтереді. Құрылыстарды аралап көріп риза болдым, көп жұмыс атқарылған.
Келесі жылы көрші Өзбекстан, Қырғызстан, Тәжікстан, Түрікменстан елдерінің басшыларын шақырайын деп отырмыз. Олар келісімін берсе, мүмкін Түркістанда саммит өткіземіз. Естеріңізде болса, Қ.А.Ясауи кесенесінің алдында Өзбекстанмен мәңгілік достыққа қол қойғанбыз. Жоспарлап отырған кездесуде сондай келісім жасайтын шығармыз», – деді Нұрсұлтан Назарбаев. Сонымен қатар Елбасы журналистер сұрағына орай Түркістанда туризмді дамыту бағытында қолға алынған жұмыстарға тоқталды. Қазба жұмыстары жүргізіліп, музейлер салынып, Самарқанд – Ташкент – Шымкент – Түркістан бағытында қатынас орнатылып жатқанын атап өтті.
Жұмыс сапары барысында Қазақстанның Тұңғыш Президенті – Елбасы Н.Назарбаев құрылысы аяқталған бірқатар нысандарда болды. Түркістандағы жаңадан ашылған Неке сарайының жұмысымен танысып, шаңырақ көтеріп жатқан жас отау иелерін құттықтап, бақыт пен береке тіледі. Тапсырыс беруші Қостанай облысы болып табылатын Неке сарайының құрылысы шілдеде басталған болатын. Құрылыс жұмыстарын «B-A Contractors SA» ЖШС жүргізіп, қазанда аяқтап отыр.
Елбасы жұмысымен танысқан Халыққа қызмет көрсету орталығын салуды Павлодар облысы міндетіне алған-ды. Нысан құрылысы жоспарланған мерзімде аяқталды. Ал еліміздегі ірі құрылыс компанияларының бірі «BI Group» холдингі Түркістанда бірнеше нысанның құрылысын аяқтап, әкімшілік-іскерлік орталық, «Нұр-Сұлтан» алаңы және «Алатау» медиа орталығын пайдалануға берді. Қаладағы ең басты жоба саналатын әкімшілік-іскерлік орталықтың бір ерекшелігі – айрықша сәулетінде. Облыстық әкімдік, басқармалар мен департаменттер орналасатын ғимарат қос қасбеттен тұрады: біріншісі – HPL-панельдер, екіншісі – ұлттық ою-өрнек түріндегі фибробетон. Мамандардың сөзіне қарағанда, қос қасбет негізінен ыстық аймақтарда жиі қолданылады, өйткені ол қараңғылық әсерін беріп, ғимаратты күннің ыстық сәулесінен қорғайды. Дизайнында көркем паркет, сәндік панельдер, ерекше факторлы мәрмәр қолданылған. «BI Group» холдингі директорлар кеңесінің төрағасы Айдын Рахымбаевтың айтуынша, әкімшілік-іскерлік орталығында сейсмикалық нормалар ескерілген. Ғимараттардағы жылыту, желдету және салқындату жүйелері автоматтандырылған.
Сыртқы желілер бойынша жобаны әзірлеуде электр мен жылу өндіруге арналған қондырғылар орнатылыпты. Жұмыс барысында артық шығындар болмауы үшін үнемді өндіріс технологиясы қолданылған. Құрылысшылар екі ауысымда жұмыс істеп, жобаны мерзімінен бір ай бұрын тапсырған. Компания құрылысын жүргізген тағы бір нысан – «Нұр-Сұлтан» алаңының жалпы ауданы – 54 000 шаршы метр. Оның 30 000 шаршы метрі көгалдандырылып, ағаштар отырғызылған, аспанға атылған су ағыны мың құбылып, тұман, гейзерлердің бейнесін жасайтын субұрқақ орнатылған. Компания мұндай субұрқақты бүкіл өңір бойынша қолдануға ниетті. Сонымен қатар «BI Group» холдингі қалада жергілікті БАҚ қызметі үшін салынған, заманауи құрылғылармен жабдықталған екінші ауқымды жоба – «Алатау» медиа орталығын салды. Елбасы өңірлік БАҚ өкілдеріне арналған жұмыс бөлмелерін аралап көрді. Журналистерге арналған 4 қабатты ғимаратта 200-ден астам адам жұмыс істей алады. Медиа орталықта конференц-зал, телестудия, гример, аудио және видеомонтаж орындары, редакциялар мен әкімшіліктің кеңселері, брифинг-орталық, фуд-корт қарастырылған. Ал ғимараттың қасбеті күн жылуын 70%-ға дейін өткізбейтін энергия үнемдейтін шыныдан жасалған, яғни қыс мезгілінде ғимарат ішінде жылуды сақтап, ал жазда жайлы қоңыр салқын ауа қалыптастырады. Жалпы құрылыс компаниясы Түркістанда 7 маңызды нысанды салуда, оның ішінде «Ұлы дала» мұражайы, «Hampton by Hilton» қонақүйі және 7000 орынды футбол стадионы бар.
