Жол оқиғасынан зардап шеккен бойжеткен ауыр хәлде қалалық аурухананың жарақат бөліміне жеткізілген. Дәрігерлердің диагнозы – бас сүйек мен оң бұғана сынығы, бас-ми ашық жарақаты. Жағдайы ауыр.
«Жол көлік оқиғасын жасаған полиция аға лейтенанты Р.Баймұқашевқа қатысты Қылмыстық кодекстің 345-бабы 2 бөлімі бойынша іс қозғалып, сотқа дейінгі тергеу жұмыстары басталды. Азаматтардың қауіпсіздігін қамтамасыз етуі тиіс полиция өкілінің қызмет кезінде мұндай оқиғаға жол беруі – өте өрескел жағдай. Сондықтан қызмет тәртібін өрескел бұзған қызметкер тәртіптік кеңестің шешімімен ішкі істер органдарынан шығарылды. Сондай-ақ оның тікелей командирлері мен басшылары тәртіптік жауапкершілікке тартылды» делінген Батыс Қазақстан облыстық Полиция департаменті таратқан баспасөз парағында.
БҚО полиция департаментінің бастығы генерал-майор Махсудхан Әбләзимов жол-көлік оқиғасынан зардап шеккен Лариса Бейісованың туған-туыстарынан өз қызметкері үшін кешірім сұрап, Ларисаның тезірек жазылып кетуі үшін барынша көмек көрсетілетінін хабарлады.
Осы оқиғаны бейнежазбаға түсіріп, департамент бастығынан интервью алмақ болған блогер Айболат Бөкеновке қатысты да әкімшілік іс қозғалғаны белгілі болды. А.Бөкенов бұған дейін де полиция қызметкерлері тарапынан жасалған заң бұзушылықтарды әшкерелеп, бейнежазба жариялап жүрген танымал тұлға болатын. Өзінің айтуынша, бір жыл ішінде 87 полиция қызметкерінің жол ережесін бұзғанын видеоға түсіріп, заң алдында жауап беруге мәжбүрлеген. Бірақ полиция А.Бөкеновтің де бірнеше мәрте әкімшілік жауапкершілікке тартылғанын, соңғы оқиға болатын кезде де жеңіл дәрежеде мас болып, полиция қызметкерлерінің талабына бағынбағанын хабарлады.
2019 жылдың басынан бері БҚО Полиция департаментінің жеке құрам бойынша инспекциясы қызмет тәртібі бұзылған 113 оқиғаны анықтап, кінәлілерді әкімшілік жауапкершілікке тартқан екен. Соның 60-ы – жол ережесін бұзу оқиғасы. 5 қызметкер ішкі істер органдарынан шығарылған.
