Аталған аумақта алғаш рет өтіп отырған халықаралық оқыту іс-шарасын Амстердам жаһандық денсаулық сақтау және даму институты (AIGHD), Қазақ дерматология және инфекциялық аурулар ғылыми орталығы, AFEW Kazakhstan және AFEW International коммерциялық емес ұйымдары өткізді.
«Семинар өткізуге қосылып отырған AFEW International коммерциялық емес ұйымы Шығыс Еуропа және Орталық Азия аймағында 20 жылға жуық жұмыс істейді және аймақтағы АИТВ, туберкулезге және гепатитке қатысты деректердің үлкен жетіспеушілігін үнемі бастан кешіріп келеді. Бұл деректер ауруларға қарсы күрес стратегиясын құруда өте маңызды. Семинардың мақсаты – аймақтағы зерттеулерді дамытуды ынталандыра отырып, әртүрлі елдердің жетекші ғалымдары мен болашақта аймақтағы денсаулық сақтау және зерттеу мәселелерінде көшбасшылық таныта алатындар арасындағы ынтымақтастық құруға жәрдемдесу», дейді INTERACT-2019 семинарының халықаралық ұйымдастыру комитетінің мүшесі және AFEW International атқарушы директоры Анке ван Дам.
Жоғарыда атап өткендей, Шығыс Еуропа және Орталық Азия – АИТВ індеті әлі де жылдам қарқынмен таралып келе жатқан әлемдегі жалғыз аймақ. ЮНЭЙДС-тің бағалауынша, 2018 жылғы жағдай бойынша Шығыс Еуропа және Орталық Азия аймағында 1,7 миллионға жуық адам АИТВ-ахуалды екендігі анықталған. 2018 жылы шамамен 38 мың адам ЖИТС-тен қайтыс болған.
Екі күндік семинар ШЕОА аймағына, оның ішінде Қазақстанға тікелей қатысы бар тақырыптарға, атап айтқанда, АИТВ індетіне қарсы тұрудың жаңа табыстары мен мол тәжірибесіне арналды.
Алматы қаласындағы екі күндік семинарға Қазақстан, Ресей, Украина, Беларусь, Өзбекстан, Қырғызстан, Тәжікстан, Грузия және басқа да елдерден белгілі зерттеушілер жиналды. Семинарға қатысушылар ғылыми базаны күшейту және аймақтағы жағдайды жақсарту мақсатында АИТВ, туберкулез (ТБ), гепатиттерді емдеу жөніндегі соңғы ғылыми зерттеулермен бөлісіп, тәжірибе алмасты.
«ШЕОА INTERACT ғылыми пікірталаста, тәжірибе алмасуда туындаған мәселелерді талқылауда тиімді форум болды деген ойдамын. Алдағы және ұзақ мерзімді келешекке қажетті тұстарды анықтап, осы мәселелерде жаңа әдістермен, зерттеулермен, тың тәсілдермен танысуға мүмкіндік берді. Тараптардың жұмыстары лайықты бағаланып, кері байланыстар жолға қойылады. Ғылыми орта мен одан әрі ынтымақтастық пен инвестициялау географиясы кеңейтіледі. Бұл жұмыс ЮНЭЙДС 90-90-90 мақсаттарына қол жеткізу үшін қажет», дейді ШЕОА INTERACT-2019 семинарының жергілікті комитетінің басшысы, Қазақ дерматология және инфекциялық аурулар ғылыми орталығының директоры Бауыржан Байсеркин.
Аса маңызды халықаралық шараға Шығыс Еуропа мен Орталық Азиядағы АИТВ/ЖИТС жөніндегі БҰҰ Бас хатшысының арнайы елшісі Мишель Казачкин (Франция), Амстердам университетінің Жаһандық денсаулық сақтау кафедрасының доценті (Нидерланд) және Канададағы Макгилл университетінің профессоры Кэтрин Хенкинс, Минскідегі «Психиатрия-наркология» облыстық клиникалық орталығының бас дәрігері Алексей Александров (Беларусь), AFEW International атқарушы директоры Анке ван Дам (Нидерланд) сынды ықпалды тұлғалар қатысты.
Халықаралық ұйымдастыру комитеті ШЕОА INTERACT-2019 семинарына дайындық барысында инновациялық тәсілдерді пайдаланып, оқыту бағдарламасы әлемнің түрлі елдерінен АИТВ, ТБ және гепатит саласындағы белгілі сарапшыларды қамтыды.
Алдағы уақытта барлық елдердің ғалымдарына өз жаңалықтарын көрсетуге мүмкіндік беру үшін ШЕОА INTERACT жыл сайын өткізілетін іс-шараға айналып, ШЕОА аймағының түрлі мемлекеттерінде өтетін болады.
АЛМАТЫ
