Қансонарда бүркітші шығады аңға,
Тастан түлкі табылар аңдығанға.
Жақсы ат пен тату жолдас – бір ғанибет.
Ыңғайлы ықшам киім аңшы адамға, – деп жырлаған ұлы Абайдың өзі де саятшылықты жақсы көргені, Қарашолақ, Көкшегір атты құстары болғаны белгілі. Осы ретте һакімнің 175 жылдық мерейтойы қарсаңында Үржар ауданының Көктерек ауылында аудандық құсбегілер сайысы өтті. «Бұған дейін ауданымызда республикалық бүркітшілер бәсекесін өткізгенбіз. Ал аудандық құсбегілер байқауын алғаш рет ұйымдастырып отырмыз. Аудандық Денешынықтыру және спорт бөлімінің ұйымдастыруымен, Көктерек ауылдық округінің демеушілігімен өткен додаға «Қарагер», «Заңғар», «Сарбалақ», «Жебе», «Мұзбалақ», «Самғар», «Көкшыбар», «Ақсұңқар», «Ақжелке», «Сарышегір», «Сартірнек» атты 11 бүркіт баптары мен бақтарын сынап көрді. Құсбегілер Көкөзек, Қазымбет, Бақты, Көктерек және Қаратал ауылдарынан келді» дейді Көкөзек орта мектебінің дене тәрбиесі пәнінің мұғалімі, «Шығыс Алтай» бүркітшілер федерациясының президенті Тәттімбет Кәпұлы.
Сонымен құсты қолға шақыру, құстың еркін ұшуы, бүркітті шырғаға салу, бүркітті қоянға салу және бүркіті түлкіге салу секілді 5 кезеңнен тұрған сайыста Тәттімбет Кәпұлының «Қарагер» атты бүркіті 3-орынды иеленсе, 1-2-орындарды Көктерек ауылының құсбегісі Нұғым Өмірбектің «Мұзбалақ» және «Сартірнек» атты бүркіттері жеңіп алды.
Шығыс Қазақстан облысы,
Үржар ауданы,
Көктерек ауылы
