Қоғам • 14 Қараша, 2019

Отандық журналистиканың өзекті мәселелері талқыланды

77 реткөрсетілді

Елордада Қазақстан халқы Ассамблеясының ұйым­дастыруымен «БАҚ және қоғамдық келі­сім» тақырыбында IV халық­аралық форум өтті.

Форум жұмысына Қазақ­стан халқы Ассамблеясы Төраға­сының орынбасары – Президент Әкімшілігі Қазақстан халқы Ассамблеясы Хатшылығының мең­герушісі Жансейіт Түйме­баев, Түркия, Әзербайжан, Өз­бек­стан мемлекеттерінен кел­ген­ халықаралық сарапшылар мен шолушылар, депутаттар, мемлекеттік органдардың өкіл­дері, Қазақстан халқы Ассамб­леясының мүшелері, республи­калық және аймақтық БАҚ-тың бас редакторлары қатысты.

Жиынды бастамас бұрын Жансейіт Түймебаев Қазақ­стан халқы Ассамблеясы Журналис­тер клубының жаңа төрағасын таныстырды. Қоғамдық негіздегі бұл жұмысты бұдан былай белгілі журналист, «Kazakh TV» ұлт­тық арнасының директоры Майя Бекбаева атқарады.

– Бүгінгі басты мәселе – қоғамдағы тұрақтылық пен этнос­аралық келісім, әлеумет­тік бірлікті нығайтуда журналис­тер қауымы алдында тұр­ған міндеттерді ортаға салу. Ел­басы Нұрсұлтан Назарбаевт­ың Қазақ­стан халқы Ассамблея­сының қызметін тұрақты түр­де ақпараттық қолдауға қатыс­ты арнайы тапсырмасы бар. Президент Қасым-Жомарт Тоқаев өз Жолдауында әлеу­мет­тік және этностық топтар ара­сындағы келісімді нығайту жөнінде тапсырма берген болатын. Осы орайда отандық журналистика үшін қоғамдық келісімді дамыту, арандатушы ақпараттарға қарсы иммунитетті қалыптастыру және қоғам бір­лігін сақтау тақырыптары өте маңызды, – деді Жансейіт Түймебаев.

Қазақстан халқы Ассамб­леясы Төрағасы орын­басарының айтуынша, мемлекеттік тілдің мәртебесін көтеру мәселесінде де БАҚ өкілдерінің атқаратын рөлі айрықша. Сондай-ақ алдағы жылы аталып өтілетін Қазақстан халқы Ассамблеясының 25 жыл­дығы, Абай Құнанбай­ұлының 175 жылдығы, Әбу Насыр әл-Фарабидің 1150 жылдығы сынды мерейлі даталар төртінші билік өкілдерінің назарынан тыс қалмасына сенім білдірді.

– Бүгінде журналистиканың мәні мен бағыт-бағдары қатты өзгерді. Ақпараттық агенттіктер мен құрылымдар қоғамды ақпа­раттандырудан гөрі қоғамға белгілі мақсатта ықпал ету үшін жұмыс істейді. Сондықтан тәуелсіз журналистиканың жағ­дайы күн өткен сайын қиын­­дап келеді. Жаһандану кезін­де, көлік және байланыс технология­ларының дамыған уақытында өмір сүріп жатқан соң, түрлі оқиғалардың астарына үңілуге мәжбүр боламыз. Сол себептен журналист кез келген оқиғаның түпкі мәніне үңіліп, көзқарасын оқырман мен көрерменге жеткізу үшін байланыс технологияларын толық игеріп алуға міндетті, – деді Түркияның «Әуелі Отан» газеті­нің бөлім редакторы Кемал Саллы.

Түркиялық журналист жаһан­дық жағдайларды басқа қырынан көрсету мақсатында Тұңғыш Президент Нұрсұлтан Назарбаевтың тәжірибесін әлем елдеріне таныту үшін бірнеше мақала жазғанын да жасырмады. 1920-жылдары Түркияда ұлт-азаттық соғыс жүріп жатқан кезде «Алыстағы бауырыма» деп жырлаған қазақ ақыны Мағжан Жұмабаевтың, одан жүз жылдан кейін сындарлы саясатын жүргізе білген Нұрсұлтан Назарбаевтың бауырмалдығын түрік халқы ешуақытта ұмыт­пайтынын жеткізді.

Форумның пленарлық отырысында отандық журналистер, халықаралық сарапшылар мен шолушылар баяндама жасап, пікір алмасты. Қатысушылар назарына Қазақстан халқы Ассамб­леясының биылғы жұмысының жарқын сәттері бейнеленген «Ас­самб­леяның бір жылы» та­қы­ры­бындағы фотокөрме ұсы­нылды.

Сондай-ақ форум жұмысы­ның соңында мемлекет саясатын ақпараттық тұрғыда қол­дауға, қоғамдық келісім мен жал­пы­ұлттық бірлікті нығайтуға, Қазақстан халқы Ассамблея­сының қызметін насихаттауға үлес қосқан журналистерді қолдау мақсатында ұйымдас­тырылған дәстүрлі «Шаңырақ» республикалық байқауының жүлдегерлері марапатталды. Байқаудың арнайы жүлдесі биыл ірге қалағанына 100 жыл толуына орай «Egemen Qazaqstan» рес­пуб­ликалық газетіне тапсырылды.

 

Соңғы жаңалықтар

Жаңғырған Жамбыл өңірі

Аймақтар • Бүгін, 06:58

Баға QR кодтар арқылы беріледі

Медицина • Бүгін, 06:53

Рухани рәуіштегі тарту

Аймақтар • Бүгін, 06:52

Тұрар тағдырының тағылымы мол

Руханият • Бүгін, 06:32

Орынбор және қазақ зиялылары

Руханият • Бүгін, 06:30

Ел ертеңі – жалынды жастар

Президент • Бүгін, 06:16

Ауыр атлеттер Катарға аттанады

Ауыр атлетика • Кеше

Көпбалалыларға көмек

Аймақтар • Кеше

Ұқсас жаңалықтар