Ақтауда «Қазақтану» жобасын жүзеге асыру мақсатында «Mәміле» пікірсайыс клубы ашылды. Аталмыш клубтың «Достық» үйіндегі салтанатты ашылуына тәжірибелі қазақ тілі мұғалімдері, этномәдени бірлестік өкілдері, қазақ тілін үйренуге ниет білдірушілер қатысты.
Екі топ арасында диалог орнатып, қазақ тілін дамыту мақсатындағы клуб жұмысына барлық ниет білдірушілер келіп, өздерінің мемлекеттік тілді үйренудегі машықтарын дамыта алады.
Клуб отырысына қатысушылар жоба жетекшісі Қанат Тасыбековтың «Ситуативті қазақ тілі» атты әдісімен тіл үйреніп қана қоймай, қоғамдық-саяси мәселелерді де талқыға салады. Сонымен қатар, «Мәміле» клубында кітаптар, дәптерлер міндетті емес және грамматиканы жаттау болмайды. Оның орнына қазақ тілінде түрлі қызықты әңгімелер мен ойындар ұйымдастырылады. Ұйымдастырушылардың айтуынша, бұл бұрынғы қалыптасқан әдіске қарағанда анағұрлым ұтымды және тілді игеруге жеңіл соқпақ. Өйткені үйренушілер өзін еркін сезініп, сабақ тартымды да қызықты өтеді.
– Елбасы – Тұңғыш Президент Нұрсұлтан Назарбаевтың төрағалығымен өткен Қазақстан халқы Ассамблеясының ХХVІ сессиясында қазақ тілін, мәдениетін, тарихын насихаттауға бағытталған «Қазақтану» жобасын жүзеге асыру баса айтылған болатын. Осы жобаның басты міндеті – қазақстандық этностар арасында қазақ халқының гуманитарлық және адамгершілік қағидаттарын қалыптастыру, Қазақстан халқының бірлігі мен достық дәстүрлерін ұрпақтан-ұрпаққа жалғастырудың жүйесін құру. Біздің «Мәміле» клубын ашудағы мақсатымыз – Елбасы тапсырмаларын жүзеге асыру және ана тіліміз – қазақ тілінің қолданыс аясын кеңейту, – деді «Мәміле» қоғамдық қорының директоры Қанат Тасыбеков.
Шара соңында клубтың сабағы да басталып, ұйымшылдық, ынтымақтық сезімдерді ояту сабақтарының алғашқы сағаты ойдағыдай өтті.
Маңғыстау облысы
