Өткен тарихына ерекше мән беретін дидарлықтар салтанатты шараның бас жағында кезінде мекеме қабырғасында еңбек еткен, бүгінде өмірден өтіп кеткен ардагерлерді құрметпен еске алып, тағзымның өнегелі үлгісін көрсетті.
Мерейтойдың ашылуында Жезқазған қаласының әкімі Қайрат Бегімов құттықтау сөз сөйлеп, «Дидар» арнасының директоры Базарбай Әлеуханұлына телеұжымға арналған ақшалай сертификатты табыс етті. Сонымен қатар қала басшысы «Жезқазған қаласына – 65 жыл» мерекелік медалімен Сапабек Абайділденов, Әсия Айдарбекова, Шұға Нұрмағамбетова, Тоғанбай Құлманов, Аманжол Үсенов, Жұпар Әлкенова сынды ардагерлерді марапаттады. Ал ардагерлердің тағы бір тобы – Мақсұт Сексенбаев, Ирина Келлер, Аманкүл Арымбековаға құрмет грамоталарын табыс етті.
Сондай-ақ Қарағанды облыстық ішкі саясат басқармасының идеологиялық жұмысты ұйымдастыру бөлімінің басшысы Әйгерім Исбекова өңір басшысы Жеңіс Қасымбектің құттықтауын жеткізіп, телеарнаның бір топ қызметкерін облыс әкімінің құрмет грамотасымен марапаттады. Олардың арасында телеарнаның бүгінгі қызметкерлері Махмұд Сексенбаев, Төлеш Сүлейменұлы, Мақпал Орынбетова, Елдос Кәкенов, Базарбай Әлеуханұлы болды.
Бұдан кейін сахна төріне осы тойға арнайы келген қонақтар көтеріліп, телеарна ұжымына ақжарма тілектерін арнады. Мысалы, Қазақстан Журналистер одағының төрағасы Сейітқазы Матаев «Дидарды» ұзақ жыл абыроймен басқарып келе жатқан Базарбай Әлеуханұлын «Қазақстанның Құрметті журналисі» атағымен марапаттап, білікті басшы, мықты менеджерге лайықты құрмет көрсетті.
Құттықтау тілектерінің ара-арасында мерейтой қонақтары алдында арнайы келген және жергілікті өнерпаздар күй тартып, ән шырқады, би билеп көрермен қауымның көңілін көтерді. Әсіресе тойшыл қауым қазаққа танымал әнші Қорабай Есеновтің, дәулескер күйші Жанғали Жүзбаевтың және «Мақпал» ансамблі бишілерінің өнеріне тәнті болды.
Телеарнаның бұл тойында Ұлытау-Жезқазған өңірінде «Дидар» деген есімді иеленген жас буынның бір топ өкіліне құрмет көрсетіліп, лайықты сый-сыяпат жасалды. Сонымен қатар бояуы кеуіп үлгермеген «Ұлы даланың «Дидары» атты естеліктер жинағы да мерейтой аясында тындырылған үлкен шаруаның бірі болды. Ал ақын Руслан Нұрбай мен композитор Қанат Мұрсәлімов жазған «ЖезДидар» әнін мерейтойға жиылған қауым ұжымның әнұраны ретінде қабылдап, ыстық ілтипаттарын білдірісті.
Жалпы, «Дидар» телеарнасының мерейтойы салтанатты шарамен ғана шектеліп қалмады. Бағдарлама аясында журналистиканың майталман мамандары мен Ө.Байқоңыров атындағы Жезқазған университетінің студенттері арасында кездесу ұйымдастырылып, шарапаты мол шара өтті. Бұдан бөлек, телеарнаның баспасөз клубында «Қазіргі кезеңдегі аймақтық телеарналар: теория және тәжірибе» тақырыбында өткен конференция да мерейтой бағдарламасының мазмұнын арттыра түсті. Ал Ұлытауда ұйымдастырылған «Ішкі туризмді қалыптастырудағы бұқаралық ақпарат құралының рөлі» атты көшпелі кеңес барысында салтанатты шараға арнайы келген журналистер мен аталған ауданның әкімі Берік Әбдіғалиұлы арасында салиқалы әңгіме өрбіді.
