Осы қуанышқа арнайы келіп, тұрғындарды мерекемен құттықтаған облыс әкімі Жеңіс Қасымбек Елбасының Теміртау қаласының дамуына үнемі ерекше көңіл бөліп келе жатқанын атап өтті.
– Тұңғыш Президент күні сіздердің отбасыларыңыз үшін қоныс тойын тойлаған ерекше күнге айналды. Тәуелсіздік жылдары тұрғын үймен қамтамасыз етуге бағытталған 10-нан астам мемлекеттік бағдарлама жасалды. Олардың ішінде «Нұрлы жер», «7-20-25», «Бақытты отбасы», «Қолжетімді баспана 2020» және басқалар бар, – деген өңір басшысы Теміртауда келесі жылы 150 пәтерлі үш үй салынатынын мәлім етті. Бұдан бөлек, металлургтер қаласында Елбасының тапсырмасы бойынша жаңа дене шынықтыру-сауықтыру кешені мен аурухананың құрылысы жүргізіліп жатыр.
Баспаналы болудың бақытына бөленгендердің бірі – арбаға таңылса да арманы асқақ өнерпаз,«Жұлдызды сәт» конкурсының жеңімпазы Арман Қарынсау.
– Біздің тұрғын үй кезегінде тұрғанымызға биыл 10 жыл болды. Міне, бүгін арманымыз орындалып, баспаналы болдық. Бұған дейін бүкіл отбасымызбен туысқанымыздың үйінде тұрып келдік. 2019 жыл біздің отбасы үшін сәтті болды, – деген ол өзінің отбасы атынан облыс және қала басшылығына алғыс сезімін жеткізді.
Сол күні кешке қарай Теміртаудың мәдениет үйінде мерекелік концерт ұйымдастырылды. Қала тұрғындары мен қонақтары қазақ эстрадасының жұлдыздары мен Қали Байжанов атындағы концерттік бірлестік әртістерінің өнерін тамашалады. Сонымен қатар, теміртаулықтардың алдында таяуда өткен Junior Eurovision байқауында 2-орын алған Ержан Максим ән шырқады.
Айта кету керек, Тұңғыш Президент күні мерекесінде облыстың басқа да қалалары мен аудандарында тұрғындар баспаналы болып, қоныс тойын тойлады. Мысалы, Жезқазған, Сәтбаев және Приозерск қалаларында, Бұқар жырау, Ақтоғай, Абай және Шет аудандарында тұрғын үй кезегінде тұрған азаматтарға пәтерлердің кілттері табыс етілді. Сонымен қатар, облыс орталығында жаңа медициналық орталық пен Шахтинск қаласында жекеменшік балабақша пайдалануға берілді.
