9 айдағы негізгі әлеуметтік-экономикалық индикаторларды қорытындылаған өңір басшысы облыста өнеркәсіп өсімі 5,3% құрағанын айтты. 2024 жылға қарай тартылатын инвестиция көлемі болжам бойынша 2,7 есе артып, 1,6 трлн теңгеге жетеді деп күтілуде. Спикердің сөзіне сүйенсек, аймақта жалпы құны 140 млрд теңге болатын 25 жоғары технологиялық инвестициялық жоба іске асырылып, 2 мыңнан астам жаңа жұмыс орны ашылады. Ірі жобалардың қатарында жылына 5 млн тонна алтын шығаратын «AltynEx» АҚ-тың тау-кен металлургиялық комбинатының құрылысы бар. Инвестициялық жобаның құны – 148 млрд теңге. 38 млрд теңгеге 4.0 Индустриясының тұжырымдамасына сай «Орыс мыс компаниясы» АҚ байыту фабрикасын жаңғыртуды аяқтамақ.
– Инвестициялық жобалардың тізіміне «Қазхром» ТҰК» АҚ тазартылған феррохромның шөгінді қожын қайта өңдейтін фабрика салу, «Green Capital Kazakhstan» ЖШС бесінші буын жылыжайының жобасын әрі қарай кеңейту сынды жобалар кіреді. Балама энергетика саласы бойынша «ArmWind» ЖШС жылына 48 МВт қуат беретін «Бадамша» жел электр стансасының бірінші кезегін іске қосады. Инвестиция ағынын көбейту мақсатында қосымша 500 млрд теңгеден астам қаражатқа кем дегенде 15 мың жаңа жұмыс орнын ашу көзделген. Сондай-ақ «Еуразия» арнайы экономикалық аймағы мен түрік инвесторының «GOSB» индустриалды паркін құру жұмыстары жалғасып жатыр, – деді О.Оразалин.
Әкім арнайы экономикалық аймақ тиімділігі жоғары өндірісті дамытуға, сыртқы жəне ішкі инвестицияны тартуға, экспортты ынталандыруға, импорт алмастырушы өндірістерді өркендетуге, сол секілді жергілікті мазмұндағы өнім үлесін арттырып, халықты жұмыспен қамтуға мүмкіндік береді дейді. 700 гектарды алатын өнеркәсіп алаңында 50 шағын, орта жəне ірі кəсіпорын құрылатын болады.
Doing Business рейтингінде Ақтөбе облысы бизнесті жүргізу жағынан республика бойынша үшінші орында тұр. О.Оразалиннің айтуынша, өңірде «Жол картасы -2020» бағдарламасы сәтті іске асырылып келеді. Биыл 3,3 мың адам бизнес негіздерін үйреніп, олардың 650-ден астамы несие мен грант иеленді. Аталған салада 144 мың ақтөбелік еңбек етуде.
Жыл басынан бері аймақ шаруалары 199,9 млрд теңгеге ауыл шаруашылығы өнімін өндірді. Бір адамға шаққанда еңбек өнімділігі 1,4 млн теңгені құраған.
Облыста суармалы жерді 3,5 есе немесе 100 мың гектарға дейін ұлғайту көзделген. Ақтөбе аймағындағы су ресурстарының әлеуетін арттыру үшін 32 су қоймасы салынады.
О.Оразалин тұрғын үй құрылысы саласын қарқынды дамытудың тиімді жұмыстары қолға алынғанын айтады. Ол соңғы бес жылда барлық қаржы көздерінен 3,3 млн шаршы метр пайдалануға беріліп, 28 мыңнан астам отбасы баспанамен қамтылғанын жеткізді. Биыл «Нұрлы жер» бағдарламасы бойынша 939,5 мың шаршы метр тұрғын үй беру жоспарланған.
