Бес мың жанкүйер тамашалаған ойынды жерлестеріміз тамаша бастады. Бірінші кезеңнің 14-минутында Аркадий Шестаков ойыншылар санының басымдығын пайдаланып, командасын есепте алға шығарды. Екінші кезеңді де жоғары деңгейде бастаған «Барыс» ойыншылары 35-минутта таблодағы есепті еселей түсті. Шайба авторы – Павел Акользин.
Екі шайба артықшылығымен алда тұрған «Барыс» хоккейшілері тым еркінсіп кетті ме, әйтеуір екінші кезең соңында қақпасына гол өткізіп алды. Томаш Зогорнаның шайбасынан кейін есеп 2:1-ге қысқарды. Ал үшінші кезең басталған бетте «Амур» ойыншысы Ондржей Витасек мергендігімен көзге түсіп, есепті теңестіріп кетті.
Дегенмен овертаймда Хабаровскіден келген хоккейшілердің бағы жанды. 64-минутта Игорь Руденков гол соғып, командасына жеңіс сыйлады. Қорытынды есеп – 2:3. «Барыс» келесі ойынын бүгін Магнитогорскіде жергілікті «Металлург» командасына қарсы өткізеді.
