Ішкі істер музейі мерейтойын атады

Аймақтар • 18 Қараша, 2019

СҚО Полиция департаментінің музейі мерейтойын атап өтті

Солтүстік Қазақстан облыстық Полиция департаментінің музейіне 30 жылда 45 мың адам экскурсияда болған екен. Музей экспонаттарында терістіктегі құқық қорғау органдарының үш ғасырлық тарихы сақтаулы. Ондағы барлық жәдігерлер 5 мыңнан асады. 2015 жылы полиция музейінің жанында алғаш рет қару-жарақ бөлмесі де ашылды.

Жақсыбай САМРАТ

Отыз жылдық мерейтойдың салтанатты шарасы Жастар сарайында өтті. Онда музей жәдігерлерінің көрмесі ұйымдастырылып, оның жұмысы жайлы фильм көрсетілді. Мерейтоймен құттықтауға астанадан және Алматы облысынан әріптестер келді. Республикалық ІІМ музейінің меңгерушісі Алмагүл Сатмағамбетова жастарға музейдің полиция қызметкерлерін қазақстандық патриотизм, антына және қызметтік парызына деген сенім рухында тәрбиелеудегі рөлі жайлы айтып кетті. «Мұндағы әрбір жәдігер – бір адамның ғана емес, тұтас дәуірдің тағдыры, әрқайсысы ел тарихында өз батырларының есімін қалдырады», - деді қонақ.

СҚО әкімдігінің Мәдениет, мұрағаттар және құжаттама басқармасының басшысы Құралбек Атамұратов ІІО ардагерлері және полиция қызметкерлеріне облыс әкімі Құмар Ақсақаловтың құттықтауын оқып, «Музей үш ғасырлық тарихы бар қойма ғана емес, тәжірибемен, біліммен және қалыптасқан дәстүрлер, рухани құндылықтармен алмасатын баға жетпес орда» деді. Өңірлік Полиция департаментінің бастығы, полиция полковнигі Марат Төлебаев: «Жас қызметкерлерге рухани-патриоттық тәрбие берудегі музейдің рөлі орасан зор. Антына адал болудың, Отанға тынымсыз қызмет етудің, ерліктің, батылдықтың үлгілері тәртіп сақшыларын жігерлендіріп келеді. Алғашқы погондарды табыстау, ант қабылдау сияқты тәрбиелік мәні зор іс-шаралар ведомстволық музейде салтанатты түрде өткізіледі», - деп атап өтті.

Салатанатты шара барысында музейдің меңгерушісі, отставкадағы милиция подполковнигі Любовь Осинскаяға және музей қызметкері, отставкадағы милиция подполковнигі Нина Бенграфқа алғыс хат пен төс белгілер табысталды.