Міне, алпысжылдық асуы ел ішінде осындай мазмұнда аталып жатқан тұста телеарнаның тарихы туралы да аз-кем айта кетуді жөн санадық. Тамырлы телеарнаның өткен тарихында атауы мен мәртебесі бірнеше мәрте өзгертіліпті. Атап айтқанда, 1959 жылы қарапайым ғана әуесқой студия болса, арада бір жыл өткенде Жезқазған телевизия студиясы мәртебесін алған екен. 1973 жылы облыстық телевизия және радиохабарлары жөніндегі комитет деп аталды. 1991 жылдан бастап Жезқазған облыстық телерадиокомпаниясы болып өзгертілген. Ал 1997 жылы «Дидар» қалалық телевизия каналы деген атауды ұстап қалды.
Иә, «Дидардың» тарихына көз жүгіртсек, телеарна өзінің тамырын Жезқазған тау-кен металлургиялық комбинатындағы электр цехының инженерлері Б.Длугач, А.Трошин құрған шап-шағын әуесқой студиядан тартады екен. Алғашқы хабарын 1959 жылдың 5 қыркүйегі күні металлургтердің мәдениет сарайынан таратқанда, бұл оқиға қаланың мәдени өмірін дүр сілкіндіріпті. Қарапайым инженерлердің игі бастамасын қалалық партия комитеті мен оның басшысы қызу қолдап, көп ұзамай әуесқой студия Жезқазған телестудиясы болып құрылып, мемлекеттік тіркеуден өткен.
Телеарнаның алғашқы директоры болып Керімбай Көпбаев қызмет еткен. Одан кейін мекемені әр жылдары Зиновий Шкундин (1964-1970 жж.), Рақымбай Жұматаев (1970-
1985 жж.), Сәбит Байдалин (1985-1997 жж.) басқарды.
Ерекше айтуға тұрарлық бір жайт, «Дидар» телеарнасы елімізде алғаш болып құрылған телевизиялық студиялар қатарынан орын алады. Нақтырақ айтсақ, 1958 жылы елімізде тұңғыш рет Алматы және Қарағанды қалаларында телевизиялық студиялар ашылып, хабар тарата бастайды да, арада бір жыл өткенде сол кездегі шағын қала Жезқазғанда әуесқой студия құрылады. Яғни, бүгінгі «Дидарды» еліміздегі үшінші болып құрылған телеарна деп сенімді түрде айтуға болады.
Алпыс жылдың жүгі артылған тарихында «Дидар» телеарнасы талай ауыртпашылықты басынан өткерген. Тіпті, тағдыры қыл ұшында тұрған кездері де болыпты. Әсіресе Жезқазған облысы таратылған тұста телеарна дүние-мүлкінен айырылып, қарызға белшеден батып, жабылудың аз-ақ алдында тұрған. Міне, осындай қиын-қыстау кезде мекеменің тізгінін қолына алған Базарбай Әлеуханұлы бірер жылдың ішінде телеарнаның ауған жүгін түзеп, бүгінгідей болып-толған қалпына жеткізе білді.
«Дидар» телеарнасында әр жылдары өз ісінің нағыз майталманы санатындағы мамандар еңбек етті. Мысалы, белгілі ақын Жүрсін Ерман мен оның зайыбы Бақытжамал еңбек жолын осы мекемеде бастаған. Бұдан бөлек, қарашаңырақта Сапабек Мырзатов, Ескен Хасенов, Сайлаухан Нәкенов, Аманжол Үсенов, Жанбау Бірманов, Галина Драговоз, Сара Ысқақова, Рая Баймағанбетова, Шұға Нұрмағанбетова, Әсия Айдарханова, Нескен Битенова, Валентина Головина, Петр Севостьянов, Махмуд Сексенбаев, Мақсұт Сексенбаев, Дулат Әбілдин сынды кәсіби мамандар жұмыс істеп, телеарна жылнамасын өз қолдарымен жазған.
Қазіргі таңда Жезқазғанның «Дидары» халық пен биліктің арасында дәнекерлік қызметін адал атқарып, Жезқазған-Ұлытау өңірімен ғана шектеліп қалмай, IDTV жүйесі негізінде ел көлемінде хабар тарататын тұғырлы һәм тамыры тереңге кеткен телеарнаға айналған.
Қарағанды облысы,
Жезқазған қаласы
