Айтулы спортшының қандай да құрметке лайық екені даусыз. 30 қарашада 33 жасқа толғалы отырған Ольга Сергейқызы үш қарғып секіру жаттығуы бойынша Олимпия ойындарында үш мәрте жеңіс тұғырына көтерілді. Атап айтсақ, 2008 жылы Бейжіңде – күміс, 2012 жылы Лондонда – алтын, 2016 жылы Рио-де-Жанейрода – қола медальді мойнына ілді. Әлем чемпионатында бір күміс пен қос қоланы олжалады. Жабық ғимаратта өткен дүниежүзілік додада алтыннан алқа тағынып, тағы екі мәрте жүлдегерлер санатына қосылды. Азия ойындарында төрт рет теңдессіз деп танылды. Оның басқа да толып жатқан атақтары тағы бар.
Даңқты отандасымыздың ел спортына сіңірген еңбегі мемлекет тарапынан да жоғары бағаланып, ол «Парасат», екінші дәрежелі «Барыс» және «Құрмет» ордендерімен марапатталды. Міне, енді Ольга Рыпакова құрамына 2012 мемлекеттің ұлттық федерациялары енген белді ұйымның мүшесі болып отыр.