Сондай-ақ жұмыс сапары барысында Елбасы Түркістан облыстық әкімдігінің жаңа ғимаратында Nur Otan партиясы филиалының халық пен билік арасын жақындату бағытында қолға алған жобасымен танысты. Облыс әкімі, Nur Otan партиясы Түркістан облыстық филиалының төрағасы Өмірзақ Шөкеев тұрғындардың өтініші мен құқықтары әрдайым басты назарда болатынын жеткізді. Ал жобаның жұмысымен Елбасын партияның облыстық филиалы төрағасының бірінші орынбасары Бейсенбай Тәжібаев таныстырды. Мұнда партия халықты ашық форматта қабылдайды. Арнайы қоғамдық қабылдау бөлмелерінде тұрғындардың талап-тілегі тыңдалып, арыз-шағым, өтініштер бойынша тиісті жұмыстар жүргізіледі. Сонымен бірге құқық қорғау органдары мен тұрғындар жиі сұрақ қоятын әлеуметтік саланың өкілдері де тұрғындарға көмектеседі. Әрбір азаматтың шағымы пост-терминал арқылы қабылданады. Барлық өтініштер партия тарапынан тұрақты қадағалануға алынады. Бұл жаңа бастама ашық әкімдік жобасын жандандыру мақсатында қолға алынып отыр. Б.Тәжібаевтың айтуынша, бүгінде Nur Otan партиясының Төрағасы Нұрсұлтан Назарбаевтың «Сенім. Диалог. Болашаққа нық қадам» – Nur Otan партиясының 7 серпіні» бағдарламасы аясындағы тапсырмасына сәйкес өңірде жүйелі жұмыс атқарылуда. «Open space» форматында ашылған Қоғамдық қабылдау кеңсесі жаңа ғимаратқа көшірілген. Лауазымды тұлғалар тұрғындарды тұрақты түрде қабылдап, мәселелер шешімін табуда. Мысалы, биыл қаңтар-қазан айлары аралығында партия филиалының барлық Қоғамдық қабылдау бөлмелеріне түскен 6047 арыз-шағымның 2358-і (39%) оңтайлы шешілсе, 3611 өтінішке заң аясында кеңестер берілген. Сондай-ақ кәсіпкерлерге заң жүзінде кеңес беріп, арыз-шағымын тыңдайтын қоғамдық бизнес-қабылдауы да іске қосылған.
Айта кетелік, бүгінде Түркістан облысында Nur Otan партиясының 90 мыңға жуық мүшесі бар. Өңірде 255 бастауыш партия ұйымына талдау жүргізіліп, 2,5 мыңнан аса адам партия қатарынан шығарылған. Жаңадан бес бастауыш партия ұйымы ашылып, кәсіпорын мен шаруашылық ұйымдарының өкілдері партия қатарына тартылды. Осы жылдың соңына дейін ашылатын бастауыш партия ұйымдарының санын онға жеткізу жоспарланып отыр.
Қазақстанның Тұңғыш Президенті Түркістанға жұмыс сапары кезінде қаладағы жаңа нысандардың құрылыс қарқыны жоғары екенін айтты, бұл орайда облыс әкімдігінің еңбегі де елеусіз қалмады.
Түркістан облысы
