Өңір басшысы биылғы 10 айдың қорытындысы бойынша іс жүзінде өңірдің барлық негізгі макроэкономикалық көр­сеткіштері оң серпін көрсеткенін атап өтті. Өнеркәсіп өсімі – 15,3, құрылыс жұмыстары – 3,5, тұрғын үйлерді пайдалануға беру – 15,9, бөлшек сауда – 3,6 %-ға өсті. Өңір экономикасына 226,4 млрд теңге инвестиция тартылып, өсімі 3,9 %-ды құрады. Сыртқы ин­вес­тиция 10,7%-ға ұлғайды. Ауыл шаруашылығында мал шаруашылығы өнімінің өндірісі 2,1%-ға ұлғайды.

10 айда облыстың өнеркә­сіп­тік кәсіпорындары 978,4 млрд теңгенің өнімін өндірді, ал тұ­тас 2018 жылдың ішінде бұл көр­сеткіш 883,4 млрд теңге болған еді. Жыл қорытындысы бойынша облыста өнеркәсіп өндірісінің көлемі алғашқы рет 1 трлн тең­геден асты.

А.Мұхамбетовтың айтуынша, авто­мобиль құрастыру жақсы қар­қын­мен дамып, өндіріс көлемі 2 есеге өсті. Есепті кезеңде 19,6 мың авто­мобиль құрастырылды, бұл өткен жылғы осы мерзім көрсет­кі­шінен 2 есе артық. Жыл соңы­на дейін 25 мың автомобиль құ­растыру көзделуде. Облыста биыл «Lovol», «Кировец» тракторлары құрастырыла бастады. «АгромашХолдинг kz» АҚ, «КамАЗ» компаниясы­мен бірлесіп іске асыратын авто­бөл­шек өндірісіне қатысты жобалар жүзеге асырылуда.

Аймақ басшысы облыстың ауылшаруашылық саласы туралы да баяндады. Бұл сектордың жалпы өңірлік өнімдегі үлесі 11,2 %-ға тең. Салада 125 мыңнан астам адам жұмыс істейді. Бұл – жұмыспен қамтылған халықтың жалпы санының 26%-ы.

Биыл облыста 3 млн тонна астық бастырылды, орташа өнім гектарына 7,6 центнерден айналды. Жиналған астық көлемі шаруашылықтарға бірінші кезек­тегі қажеттіліктерді жабуға, мал қыстатуға, егіс жұмыстарына дайын­далуға мүмкіндік береді. Бидай құнының өсуі­не байланысты жергілікті бюд­жеттен әлеуметтік нанның баға­сын тұ­рақ­тандыру үшін 300 млн теңге бөлінді. Ауыл шаруа­шылы­ғы жан­уарларының барлық түрлері­нің саны және өнімнің барлық түрлерінің өндірісі артты.

– Биыл көлік инфра­құ­рылы­мын дамытуға 37,3 млрд теңге бө­лінді. Бұл 550 км-ден астам автожолды қайта жаңартуға және жөн­деу­ге мүмкіндік берді. Жақсы және қанағаттанарлық жағдай­дағы облыстық және аудан­дық маңызы бар автомобиль жол­да­рының үлесі 2018 жылғы 66%-дан 68%-ға дейін өсті, – деді әкім.

Жыл басынан бері аймақта 281,6 мың шаршы метр тұрғын үй пайдалануға берілді. Тұрғын үй құрылысына 24,8 млрд теңге инвестиция салынды. Жыл соңына дейін құрылыс қарқынын 330 мың шаршы метрге жеткізу жоспарланып отыр, бұл былтырғы межеден 10%-ға жоғары. Халықтың әлеуметтік осал топтары үшін жал­ға берілетін тұрғын үй қорын құру мақсатында 2019 жылы 8 ны­санды іске асыруға 3,1 млрд теңге бөлінді.

Білім беру саласын қаржы­лан­дыру да ар­тып келеді. Соңғы 3 жылда облыстың білім беру бюджеті 1,5 есеге дерлік өсті. Қостанайда әрқайсысы 900 орын­дық бірне­ше мектеп пен гимназия пайдала­нылуға беріліп, үш ауысымда оқыту проблемасы еңсерілді. Қостанайдың «Юбилейный» шағын ауданында және Әулиекөл ауданының Аманқарағай кентін­де мектеп салынып жатыр. Мұ­ның сыр­тында 21 оқыту нысанын күр­делі жөндеуге 2,7 млрд теңге бе­рілді. Білім беру мекемелері кең жолақты интернетпен 100% қам­тамасыз етілді.

10 айдың ішін­де 15 мыңнан астам жұмыс ор­ны, оның ішінде мемлекеттік және салалық бағ­дар­ламалар шең­берінде іске асы­рылатын жобаларда 8 мың­нан астам жұ­мыс орны ашыл­ды. Іс-шара­лар­ға 25 мыңнан ас­там адам тар­тылды. Оның ішінде 18 мың адам тұрақты және уа­қытша жұмысқа орналасты, 4,5 мыңнан астам адам сұранысқа ие мамандықтар бойынша және биз­несті жүргізу негіздерін оқуға жіберілді. Бағдарлама қатысу­шы­ларына бизнесті жүргізуге 3 млрд теңгеден астам шағын кредиттер берілді.

Әкім журналистер сауалына да кеңінен жауап берді. Мәселен, Арқалық пен Шұбаркөл арасын­да темір ­жол болғанымен, Арқалық қала­сының тұрғындары әлі күнге көмірдің қызығын көре ал­май отыр. Себебі қаладағы жы­лу орталығы мазут жағады. Ма­зут көмірден бірнеше есе қым­бат. Арқалықты көмірмен жылы­ту мәселесі қашан шешімін таппақ?

Біздің осы сұрағымызға жауап берген облыс әкімі соңғы жыл­­дары мазуттың 1 тоннасы 50 мың теңгеден 116 мың тең­­­геге қымбаттап кеткендігін айт­­ты. Осыған орай Арқалық тұр­ғын­­дары Мемлекет басшысы Қ.То­қаев барғанда осы мәселені көтер­­ген. Қазір бұл проблема ше­ші­мін табу­да. Арқалық жылу энер­гети­ка­лық орталығын мазут­тан көмірге кө­ші­ру үшін Үкі­мет 3 млрд тең­ге қар­жы бөлді. Бұл қаржыға кө­мір­мен жанатын қа­зандықтар салы­нуда. Бұл мәселе Президент бақы­лауында тұр.